Tuesday, February 26, 2008

الهروب.. بطولة "باسم" و"نرجس"!ا

الهروب.. بطولة "باسم" و"نرجس"!ا



طبعا لست بصدد الحديث عن الجزء الثاني من رائعة الجميل "عاطف الطيب" والبديع "أحمد زكي" "الهروب!" بأبطاله الجدد "باسم" و"نرجس" –على وزن بهية وياسين، وناعسة وأيوب!-، لكني مع الألم.. مع الغيظ.. أحتاج إلى ربابة كوسيلة للتعبير عن قضية فلكلورية –متعفنة لا مؤاخذة– وهي التعليم في مصر الذي هو صمام الأمان.. وأنبوبة إطفاء الحريق.. وطريق الإصلاح.. ويارب الصبر من عندك!.. التعليم.. ثم التعليم –خلاص يا حاجة عرفنا!- الطالب يجب أن يحب المدرسة –هذا ما درسناه– ويجب أن يحس بالود والتراحم والجو الأسري.. "أنا يا جماعة بيتي عند الكوبري.. وعندي مجموعات دروس خصوصية!"- على فكرة كنت في أولى إعدادي ومدرس اللغة العربية اللي قال لنا كده"بيتي على أول كوبري كفر الحصر!"ا

نرجع لـ"باسم" و"نرجس".. إحنا وصلنا مكان الحادث "مدرسة ابتدائية بالقرب من قسم شرطة!".. وجدنا طفلا متسلقا باب المدرسة بطريقة بارعة.. استوقفته "إنت يا ابني هتقع كده.."، ينظر لي ويبتسم بشقاوة.. "مش هيحصل حاجة" -بالمناسبة كانت الساعة الحادية عشرة صباحا!"- ووجدت طفلة صغيرة في الداخل تحاول تقليده.. "بتعملي إيه؟".. "عايزة أخرج!".. مافيش مدرسين؟.. - بالمناسبة لمحت بعض المدرسين من الباب على بعد!- أعود للفتى "إنت اسمك إيه يا عسول؟



"أنا باسم".. "الله.. اسمك حلو.. تعرف البنت اللي عايزة تطلع دي..؟.. آه دي أختي!.. قلت له "يا راجل أختك ولا صاحبتك في الفصل!".. ضحك قائلا "لا.. أختي".. اسمك إيه يا بنتي "اسمي نرجس..".. "الله وإنتِ كمان اسمك جميل!.. أنتم عايزين تخرجوا ليه؟.... "كده.. عادي.." -بالمناسبة الأطفال في الصف الأول الابتدائي والثاني الابتدائي!- كان "باسم" يحاول مساعدة "نرجس" على الخروج.. حتى وقفت على الباب من الداخل مبتسمة شبه محبطة –كما هو موضح في الصورة!- أما باسم فأخذ يستعرض قوته في "الشعلقة".. و"أنا نطيت من هنا قبل كده".. و"حطي رجلك على حتة الحديدة دي وامسكي كويس!".. ماشاء الله.. خبرة يا "باسم"!..ا



لم أستطع إحضار أحد المدرسين وحتى لم يكن هناك نفر أمن واحد على الباب!.. "نرجس" استسلمت للأمر الواقع وظلت بالداخل بينما انطلق "باسم" فرحا –على فكرة كانت صديقتي معي،خريجة تربية كانت تشجع الأطفال بالداخل "أنتم يا ولاد.. تعالوا اعملوا لها شنكل!" -موجودة محاولات الشنكل أيضا في الصور!-، طبعا لو كانت المدرسة عنصر جذب بالنسبة لهؤلاء الأطفال لما فكروا لحظة واحدة في الهروب.. وعلى رأي تلميذ ابتدائي سألته عن سبب الهروب قال: "أهم حاجة الأبلوات.. بيخنقونا وبيزهقونا!".. "باسم" ابتعد عن باب المدرسة.. تخيلوا ماذا كان رده وهو يودعنا عندما سألته عن وجهته؟ قال ضاحكا وملوحا بيده "أنا رايح لبابا الشغل!"..ا




