انت ركبت القطر ولا داس عليك؟


انت ركبت القطر ..ولاّ داس عليك؟! ا


يبدأ المذيع بصوته "البيرسولي"- نسبة إلى مبيد الحشرات الشهير!- في طرح سؤال عميق على أحد الشباب الجالسين على القهوة "إنت قاعد عندك هنا بتعمل إيه ..قوم اشتغل"..يرد الشاب ببلاهة أحسده عليها "أصل أنا معايا شهادة جامعية ..مستني الشغل!"..يرد المذيع "قوم في مصانع محتاجاك "،يرد الشاب بذكاء "ومين هيرضى يجوزني بنته وأنا عامل في مصنع؟"..فعلا وصمة عار!..يرد المذيع بلباقة"ومين هيرضى يجوزك بنته وانت قاعد على قهوة!"،فعلا ذكي يا عم المذيع! ..ينتهي اللقاء بأنه بالمختصر المفيد ،"في واحد ركب القطر وراح اشتغل ..والشغلانة جابت شغلانة وبقى كسيب – لقطة لشاب وسيم يركب القطار – سبحان الله قطار نظيف- لا أقصد رئيس حكومتنا أدام الله عزه!- قطار لم يصبه العطب ولا الصدأ!،ولقطة أخرى لنفس الشاب ببذلة العامل والخوذة وهو يعمل بجد،ثم لقطة أخرى وهو مرتدي "الكرافات" المربوط بإهمال – آل يعني الشغل !- وقميص شيك للغاية ومبتسم ويسلم على أحد العملاء !- "هذا ما نسميه في الدراما انحلال عقدة الأحداث!"..أما باقي الجملة "والتاني فاته القطر- لقطة للشاب الجالس على القهوة وهو يجري بشنطة خلف قطار !- انت بقى مين فيهم ..اللي ركب القطر وبقى كسيب ..ولا اللي فاته القطر؟!"..هذا إعلان تلفزيوني عن طلب عمال في المصانع..كانت الجهة المعلنة "اتحاد الصناعات المصرية" كان هذا الإعلان يتكرر بشكل يؤكد أنه لو لم ألمم ملابسي في جوال محترم ..والقرشين الحيلة في طرحة أتعصب بها مثل أحمد زكي في فيلم "البيه البواب"..واتجهت في الوقت المناسب إلى محطة القطار في بلدنا حتى ألحق الوظيفة والمصنع ..لأنتهى بي الأمر إلى مأساة عاطفية ومشهد درامي مثير ..وأنا أجري وراء القطار محاولة تقليد الجميلة "شادية"في فيلم "أغلى من حياتي".."أحمااااد"- عم أحمد سائق القطار بالطبع!- ويا ألف ندامة على عم أحمد الذي لو كان يمتلك هاتفا محمولا –موبايل أعني! – لكنت أرسلت له "ميست كول"- هذا نطقها الصحيح بالإنجليزية الفصحى!- فيستسلم للمكالمات الفائتة ويركن القطار على شط الترعة عدل..وألحق الوظيفة..لكن النصيب!..ا

