Friday, May 18, 2007

العريس تامر القاهري ...! ا

العريس تامر القاهري ...! ا
صباح الورد
دعواتكم عشان الامتحانات
يارب
وفق كل ممتحن وممتحنة
بلاش رغي ..إليكم البوست

********
أبريل 2007المكان أحد الأحياء الشعبية فى محافظة شمال شرق القاهرة
كنت في طريقي للذهاب لشكمة صديقتي الجميلة دعاء-هى بتقول عليها شكمة - أمشي الخطوة العسكرية المتخشبة ..واحد اتنين .."سلامو عليكو يا حاجة .."..أقولها لصاحبة محل المنظفات والطحينة على ناصية شارعنا ..كنت أبحث عن علاقة بين الطحينة والصابون أو الكلور ..يمكن طحينة بالصودا الكاوية ...! ردت عليّ"أهلا ياحبيبتي ..ازيك "..مش عايزه حاجه ؟.."لا سلامتك "..أتقدم للأمام حوالي مترين أسمع صوتها .."بقولك ايه ...راجعة على طول ؟"..قلت فى نفسي يمكن عايزة حاجة اشتريها لها حاجة ..قلت "لا رايحة شبكة صاحبتي "..على فكرة كنت أرتدي حاجة تشبه اليونيفورم !..قالت "بقولك ايه .." تبتسم وتصمت صمتا مريبا "انت فاضل لك كام سنة وتخلصي؟"..طبيعتى الرذلة تطلع "خير ان شاء الله ؟."..قالت :"فاضل لك كتير يعني ؟" قلت :"إن شاء الله سنة .."ابتسمت ابتسامة نسائية ماكرة وقالت ببساطة :"بقولك إيه ..تتجوزي واحد من مصر ؟!"-مصر يعني القاهرة !- خفق قلبى ..وبكيت "على رأي عم جاهين "-جوايا طبعا-فرحة وشوق وحماس ! ..يانهار قطني برسيمي ..-ولمن لا يحمل القاموس الفلاحي يعنى يانهار أبيض مخضّر! مصر ..القاهرة أم الدنيا هشوف الهرم وأبو الهول اللى بشوفهم صور ..وهركب مترو الأنفاق-جمع نافق تقريبا !-وهطلع فوق برج القاهرة وأنط بالباراشوت وأطير بلالين وطبعا هروح المسرح القومي أتفرج على يحيى الفخراني فى الملك لير ..أكون أو لا أكون تلك هى القضية!-بالمناسبة هاملت صاحب الجملة !- وهركب مركب فى النيل مع توتي -هفرض ان اسمه تامر ع الموضة- وهخليه يركبني الزرافة أو سيد قشطة زى بعضه-تقريبا بيتركبوا!- وأحقق أمنيتي العزيزة وأقف زى ليلى نظمي قدام قفص الفيل وأقوله الفيل اسمه ايليفانت ! ...المهم بعد هذا كله لأني مش متعودة على جو القاهرة سيحدث لي مثلما حدث مع محمد صبحي فى رائعته "هنا القاهرة " أتعثر فى حفرة من الحفر العتيقة ، كان تامر فى تلك الأثناء قد جلس على طوبة مجاورة يقزقز السوداني الذى اشتريته للقرد وكان يردد ربنا يسهل ...إلى أن أتى الونش أخييييراوحملني الونش من قفايا المسكين كقط شريد ..كتر خيره تامر نادى لي الونش ! -أكتشف فيما بعد انى أشبه ابنة الفواعلي الغلبان الذى رآني صدفة فصعبت عليه فجلب الونش! يا تااااااامر ..ماتسبنيش ..يرد "هعملك ايه يعني ؟"..ياتااااامر ..فى تلك اللحظه يجثم على صدرى شبح أسود من الدخان .."يا حبيبي فايتنى للسحابة السودا ورايح على فين ؟..كح كح ! أسمع صوته مطمئنا "سحابة سودا مين ده أوزون ..دبليو أوه تو بتاع بلاد بره ياجاهلة مابتسمعيش النشرة الجوية! "ياتاااااامر "...ماتخافيش أنا هروح أجيب بدلة الفضاء بتاعتي مش هتأخر !...استنى قفايا هيبقى مسطح ! .."تركنى تامر..ظللت متشعلقة فى الهواء إلى عثروا على عربية كارو مجهولة الهوية يقودها جحش يتيم ..أختتم قصتي القاهرية بأن أتبنى الجحش وأستغل اللغة الانجليزية التى تعلمتها وأعمل مشروع كارو سياحي وأكتب على العربية "مرمر كارو فور توريزم سيف يور موني فروم تاكسي آند باص" "مرمر -لازم أدلعني!- للكارو والسياحة توفر فلوسكم من الميكروباصات والتكاسي !..كل هذه المشاريع هدمتها بكلمة تلقائية قلتها للست صاحبة العريس :"أصلهم متكلمين عليا !- ايوه صحابي بيتكلموا عليا! قالت :"قريبك ؟!" ايه الرزالة دى ؟.".ربنا يسهل ..ربنا يسهل -يارب مش عايزه أكذب- سألتنى "مخطوبة ؟!"..ايه الذكاء الفطري ده ؟! قلت لها "لأ.." قالت لى ..:"انت فى الدبلوم ؟! "-هى علامات الدبلمة واضحة للدرجة دي ..؟! يعنى 15 -16 سنة! قلت لها "لا فى كلية تربية " ابتسمت ابتسامة باهتة وقالت "عسل "-على ايه ما اعرفش! ..سألتها "ممكن أساعدك يعني ؟ -عزومة مراكبية طبعا - فاجأتني برد غريب "لو تعرفى واحدة طويلة زيك ..!"-تقريبا عندها طول نظر !- التفت بجد حول نفسي لأبحث "طويلة ..طويلة ؟؟؟..." ولأني ضد التدليس قلت لها" طويلة مين ؟..شوفى أنا لابسه كعب -يجي 5 سم بحالهم ! - قالت لى لا انت طولك حلو -فعلاعندها طول نظر! والعريس عايز يتجوز مازورة طويلة تسد فى حفر القاهرة ولا تحتاج الى ونش ! ابتسمت ابتسامة بلهاء وقلت لها "كان نفسي أساعدك معلش !..قالت والغيظ يشع فى ابتسامتها "ولا يهمك يا حبيبتي .." ياللا سلام ...سلام !ا