على فكرة ممكن جدا يكون القفز خارج أسوار المدرسة جزءًا من التعليم التفاعلي، ومراس للحياة الديمقراطية، وخلق روح الموهبة والابتكار.. "كيف تقفز من فوق السور دون أن تنقسم دماغك كالبطيخة!".. هذا هو الإبداع، وتفتيح المخ.. هذه هي العبقرية.. هذه هي مصر.. على رأي د."عمرو عبد السميع" في حوار له عندما قالت فاتنة القنوات المتخصصة الأستاذة "سلمى الشماع": "مصر عبقرية الزمان والمكان.. "فلحقها الدكتور عمرو": "وعبقرية الإنسان.. التلاته مع بعض!".. يا فرحتي بعبقريتنا "المتشعلقة" فوق الأسوار!ا

---------------------

نشرت في بص وطل

21 comments:

مهندس مصري said...

الله يرحم التعليم
لما يزوغوا في الإبتدائي
حيعملوا ايه بعد كده

عاليا حليم said...

يا بنتى انبئك ان التعليم باظ من زمان
الله يرحمه و اولياء الامور بيعاملو المدرسين كانهم بقر شغالين عندهم فمابقاش المدرس ليه هيبته زى زان خلاص المدرس دلقوتى بيضرب يا ماما و بيتعاقب بدل التلاميذ

أسلوبك دايما بيجبر الضحكة على انها تطلع منى
قوليلى باه الامورة الى طالعة بضهرها دى باصة للباشا الى عايز يخرج من البوابة انتى ؟

لماضة said...

هييييييييه
ليت الشباب يعود يوما
:(

بطوط حبوب said...

اذا كان لا بد فاعلا فمن السور هاربا

اذا تعسرت عليك الامور فعليك بقفز السور

لو عايز من المدرسه تغور نط من السور

عيبك انك كنتى اكيد فى مدرسه بنات
مشفتيش الحكم الى على السور
هههههههههههههههه

مدحت محمد said...

عارفة
انا مرة عملتها فى ابتدائى بس منطتش من على السور
انا لاقيت باب المدرسة مفتوح فى الفسحة
قمت واخد بعضى وطلعت جبت شنطتى من الفصل
وطالع ماشى
طيب ايه السبب
اقلك
انا اعتقد السبب العيال مخنوقين
اشمعنى المدرسين اللى هما كبار بيتعبو ويتخنقو
وبينى وبينك مفيش تعليم فى المدرسة
كله بيعتمد على الدروس برة
اقلك حاجة انا ابن عمى دايما يقلى
هو ثانوى عام
المدرسة دى والله بتعطل الواحد عن المذاكرة
يعنى مبقاش ليها اى اهمية
تحياتى

همس الاحباب said...

ولا زمان يا مدارس
احنا كنا بنعملها فى ثانوى بس
بس ابتدائى صعب شوية
ولسه بكرة يزوغوا فى الحضانة كمان
عليه العوض ومنه العوض فى التعليم
تحياتى خالد

بذرة امل said...

جميل يامروة عرصك للمشكلة

مبدعة كعادتك
ربنا يجيبك بالسلامة لينا
مستنين تقارير كتير

عاشقة الوطن said...

السلام عليكم

ازيك يامروة
وحشانى ياجميل

الهروب من المدرسة
انتى عارفة ان ده الشئ الاساسي اللى الاولاد ممكن يكونوا بيروحوا المدرسة عشان يعملوه
اصل ببساطة كده التعليم بيعمل ايه فى الأطفال من اول ما يدخلوا لحد ما يخلصوا ويسيبوا التعليم ويشموا
مفيش طفل بيستفيد بحاجة غير انه بيضرب وان التعليم بقي يدوبك على قد حشو الراس بالمعلومات ويدخل الامتحان يرجع اللى حشا بيه راسه ودماغه فضيت بعد كده
هل فيه مدارسين بيشجعوا الطلبة وبيقولوا لهم برافو
فيه مدرس بيقول للطالب انت غلطان بس بطريقة حلوة تخلى الطالب نفسه يقول لازم أقلد مدرسي عشان بيعاملنى حلو حتى لما بغلط بيقولى انى غلط بطريقة كويسة ويخلينى انا اللى مكسوف من نفسي