مسألة أن يفوتك القطار – أو يدوس عليك كإحتمال أقوى وأكثر واقعية !- وأنت جالس على القهوة تلعب عشرتين طاولة ،حسب ما يصور الإعلان ..يؤكد - ماشاء الله ولا قوة إلا بالله – أن هناك فئة عظمى من الشباب –حاملي المؤهلات العليا- تعاف أنفسهم الوقوف في المصانع والتضحية ب15 عاما من التنطيط بين الفصول والمدرجات والدكك..وبين صفحات تحمل هراءا ،حتى يرتدوا (العفريتة) الشيك ..والتي ستؤدي بهم – لا محالة كما ينبئنا الإعلان- إلى إرتداء البذل والعيش بقية العمر أغنياء "كسيبة!"..ويا سلام على الشباب المنور أبو دم خفيف وهو متصور أنه لن يتزوج لمجرد انه عامل، بينما وظيفته "كمبحلاقاتي "يدب عينه في أكياس الموظفين الكادحين العائدين بالبطيخ – كفاكهة فلكلورية مرتبطة بالموظفين!- و"كشمام"يدس أنفه فيما ليس له ،وأخيرا كشخص معه شهادة جامعية محترف في دوري الطاولة وكراسي المعسل ،ستؤدي به إلى أن نصيبه وبنت الحلال ستأتيه في عقر المقهى ..وحتما ستخبره بعد الزواج أن ماجذبها إليه جلستة الشامخة على كرسي المقهى العتيق .."ماحدش يعرف يقعد قعدتك يا سي هيثم!"..يا عالم ..يا بشرية ..هل يوجد هذا في مصر؟..أعتقد أنه لا يوجد هذا النموذج الزاهد في العمل وإن وجد فهو نادر!- الإعلان يصور أن أغلبية شباب مصر لا يرغبون في التضحية..ومتمسكين بكرسي القهوة ،تاركين القطار يفوتهم!- وإلا ما جاءت صيغة الإعلان فيها ترهيب و وعظ-وإذا كان الأمر كذلك ..ما الذي يدفع صديقة لي في أسوان إلى أن تعمل بالثانوية العامة إدارية في مدرسة ..رغم أنها تحمل بكالوريوس علوم وتربية قسم رياضيات!- بلاش أهي بنت -..وما الذي يدفع زميلها الشاب العامل في المدرسة "فراش بالعامية"..إلى أن يضحي ب"روب" المحاماة ،والدفاع عن المظلومين حتى وإن كان سيدافع عنهم مثل عبد الفتاح القصري في "الأستاذة فاطمة"..ليعمل عاملا بشهادته الإبتدائية..بعد ليسانس الحقوق الذي هو قد الدنيا!..ما الذي يدفع هذا الشاب الذي حكت لي عنه أستاذتي في الجامعة أن يعمل بوابا في عمارتهم وهوحاصل على ليسانس الآداب!..طبعا الإجابة واحدة ..الخوف من أن يفوتهم القطار ..وربما لو كنت مكانهم لن أتردد في البحث مثلهم – رغم أن وضعي كفتاة مختلف-لكن غفر له الله عمنا صلاح جاهين ..الذي تنبأ يوما "بأن البنت زي الولد"..كأس وداير على الكل!..ربما لو سألت أي شاب ..تروح تشتغل في مصنع ؟..لن يجادلك ويفند لك الحجج .."معايا شهادة ..الحكومة هتشغلني..صوابعي فيها سخونية!"ولن تضطر كمذيع الإعلان للدفاع عن الحكومة والرد بأنها يا ضنايا .."عندها 6 مليون موظف مش عارفه توديهم فين"!..أي شاب ستعرض عليه عرض مثل هذا – حتى لو كان خريج طب مع الأسف!- سيفرح وربما قال لك "مصنع مصنع ..إن شا الله مصنع طرشي!"..لست متشائمة ..أبدا ،البلد ستصبح بلدا صناعيا ،لأن الشباب الجامعي سيعمل في المصانع ،وإن كنت لا أدري ماهية العمل الصناعي الذي سيعمله ..ربما عملوا في مجال التعبئه وتقفيل الكراتين !..لست متشائمة ..لكن طالما الحكاية واضحة والنهاية معروفة ..لماذا كل هذا الصراع التعليمي المرير والعك و الصداع ..إذا كان الشاب سيتخرج ليصبح عاملا ؟ - سيقولون إنها ثقافة عامة ومعلومات تجعله عاملا مثقفا ..- ياللإفتراء ..15 سنة معلومات عامة!- بصراحة ..أقترح إلغاء التعليم العام وجعله تعليما صناعيا طالما ان بلدنا لم تعد على الترعة تغسل شعرها بالبلهارسيا، واتجهت إلى "البيسين"بالكلور والشامبو!..وفي طريقها لمنافسة اليابان – التي نالت استقلالها في الخمسينات!- وأهو نساهم في التطور الصناعي ..خطوة خطوة ..فاليوم نغلف اللعب الصينية ونجمعها – بعد ما كنا متخلفين نستوردها متقفلة وجاهزة!-..وبالمرة ..شباب مصر كلهم يركبوا القطر قبل مايدوس عليهم ..وعجبي! ا

Comments

Anonymous said…
نسيتى إن المذيع اللى على رأيك صوته بيرسولى بيعتذر بكل شياكه ف آخر الإعلان.. نأسف لكل اللى حاول يتصل ومعرفش.. زودنا الخطوط عشان تعرفوا تتكلمو.. يعنى مالكوش حجه بقى..واللى يشتغل على ضرسه ينفع نفسه..وعملنا اللى علينا علينا
ربنا يرحمنا جميعاً
Anonymous said…
إزيك يا مروة

أولا أنا مبسوطة إني عرفت البلوج بتاعك، كتابتك الساخرة جميلة.

