Friday, May 18, 2007

العريس تامر القاهري ...! ا

العريس تامر القاهري ...! ا
صباح الورد
دعواتكم عشان الامتحانات
يارب
وفق كل ممتحن وممتحنة
بلاش رغي ..إليكم البوست

********
أبريل 2007المكان أحد الأحياء الشعبية فى محافظة شمال شرق القاهرة
كنت في طريقي للذهاب لشكمة صديقتي الجميلة دعاء-هى بتقول عليها شكمة - أمشي الخطوة العسكرية المتخشبة ..واحد اتنين .."سلامو عليكو يا حاجة .."..أقولها لصاحبة محل المنظفات والطحينة على ناصية شارعنا ..كنت أبحث عن علاقة بين الطحينة والصابون أو الكلور ..يمكن طحينة بالصودا الكاوية ...! ردت عليّ"أهلا ياحبيبتي ..ازيك "..مش عايزه حاجه ؟.."لا سلامتك "..أتقدم للأمام حوالي مترين أسمع صوتها .."بقولك ايه ...راجعة على طول ؟"..قلت فى نفسي يمكن عايزة حاجة اشتريها لها حاجة ..قلت "لا رايحة شبكة صاحبتي "..على فكرة كنت أرتدي حاجة تشبه اليونيفورم !..قالت "بقولك ايه .." تبتسم وتصمت صمتا مريبا "انت فاضل لك كام سنة وتخلصي؟"..طبيعتى الرذلة تطلع "خير ان شاء الله ؟."..قالت :"فاضل لك كتير يعني ؟" قلت :"إن شاء الله سنة .."ابتسمت ابتسامة نسائية ماكرة وقالت ببساطة :"بقولك إيه ..تتجوزي واحد من مصر ؟!"-مصر يعني القاهرة !- خفق قلبى ..وبكيت "على رأي عم جاهين "-جوايا طبعا-فرحة وشوق وحماس ! ..يانهار قطني برسيمي ..-ولمن لا يحمل القاموس الفلاحي يعنى يانهار أبيض مخضّر! مصر ..القاهرة أم الدنيا هشوف الهرم وأبو الهول اللى بشوفهم صور ..وهركب مترو الأنفاق-جمع نافق تقريبا !-وهطلع فوق برج القاهرة وأنط بالباراشوت وأطير بلالين وطبعا هروح المسرح القومي أتفرج على يحيى الفخراني فى الملك لير ..أكون أو لا أكون تلك هى القضية!-بالمناسبة هاملت صاحب الجملة !- وهركب مركب فى النيل مع توتي -هفرض ان اسمه تامر ع الموضة- وهخليه يركبني الزرافة أو سيد قشطة زى بعضه-تقريبا بيتركبوا!- وأحقق أمنيتي العزيزة وأقف زى ليلى نظمي قدام قفص الفيل وأقوله الفيل اسمه ايليفانت ! ...المهم بعد هذا كله لأني مش متعودة على جو القاهرة سيحدث لي مثلما حدث مع محمد صبحي فى رائعته "هنا القاهرة " أتعثر فى حفرة من الحفر العتيقة ، كان تامر فى تلك الأثناء قد جلس على طوبة مجاورة يقزقز السوداني الذى اشتريته للقرد وكان يردد ربنا يسهل ...إلى أن أتى الونش أخييييراوحملني الونش من قفايا المسكين كقط شريد ..كتر خيره تامر نادى لي الونش ! -أكتشف فيما بعد انى أشبه ابنة الفواعلي الغلبان الذى رآني صدفة فصعبت عليه فجلب الونش! يا تااااااامر ..ماتسبنيش ..يرد "هعملك ايه يعني ؟"..ياتااااامر ..فى تلك اللحظه يجثم على صدرى شبح أسود من الدخان .."يا حبيبي فايتنى للسحابة السودا ورايح على فين ؟..كح كح ! أسمع صوته مطمئنا "سحابة سودا مين ده أوزون ..دبليو أوه تو بتاع بلاد بره ياجاهلة مابتسمعيش النشرة الجوية! "ياتاااااامر "...ماتخافيش أنا هروح أجيب بدلة الفضاء بتاعتي مش هتأخر !...استنى قفايا هيبقى مسطح ! .."تركنى تامر..ظللت متشعلقة فى الهواء إلى عثروا على عربية كارو مجهولة الهوية يقودها جحش يتيم ..أختتم قصتي القاهرية بأن أتبنى الجحش وأستغل اللغة الانجليزية التى تعلمتها وأعمل مشروع كارو سياحي وأكتب على العربية "مرمر كارو فور توريزم سيف يور موني فروم تاكسي آند باص" "مرمر -لازم أدلعني!- للكارو والسياحة توفر فلوسكم من الميكروباصات والتكاسي !..كل هذه المشاريع هدمتها بكلمة تلقائية قلتها للست صاحبة العريس :"أصلهم متكلمين عليا !- ايوه صحابي بيتكلموا عليا! قالت :"قريبك ؟!" ايه الرزالة دى ؟.".ربنا يسهل ..ربنا يسهل -يارب مش عايزه أكذب- سألتنى "مخطوبة ؟!"..ايه الذكاء الفطري ده ؟! قلت لها "لأ.." قالت لى ..:"انت فى الدبلوم ؟! "-هى علامات الدبلمة واضحة للدرجة دي ..؟! يعنى 15 -16 سنة! قلت لها "لا فى كلية تربية " ابتسمت ابتسامة باهتة وقالت "عسل "-على ايه ما اعرفش! ..سألتها "ممكن أساعدك يعني ؟ -عزومة مراكبية طبعا - فاجأتني برد غريب "لو تعرفى واحدة طويلة زيك ..!"-تقريبا عندها طول نظر !- التفت بجد حول نفسي لأبحث "طويلة ..طويلة ؟؟؟..." ولأني ضد التدليس قلت لها" طويلة مين ؟..شوفى أنا لابسه كعب -يجي 5 سم بحالهم ! - قالت لى لا انت طولك حلو -فعلاعندها طول نظر! والعريس عايز يتجوز مازورة طويلة تسد فى حفر القاهرة ولا تحتاج الى ونش ! ابتسمت ابتسامة بلهاء وقلت لها "كان نفسي أساعدك معلش !..قالت والغيظ يشع فى ابتسامتها "ولا يهمك يا حبيبتي .." ياللا سلام ...سلام !ا