Thursday, May 3, 2007

فرعون الفاضل










اضحك للدنيا الجميلة التي رحلت ..أول مرة أشهد لحظة ميلاد اسمي صغنونا وببنط منمنم وبرئ كانت اضحك للدنيا ..أول مرة أدخل جرنال حقيقى ..كانت اضحك للدنيا ..بعدين أتكلم عن اضحك براحتي ..بس دي كانت مقالة من مقالاتي في اضحك "القراء الغلابه ّ!" كانت في العيد الصغير آخر 2005 والله أيام ..لن أنسى تعليق محمد فاروق عليها عندما كنت في القاهرة ..أهلااااااا! فرحت جدا برسمة مخلوف ليها ..راجل فرعون ماشي مع اتنين ببدل سودا زى الغوريلات اللي موطنهم الأصلي سويسرا...! ..عبقري يا مخلوف والله ..بس زعلت لما الفقرتين بتوع الوطني اتحذفوا ..مافي مشكل ..أهى الحدوتة ..ياااه فين أيامك يا كتابه ؟




************************************************


فرعون الفاضل...معقول؟! .....ا





طبعا حضراتكم مستغربين من العنوان وطبعا انا تماما مثلكم لكن هذه هى القسمه والنصيب ..كيف؟اقولكم اليوم بعد الافطار فوجئت بأخى "حسام" الطالب بالصف الثانى الثانوى الصناعي يحكى لنا عن مدرس دخل لهم احتياطى ،واخذ يحكى لهم عن فرعون باشا ..-بعد اذنكم هسرح بيكم شويه- فرعون ياجماعة ملك مصر لم يكن مصرى ..كان يمنى هربان من اليمن!"اللى هو حسب معلوماتى ابن رمسيس الثانى" وبعد ما هرب من اليمن جاء لمصر فوجد ابن الملك يغرق فى ترعه فأنقذه ,طبعا الملك عنده دم فجعله وزيرا ....المهم اخى قال لى ان الطلبه المشاغبين جلسوا وكأن على رؤسهم الطير ..واستمر المدرس يحكى لهم قائلا "العيد داخل يا عيال وانتم ما عندكوش دم عايزين من والدكم هدوم جديده وكل واحد منكم عنده اربع خمس غيارات حرااام ..عارفين فرعون ؟؟؟ سيدنا موسى سأل ربنا ليه ما خسفتش الارض بفرعون؟ فقال ربنا ماخسفهاش عشان تلات حاجات ...1 - فرعون كان بيحافظ على النعمة كان لما يجى ياكل عيش - لا أعرف هل كل بزلط ولا لأ اعذرونى لقلة الوثائق والمادة التاريخية - المهم كان بيفرش جلابيته "فرعون كان راجل فلاح"عشان يحافظ على العيش ويلم اللى يقع وتانى حاجه كان بيحافظ على هدومه وتالت حاجه امه كانت عاجزه وبعدين كان بيحميها لا مؤاخذه يا جماعة وبعدين كان بيعلقها ف السقف عشان النمل ما يتلمش عليها .." يمكن بدل توشيبا منظر برضه " بعد ذلك استغل المدرس ان الطلبه قسم كمبيوتر فقال لهم انا جبت المعلومات دى من على الكمبيوتر ...المشكلة الحقيقيه ان الطلبه تلات ارباعهم فلاحين غلابه ولا يوجد تدريب عملى ..وكل واحد همه يخدم ابوه فى الارض وما الى ذلك....المدرس استمر فى السرح بالطلبة ولا داعى لاكثر من ذلك...طبعا ذم فرعون ايضا ..لكن المدح كان له نصيب كبير مما يجعلنا نسأل ....من الحزب المسئول عن وجود هذا المدرس صاحب المعلومات الجهنميه؟...طبعا يا جماعة آآخر حزب تفكروا فيه أصلا الحزب الوطنى .. أما ما أذكره عن واقعه أخرى والمدرس يحكى لنا عن فرعون قال سهوا "سيدنا فرعون" لااعرف ما هى حكاية فرعون أصلا ...ربنا يسترها علينا جميعا .......صحيح التعليم -لا مؤاخذه -أمن قومى ..وأمن دوله ..على فكره يا جماعة حد معاه ايميل فرعون ينوبه ثواب فيا ..فى الأيام المفترجه....؟