أنا أصراحة مش عارفة، فيه ناس صح ممكن تشتغل أي حاجة عشان القطر، بس فيه ناس تانية كثيرة زي ما الإعلان وصفهم، بجد أنا مش عارفة ، الشيء الأكيد إني بتمنالك مزيد من التقدم في الكتابة وصباحك ورد وياسمين وكل حاجة حلوة تحبيها :))

---
وسلامي برضوا لفيونكة :))
لا مش نركبه

لازم نسوق القطار

قعدت ربع ساعه افكر في تعليق
وفي الاخر مش لا تعليق

Marwa Friday said…
فيونكة : يافاتحة الخير !..إزيك يا هبة ..على فكرة لفتت نظري حكاية زودنا الخطوط ..حاجة تجيب (العته البتاتوني)!- ده مرض كان بيصفنا بيه مدرس الفرنسي في ثانوي!- ربنا يرحمنا يا فيونكة ..آمين

شيماء زاهر: الله يسلمك يا شيماء ..إزيك يا جميلة ..أسعدتيني لأنك مبسوطة دي حاجة ..الحاجة التانية أشكرك على رأيك ..أتمنى فعلا تكون كتابتي حلوة :) ..فيه ناس زي ما الإعلان وصفهم ..لكن لا اعتقد ما تعيشع مصر يجعلهم يقعدوا ..الراجل مصور مصر كأنها قهوة كبيرة !..الله يكرمك وأنا اتمنى ان اقرأ مجموعتك القصصية "البلياتشو" حتى أتعرف عليك أكثر - قريت عن المجموعة كثيرا بالمناسبة وكلها آراء مشجعة بالإضافة الىة اني قرأت لك قبل كده :)-
صباحك ورد وفل وياسمين وكل الحاجات الحلوة اللي بتسعدك .. سلامي لفيونكة برضه :-) ا

محمد عبد الغفار : يا أهلا بالشراقوة ..يامرحبا ..والله عندك حق يا عم محمد ..مش نركبه ..نسوقه ..بس يا ترى امتى هيصدر الإفراج عن المفاتيح من قصر رأس التين!..ولو المفاتيح ظلت محبوسة مش المفروض نخترع مفتاح..أو طفاشة حتى!..منور

محمود علي: ياااه يا محمود ازيك فين تعليقاتك من زمان؟..عارف قعدت تفكر في تعليق ربع ساعة تستحق التحية عليها ..وجملة لا تعليق لا بأس بها ..فل برضه ..!..ربنا يفرجها من عنده :) ا
بذرة امل said…
مروة اخيرا
مش عايزينك تغيبى عننا كتير كدة
عايزة اعترفلك يامروة ان اللون اللى كاتبة بيه فحلكى اوى ووجعلى عنيا خالص
بس عموما موضوعك ده جاى فى الصميم لان اخويا اتصل بيهم والكلام ده فى اول رمضان
ولحد دلوقتى ما شوفناش منهم شغل ولا حاجة

حاجة غريبة فعلا
yas said…
ازيك يامروة انتى فين يابنتى من زمان
حمدالله على السلامة
الاعلان ده مستفز جدا
يعنى هو اللى يشتغل فى المصنع لازم يكون خريج جامعة مينفعش يعنى يبقي هو اساساعامل معتقدش يعنى انهم خلاص خلصوا من البلد ولا هما شغلوا كل اللى معاهم دبلوم صناعى ويعينى المصانع بقي كتيرة وعايزيين يكملوامن بتوع الجامعة
الطبيعى انه كل واحد ليه تخصصه انا مقتنعة بكده جدالو غيرنا النظام ده يبقي تخلف اوى يعنى
سلام
Unknown said…
قطر ايه يا مروه بس
احنا بتوع الاتوبيس
Marwa Friday said…
بذرة أمل : منورة يا جميلة ..عارفه انه فحلكحي بس هحاول اغيره!..معلش يا بنتي أخوكي له الله ..ومصر برضه ..آل ايه قطر آل ..عجبي..