14 comments:

REEMOO said...

حد يطول عريس من مصر المحروسه
يا بنتى ده انتى اتكتبلك الهنا والسعد
كفايه انك هتبقى جنب اجدادك الفراعنه
فكرى تانى
واحسبيها بالعقل
حد لاقى عرسان اليومين دول
ومش أى عريس ده من مصر المحروسه :)))))
------
ميرسى على كلامك الحلو فى التعليق عندى يا قمر
تحياتى ومحبتى

عصفور طل من الشباك said...

هو ده برغم إن الموضوع طلع فشنك
إلا إن ده هو المطلوب تحديداً
عريس من القاهرة ليك ولهبة ولإيمان صديقتي الطنطاوية عشان نبقى مع بعض في نفس البلد حتى لو بنشوف بعض كل فترة بس على الأقل نحس إننا مع بعض
نرغي مع بعض في التليفون بالمكالمات المحلي
كده يعني

الملاح التائه said...

أنا أول تعليق
هييييه هيييييييه
هاتيلى حاجه حلوه بقى
ازيك ؟
أنت يا بنتي لسه ماخدتيش على التطفل الفطري للبني آدمين اللى بنشوفهم كل يوم بجد حاجه تخنق
تفتكري التطفل ده سببه ايه؟
مش بتشوفى الظواهر بتاعته من البحلقه فى اى كيس معدي ومش بعيد فى اى جثه معديه لإستكشاف أعمق أعامييقها
هاقولك ايه ولا ايه؟
ايه العلاق صحيح بين الطحينه والكلور ؟
هه؟

sendbad said...

الف مبروك والله فرحتلك خالص مش قلتلك نصيبك هايجيلك لحد عندك اه بقي امتي الفرح وفين

أحمد حربية وسيد تركي said...

جامد جدا الحوار ده وخصوصا العريس اللي كل مطالبه واحدة طويلة،أما بالنسبة للكارو السياحي فعجبني جدالدرجة إن انا عايز أشارك فيه و بالحمار كمان بدل الجحش اليتيم بتاعك، هوه صحيح سنه كبير ، لكن بقاله 25 سنة سايق بلد تفتكر مش هايقدر علي كارو؟؟

حربية

أحمد حربية وسيد تركي said...

جامد جدا الحوار ده وخصوصا العريس اللي كل مطالبه واحدة طويلة،أما بالنسبة للكارو السياحي فعجبني جدالدرجة إن انا عايز أشارك فيه و بالحمار كمان بدل الجحش اليتيم بتاعك، هوه صحيح سنه كبير ، لكن بقاله 25 سنة سايق بلد تفتكر مش هايقدر علي كارو؟؟

حربية

مروة جمعة said...