انا فى الكلية السنة ديه مثلا فيه عندنا دكتورة والله انسانة جميلة جدا
فى مرة بقولها أحلى حاجة فى حضرتك اننا بنستفيد بجد وبنتعلم منك
قالتلى اهم من انك تتعلمى معلومة وتستفيدى منها بعد كده اهم حاجة انك تتعلمى ازاى تراعى ضميرك فى شغلك وانك تعملى اللى عليكى وتحاولى تخلى غيرك يستفيد منك ويستفيد من اى حاجة بتعمليها وتراعى ربنا فى شغلك

متعرفيش الدكتورة ديه فرقت معايا اوى لاسنة ديه
وعلى فكرة هى للاسف اول مرة تدينا السنة ديه
وهى كبيرة مش صغيرة
بس حببتنى فى التعليم والكلية على اخر سنة
وانا بودع التعليم وبقوله سلام
بس حبيت التعليم بجد وبدأت اذاكر احسن من الاول وبقول ياريت المذاكرة ديه كانت من اول سنة

المفروض يكون فيه اساس فى التعليم واساس تحببي الأطفال والطلبة فى التعليم

مووضعك مهم جدا جدا يامروة ومثير وعاوز كلام كتير ومناقشات اكتر

معلش طولت عليكى
بس انتى مننا وعلينا ياجميل

تحياتى ليكى وطمأنينى عليكى

سلاااام

appy said...

صباح سعيد عليك يا فندم
هههههههههههههههههههه بجد موتينى من الضحك هو المفروض التعليم يبقى ارقى من كده فى مصر والمدرسين يراعوا اكل عيشهم بس تقولى ايه فى سياسه تكبير الدماغ

أنا إنسان said...

الهروب للجدعان
الهروب للتلاميذ
انا مش عارف
بيتهايألي ده تريب علشان لما يكبروا يهربوا من مصر

حمامة said...

رحمة الله على التعليم
ده مات وشبع موت وتحلل كمان
اقول ايه بس حسبى الله

دعاء عمرو said...

الله عليكى يامروة إية يابنتى التحافة دى هو إنتى كنتى متفقة مع العيال يهربوا وتصوريهم ولا إية ههههه إستمرى ياقمر وإبقى ربنى ياشرقاوية

rainbow said...

الصديقة الدستورجية الصميمة

ارى جوانب الصحفية تتألق فيكى هذه المرة موضوع بالكلمة والصورة والتفاعل مع الاطراف كمان

الموضوع فى حد ذاته صحفيا رائع .. لكن على المستوى الانسانى مؤلم جدا .. كنت اقرأ بقلب حزين اشرات المستقبل الغريب لهؤلاء الاطفال

الاعجب اننا سبقناهم على نفس الدرب من تردى التعليم ولا نزال نعاند ونحاول الحياة والنجاح فهل تعليمنا يزرع الهروب وفى نفس الوقت روح المغامرة والعناد ام انها اوهامى ؟؟!!!!!0

موضوع رائع مرة اخرى

عميق تحياتى وخالص مودتى

هدى

سلمــــَى said...

قصه جميله جدا وما شاء الله بالصور كمان ،،،
عجبتنى جدا والله فكرتنى باللى بيحصل فى المدرسه اللى جنب بيتنا ههههه ،،
لا حول ولا قوه إلا بالله ،، فعلا حال التعليم فى مصر بجد لا نحسد عليه ،،،
عجبنى الأسلوب جدا ،،
جزاكِ الله خيرا
وفقك الله

micheal said...

عندي سؤال
هو احنا كنا عيال قبل كده؟؟
:)
تحياتي

فزلوكة said...