ياسمين: سمسمة والله وحشاني ..دخلت مدونتك وشفت الاختبار لذيذ ..بس مش كفاية اختبارات الميد تيرم وآخر السنة !..نظام بطاطس يا ياسمين ..طيب ما يطوروا التعليم الصناعي بدل الدوشة دي !..والله حاجة تغم ..:)) ما علينا ..انتي منورة ..سلامي للمنصورة نفر نفر !ا

لماضة : يا صباح الفل ..عملتي ايه في الامتحانات يادكتورة ياللي اسمك عزيز عليّ - وطبعا مش هقول ليه!- ..احنا بتوع الأوتوبيس أي نعم ..لكن هناك اشاعة تقول اننا احترفنا السرفيس والتوك توك ..إحنا بتوع السرفسة ..صباح الورد :)) ا
حلوة نساهم في التطور الصناعي دي !فكرتيني بالتطور الطبيعي للحاجة الساقعة !.. المهم انتي فينك من زمان ؟ ده انتي لو مش بترني كنت افتكرتك في المعتقل ! شوفي النظام اصلا غلط لأن التعليم عندنا نهايته الجامعة لكن في دول العالم المحترمة نهايته ثانوي و بتبقى شهادة محترمة و بيشتغلوا بيها و اللي عايز تعليم عالي بقى ..هو حر ! لكن احنا لازم مؤهل عالي بالعافية! و أي حاجة بغض النظر عن مواهبك و ميولك ! و في الآخر مصانع !!الواحد بس ماسك نفسه و مش عايز يقول كلام أبيح عالصبح ! .. أما مصر دولة صناعية : فده هبل لأنها أصلا دولة زراعية بس ربنا ينتقم من بتوع الثورة بقى ( الثورة الصناعية طبعا إحم ! )بس خلاص
Unknown said…
صباح الورد على عيونك يا مروه
فى شوية اكسير تفاؤل فاضوا منى
وقلت لازم ادى الغاليين عليا
تعالى الحقيلك شويه
مستنياكى عندى فى العياده
قصدى فى المدونه
يلا تعالى بسرعه
مروه اخيرا دخلت لاقيت بوست جديد
حمدالله ع السلامه
والله انا شخصيا شايفه فعلا ان الواحد يشتغل فى حاجه احسن من انه يعقد على القهوة
بما انه كده كده صعب انه يشتغل فى مجال دراسته يبقى لازم فعلا يسعى فى شغل اخر
لغايه لما ربنا يفرجها على عباده
خاااااالص تحياتى مروة
nour said…
وحشتينى يا بت
Anonymous said…
ماتفرقش كتير
القطر رمز هدفه التخويف والارعاب والايهام انك لو مسمعتش الكلام حتضيع نهائيا
طيب
هل يجرؤ حد منهم يقول ربع الكلام دة لعيل في اعدادي
لماتخلص عشرين سنة تعليم اخرتك عفريتة في مصنع زيك زي اللي معاه محو الامية
Marwa Friday said…
قلب الأسد :أهلاااا بالجيزة واللي منها:) بجد لك وحشة ..أنا الحمد لله مش معتقلة موجودة اهو!..عارفه ان تعليقك ينفع موضوع "اسمعي كلامي واكتبي انت مشروع حلو !" اتفق معاكي انه تطور طبيعي للحاجة "الفاترة" لكن التعليم في الدول المحترمة مالهوش نهاية ..والتعليم بيجذبك مش بينفرك !ا..بالنسبة للثورة الصناعية ..يا لئيمة ..طب عيني في عينك كده!ا

لماضة : يا سلام يا قمر ..علم وينفذ ...التاج جميل بجد ..أنا مريت عليه ..:)وان شاء الله آجي العيادة آخده بالهنا والشفا ..صباح الجمال على عيونك


رحيل : يا سلام يا سارة ازيك انت؟..وازي أهل المنزلة وعائلة طوبار الكريمة !..معاكي حق في ان الواحد يشتغل ..بس مش بطريقة الاعلاناتي المستفز ده!..منوره المدونة كلها ..تحياتي يا ساسو :)ا