صباح الورد
ريموووو:ازيك ياقمر ..هو حد يطول بس المشكلة ان اختك قصيرة محتاجة ترابيزه عشان تطول ! ربنا يخليك يا ريم وما انحرمش

عصفور طل من الشباك :ازيك يا رورو ..بقولك ايه ما اشوفلكم عرسان عندي في الزقازيق ..ولا اقولك خليها اسكندرية عشان خاطر هبة ! متشكرة جدا وتحياتي

الملاح التائه :جت آوت يا ملاح ومش انت التعليق الاول ! بس منور برضه وبالنسبة للتطفل فربنا يصبرنا بجد ..تحياتي

سندباد:ماشي ياعم سندباد فرحت فيا ؟عموما انت معزوم على الفرح هقلبه ان شاء الله سينيما وهفرجهم على سندباد ..منور

أحمد حربية وسيد تركي:أهلاا يا عم أحمد بقولك ايه أنا راضيه بجحشي اليتيم اللي مش هيعرف من الآخر يورث فى مملكة الكارو الخلافة ..مسير الجحش يكبر وعجبي !! ا

StRoNg MeDiCiNe said...

حلوة حكاية كارو سياحى

عجبتى أوى

اتمنالك المزيد

تحياتى

عاشقة الوطن said...

السلام عليكم

ازيك يامروة ايه اخبارك

ديه اول زيارة لمدونتك بس ان شاء الله مش الاخيرة

ايه البوست التحفة ده يابنتى بس
بجد تحفة اوى
ودمك زى العسل كمان
بس سيبك من طنط ومش مهم تامر ده بكرة هيجيلك تامرات كتيييييير

يالا ياستى ربنا معاكى ونشوفك عروسة زى العسل كده ان شاء الله

مش عاوزة حاجة ياقمر
يالا سلااام

kafrawy said...

الست عيزة تساعدك
ع العموم انت لو مش عايزة من القاهرة
انا جاهز للجواز بكرة الصبح

فبركة said...

ومالهم القاهريين يعنى يا مروة
اجدع ناس تاكل فول وتزوغ من الشغل ويشربوا دخان ويتنفسوا هوا ملوث ويشربوا ميا النيل الغرقانة بالكلور مش زيكم ميا من الترمبة
أنتى بجد مش وش نعمة
ربنا بيحبك يا تامر
نياهاهاهاها

مروة جمعة said...

صباح الورد ...آآسفة لتأخير الردود والله امتحانات ..ربنا يوفقكم

الطبيب القوي :أشكرك لزيارة المدونة وأتمنى لك التوفيق أيضا

عاشقة الوطن :وعليكم السلام ورحمة الله وبركاته ..شكرا يا عاشقة الوطن كثيرا لكلماتك المبهجة الملونة ..كلك ذوق ومنورة بجد بجد أشكرك ...

كفراوي : بجد ..بجد يا كفرورتي ؟ هههههه المسألة مش قاهرة او غير ..وبالنسبة لجاهز من بكرة الصبح دي فكر قبل أن تأتي رجلك في الجواز ..حظ سعيد يا كفراوي ..! ا

فبركة : الله الله ..ايه ده ؟ بقى يعني احنا اللى ماعندناش مصانع صابون ومجاري طبيعية .؟..اسمها طلمبة عندنا واحدة بالمناسبة ! ..بالنسبة لربنا بيحب تامر فده اكيد لانه بيحبنا كلنا ..وبالنسبة لمش وش نعمة ..أنا ممكن اكون وش فته ..وش مروة ..نعمة دي صاحبتي ماينفعش آخد وشها ..نياهااااا ماشي يا شريف ! ا

ابراهيم عز الدين said...

الف مبروووووووووووووووووووووووووووووووووووووووووووووووووووووووووووووووووووك
بس موضوع وكلام جامد

ماجد إبراهيم said...

اولا دى اول مرة اعلق عندك يا مروة
رغم مرورى المتكرر على مدونتك
فتحياتى لقلمك المميز الذى اثق فيه من زمان .. كما تعلمين

وأول مرة اعرف ان عرسان القاهرة مطلوبين قوى ... اومال انا مش لاقى عروسة ليه ولا بنات القاهرة عايزين شباب بحرى وقبلى وبنات بحرى وقبلى عايزين شباب القاهرة
هو فيه ايييييييييييه ...؟؟؟

ما علينا .. كمان عجبنى قوى حكاية مشروع الكارو
ونفسى اشارك فيه بجحشين انتاج محلى .. وزى السكر وبينهقوا بمواعيد وممن تظبيطهم للنهيق فى مواعيد محددة .. منبه يعنى ..
يعنى هايرضوا الزباين انما ايييييييييييه ..؟؟

يالا نهارك قطنى برسيمى