يا بنتى سور المدرسة إتعمل عشان كده أصلا

المهم خلينا فى الموضوع
بصى يابنتى البداية من المعلم
وفقط

هبة المنصورى said...

صباح الورد
ليا سؤال
أنا فين من صحبة الورد؟
:(

أنا قلتلك قد ايه باحب الصور
صح؟
تصورى إنى موصيه واحده صاحبتى طنطاويه على صور
عارفه لمين؟
لأبو قردان
آل بتشوفه كتير ف غيطان الرز اللى بتبعد سنتيمترات عن بيتهم
باحقد عليها أوى

بصى يابنتى التعليم فى تدهور
حاجه تفرح لما يجيلك ربع عدد الطلبه ف المجموعه ويقولولك أصل احنا بنيجى مخصوص والنهارده الخميس! معرفش ايه علاقة خميس بالموضوع الحقيقة! وعلى فكرة كانت سنة رابعة تعليم أساسى..يعنى سيادتك اللى هيبقوا مدرسى باسم ونرجس فى المستقبل القريب.. واضح إن احنا لازم نقبض على خميس! هو اللى ورا فشل العملية التعليمية

سندريلا said...

بجد تححححححفة زى السكر حتى الاطفال لا بجد ربنا بستر

مروة جمعة said...

وحشوتني..

مهندس مصري: سعيكم مشكور يا باشمهندس!.. هيعملوا ايه يعني هيزوغوا على إيطاليا طبعا!.. منور

******
عاليا حليم:صباح العندليب يا لولو.. سعيكم مشكور انتِ كمان في التعليم!.. أنا كلية تربية وعارفة!.. الله يكرمك يا عاليا.. عارفة الأمورة دي عشان هي أمورة فهي صديقتي الأنتيم بالقوي.. مشمشة:)- أنا اللي كنت باصور!- عارفة والله ما تقوليش زي العسل زي ما أنتِ ملاحظة!-منورة يا لولو..

****************
لماضة:يا حبيبتي يا داكتورة هو أنتِ كان شبابك كده؟.. طيب توكلنا على الله نعمل أنا وأنتِ فيلم شباب امرأة في الإبتدائية.. بس خسارة صلاح أبو سيف الله يرحمه!ا
***************
بطوط:آه والله يا محمود تصدق!.. كنت في مدرسة بنات بس كنت بشوف المدرسين وهما بينطوا!ههههههههه منور يا بطوط
**************
مدحت محمد:آه يا عم مدحت!.. وجعني كلامك.. هي دي مدارسنا وهو ده تعليمنا وإنما الأمم الأخلاق ما بقيت.. يا مين يحكمني على التعليم فيكِ يا مصر!.. المدارس هتتهد ويتبني مكانها ساحات شعبية للعب الكورة.. أنا عايزة مصر أهلاوية!.. صلاح مصر من التعليم يا مدحت.. والمدارس محتجة اعادة تأهيل وإصلاح.. منورني بزيارتك الأولى
*************
همس الحبايب: يا أهلا يا خالد.. والله معاك حق.. عليه العوض ومنه العوض.. كنت بتهرب في ثانوي.. ايه القدوة الفاشلة للمدونين دي!.. أنا أعرف مدونين من ايام حضانة!.. ياللا عُذرك إنك من جيل العبور يامة المستقبل! منور

***************
بذرة أمل: الله يسلمك يا قمر.. آديني عُدت بلا تقارير.. ربنا يسهل:).. شكراً على ذوقك..كنتِ واحشاني.. دلوقتي خلاص بقى بقيت اتصبح بوشك العسل!.. صباحك ورد
***************
عاشقة الوطن:وعليكم السلام ورحمة الله وبركاته، والله وحشتيني يا رضوى.. إيش حال وإحنا في جامعة واحدة والكلية جار الكلية؟.. أنا بادخل المدونات لكن مكسلة في التعليق ومقصرة معاكم كلكم.. كلامك زين.. يااااه لما تلاقي النموذج ده امسكي فيه بإيدك وسنانك- بتغسليهم بكلوز آب؟!- بجد حاجة بديعة لما تلاقي قدوة في المكان.. مش مهم انها في آخر سنة.. المهم إنك لقيتيها.. مبروك يا بلدياتي:).. إن شاء الله أشوفك قريب..
***************
آبي: صباح سعيد شريف زي العسل وزي الفل عليكِ.. آه يا نافوخي ياني.. مش باحب كلمة أفندم دي أرجوكِ يا جميلة باحس اني شوية وأنادي على"كتخدة"بيه التابع بتاع "محمد علي باشا!".. الله يكرمك يا قمر.. انتِ هتقولي على تكبير الدماغ.. ربنا يرحمنا برحمته.. منورة يا سكرة
*************
أنا إنسان : الله ينور عليك! لسه قايلة الكلام ده لمهندس مصري!.. ربنا يكفينا شر البروفات دي!.. منور
***********
حمامة: بتعليقك ده أنا حسيت اني في صوان بلوجر التربوي أتلقى عزاء جيراني من المدونين في المدعو تعليم!.. سعيكم مشكور.. ربك قادر يبعثه من جديد.. منورة
**********
دعاء عمرو: يا أهلا وسهلا بالناس اللي أنا مطنشاهم!..هههههه بجد انا مقصرة مع الكل ودماغي قد كده!.. انا كنت معدية صدفة بجد هههههههه كان يوم!.. منورة يا دودو ويارب أقدر أعمل حاجة في تقصيري اللي ناس فعلا زعلوا مني وانا مش قصدي!ا
*********
قوس قزح: صديقتي الدستورجية الجميلة هدى.. الله يكرمك على كلامك الجميل.. هو فعلا مؤسف ومؤلم أن تقرأي إشارات غير مبشرة بالمرة للمستقبل الباهر!.. التعليم؟.. هو في تعليم؟.. ربنا يرحمنا ويرحمه..صباحك ورد

********
سـلمى: شكراً.. شكراً، وجزاكِ الله خيراًوبراً.. الله يكرمك ويوفقك، التعليم في مصر معلق خرزة زرقا من زمان!.. منورة يا سلمى
*******
مايكل: هو إحنا كنا عيال قبل كده؟.. تقصد هو إحنا كبرنا لسه!.. تحياتي:)
******
فزلوكة: فعلا فزلوكة!.. البداية من المُدرس.. وتعالي اتفرجي على كليات التربية.. تربية بجد!.. منورة
*********
هبة المنصوري: منورة الفضاء البلوجري يا هوبة.. صباحك فل وورد وياسمين هندي:).. هو انا مش حكيت لك؟.. القائمة بالكامل طارت وأنا كنت بحاول أجمعها والله مش قصد يا هبة!.. أنا عارفة انك بتحبي الصور ولسه فاكرة تعليقك على الموضوع في بص وطل.. اممممم خميس؟ انتِ هتقولي لي على طلبة التعليم الأساسي والعام اللي أنا منهم!.. ده احنا قدوة بالجامد!.. ربنا يكون في عونك والله قلبي معاكِ- حطيه في علبة قطيفة من فضلك!- وبعدين أنا باحب يوم الخميس جدا جدا.. يمكن عشان اتولدت فيه.. يمكن لحاجات كتير.. لو قبضتي عليه هآجي براحتي بقى.. جمعة!.. منورة يا جميلة وماتحرميناش من طلاتك الحلوة..

*************
سندريلا: ربنا يكرمك يا جميلة.. بجد ربنا يستر معاكِ حق!.. منورة المدونة

عصفور طل من الشباك said...

لا تعليق

أنا حتى مش لاقية كلام أقوله

will said...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣商品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣,情趣商品,自拍,UT聊天室,聊天室,豆豆聊天室,哈啦聊天室,尋夢園聊天室,080聊天室,080苗栗人聊天室,H漫,A片,AV,AV女優,A漫,免費A片,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,SEX,微風成人,嘟嘟成人網,成人,18成人,成人影城,成人圖片,成人貼圖,成人圖片區