مصطفى السيد سمير : آه ..شاعر بقى ولازم تشوف القطر رمز التخويف!..هو فعلا بنفس المنطق الذي تكلمت به ..وماحدش طبعا يقدر يتنح في عيل اعدادي ويقول له كده!..لنا الله ..فين قصائدك الدستورية؟..ياللا شد حيلك وورينا الشغل تمام ..
Marwa Friday said…
نور ..: آه ..معلش تعليقك اتمسح!..ياااه وانت كمان واحشاني يابت برضه!..بس تليفونك مغلقا ..أوصلك ازاي انا بقى ..بقى ده اسمه كلام؟..أهو ده اللي مش ممكن أبدا!ا
khobayb said…
معك حق
ربما لو تنصرف أذهانهم إلى تعديل المنظومة حقا ، لما كنا الآن نناقش هذا الإعلان

ربما لو كفوا عن اعتبارنا نعيش في بلاد أخرى ، لا تمت لـ"مصرهم" بصلة حيث العمل وفير ، والأجور مرضية ، والأسعار زهيدة ، والخدمات (على قفا مين يشيل) والمشكلة االحقة تنحصر في كسلنا نحن !! لكنت الآن في عملي ، بدلا من قضاء الوقت في كتابة تعليق يدفع ثمنه كاملا الحاج والدي !

ربما هم يعلمون ، لكنهم ارتأوا أن يواصلوا سياسة "الحقن المخدرة" ، فأنا على ثقة أن عشرات الآلاف من الاتصالات ستنهمر عليهم ، ولا أظنهم يملكون هذا العدد من فرص العمل
صباح الورد بسرعه عشان مستعجل .....المدونه ماشاء الله جميله
Marwa Friday said…
خبيب: معك أنت كذلك حق ..هي سياسة تخدير وضرب على الدماغ ..واحنا شعب بطران قطران زعلان كسلان ..ابن ..ابن ناس طيبين طبعا!..فعلا اكيد آلاف الاتصالات انهمرت عليهم ..هم فاكرين ان القهوة ملاذ الحائرين ودواء المجروحين..بدليل ان شاب الاعلان قال ..لا مؤاخذة ..انا معايا شهادة جامعية ومش هشتغل عامل ..يا حلاوة!..خليهم في مصرهم مع انها مصر واحدة ..ربنا باعد بينهم وبين أسفارهم آمين!..منور


حسام يحيى : أهلا وسهلا يا حسام ..متشكرة جدا بارك الله فيك ..صباحك ورد
micheal said…
حرام عليكي يا مروه...فكرتيني ليه بأسخف اعلان في تاريخ التيلفزيون المصري
بس جامده أوي نوضوع الصوت البيروسولي
:)
تحياتي
صباح الفل الابيض عليك

شوف،، هو اكيد الاعلان كان لشباب تانيه
قاعدين فى قهوة تانيه
فى بلد تانيه

آو الحكومة بتتكلم عن شعب تانى وده الاكيد
لان لو حد منهم اخد تاكسى وعرف ان السواق اصلا المفروض يكون محامى، او محاسب، او خريج كلية اعلام بلا واسطة

كانوا مش عملوا الاعلان ده

الشباب بيشتغل كل حاجه واى حاجه فى البلد
حتى لو عامل اسانسير فى فندق ربع نجمة.

الله يسامحهم

تحياتى

كاميليا
uogena said…
الحقيقه يامروه لا فض فوك .. عندما رايت الاعلان تذكرت احد متفوقى بلدتنا والذى بشكل مادرس فى كلية العلوم بعدما القى به المجموع بها ليتخرج ويعمل فى محل فلافل !!.. واستغربت مين بيتبطر على الشغل دلوقتى ؟ ولسه بيلعب اصلا
مروه
انا كنت نسيت الاعلان يا بنت الحلال
بتفكرينى ليه
اول مره أكره صوت طارق نور
مش اكرهه بس
انا عوز اخنقه

البوست جميل قوى يا مروه
lonely said…
مشكلتنا كشباب فى مصر اننا بنمثل
ايوا بنمتل
نفس الشاب اللى بيرفض يشتغل فى مطعم او فى مصنع او اى عمل متواضع فى مصر هو هو نفسه اللى بيستموت عشان يسافر اوروبا يغسل اطباق ويبيع وردوما خفى كان اعظم
والحجه ان هناك ما حدش عارف حد والعائد المادى اكبر بكتير ولما يبقى يرجع بقا بالقرشينات
يلبس البدله ويركب العربيه ويتجوز ست الحسن والجمال اللى ابوها نفس الاب اللى رفضه وهو هنا لابس الجينز الديرتى وما فيشش فى جيبه الا تمن الاتوليس اللى هيروح بيه
وطبعا تبدا سلسله من الاكاذيب من اول ادعاء الشاب انه بيدرب فريق ريال مدريد لحد الاب اللى بيقول خطيب بنتى رجل اعمال
لو اننا موش بنمثل كان بقا عادى جدا ان اب يوافق يزوج بنته لعامل حتى لومعاه بكالوريس طب
لانه ببساطه موش هيبص للشهاده المتعلقه لان التعليم فى مصر نظام فاشل اساسا
ولا هيبص للعفريته اللى لابسها
هو هيبصله كانسان كبنى ادم بيعمل عمل شريف موش حرام
وربنا قال
هل يستوى الذين يعملون والذين لا يعملون
ى شباب كتير فهم الللعبه وبدا يتحرك وربنا كرمه لان ربنا ما بيضيعشى تعب حد
وفى ناس لليسا بتمثل

اعتذر عن الاطاله
صباح الفل يامرمر

والله وحشتيني جداً

ووحشتني شقاوتك

بس قطر إيه يابت اللي عاوزانا نلحقه

يعني بعد الذل اللي شفناه في الجامعه

لسه عايزانا نجري وراء القطورات

أنا شخصياً هجيب حمار حصاوي صغير
وانطلق إلى المستقبل

بااااااااي
والجدع يحصلني
Marwa Friday said…
مايكل:ياااه هو اسخف اعلان يا مايكل؟واعلانات الضرايب بتاعة شومان مالهاش نفس!..منور!ا
=======================
كاميليا : صباح الفل يا كوكو ..كلامك صح ..بلد تانية وقهوة تانية ودنيا تانية !..واللي ما يشوفش من الغربال بقى يبقى اعمى!..منوراني لأول مرة ويارب ماتكونش الأخيرة :))
===========================
يوجينيا :يامراحب ..ألف مرحب يا جميلة ..متشكرة جدا ..والله هو ده السؤال مين اللي بيتبطر على الشغل!..ربنا يتولانا برحمته الواسعة ..منوراني

================

إحنا : منور يا أبو حميد ..هو ده طارق نور يع يع بجد!..تخنقه بس ..!..الله يخليك متشكرة على رأيك :)) انت ركبت القطر ولا لسه؟!ا
=====================

Lonely:
أولا يا مرحبا ..ثانيا عندك حق في حكاية التمثيل ويمكن كنت اتكلمت مع حد مرة في نفس القضية اللي طرحتها /طرحتيها ..يعني ياريتنا كمان بنعرف نمثل كويس ..معلش في ناس كتير بيحبوا المنظر الكذاب العيرة ..بس ده مش كل الشعب بدليل انك غضبان اهو! والتعليم في بلدنا عسل مالكش دعوة بيه ..ولا يهمك طول براحتك البيت بيتك..منور
=======================
لو كنت أعلم : انتِ اللي واحشاني يا دكتورة ..! ازيك ..وكيف اخبارك ..معذرة لقلة زياراتي انت عارفه المواصلات بقى :) ..تعرفي ان فكرة الحمار الحصاوي متكيفة جدا مع فكرة المستقبل لا مؤاخذة !..وياااي ؟..ليه بقى اجدع حاجة انك تعملي حاجة لمصر من غير ماتلوثي البيئة بعوادم القطارات ..وان كان على مخلفات الحمار وفري وهاتي له "كادليز دونكي"- ماركة مافيش كده عشان خاطر الحمار والمستقبل :))) ..منورة وكل سنة وانتِ طيبة :)) ا
Unknown said…
السلام عليكم يا مروة يا جميلة :)
صباحك سكر..
كل سنة و انتي طيبة يا مارو
عسى عيدك مبارك و كل ايامك سعيدة
و عساكِ من الفائزين و العايدين باذن الله
________

تعرفي يا مارو مرتبات العمال دول بتبقى كام؟؟
من 150-300 جنيه
و تعرفي يا مارو ان في سوق العمل خصوصا .. لو بدأتي غلط مش ممكن مسارك يتصحح؟؟
ربنا يصلح الحال

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي