- -1وخايفة لما نسافر على الوادي الجديد!ا
(1)
وخايفة لما نسافر على الوادي الجديد!ا
منتخب تربية الزقازيق القومي مع الشهادات.. أنا كنت باصور!ا
سأبدأ البداية الطفولية التي اعتدت أن أخفيها في بعض الأحيان.. "الحمد لله.. أنا فرحانة قوي.. فرحانة جدا يا جماعة.. ومدغدغة ومتفشفشة جدا!".. رغم القلق الطبيعي الذي غمرني ونحن في الأوتوبيس "أول مرة في معسكر-مهرجان ثقافي فني لكليات التربية-.. أول مرة أسافر 12 ساعة(الوادي الجديد).. أول مرة أقيم في مدينة طالبات مغتربات- لها حكاية-.." أول وأول..قلقة.. وللقلق طعم آخر خاصة عندما تسافر وأنت تعلم أن من وراء ظهرك من يبشرونك بالفشل المبكر كالسنوات السابقة – فيما يتعلق بالثقافي- ومن يضحكون على قدراتك ويضعون أمامك العقبات.. (مافيش فلوس في الكلية.. مافيش أتوبيس..)..، "ويا ترى بتعرفي تقولي شعر زي محمد الجارحي؟!"- الزميل محمد الجارحي الصحفي في الدستور كان زميلا في تربية الزقازيق "قسم إنجليزي كمان!" وله صولات في أنشطة الكلية والجامعة- "طبعا أنا مش زي محمد الجارحي.. كل واحد له لون!".. مدام شادية من وراء نظارتها وبلا مبالاة "مروة؟ لا..لا.. مروة دي
عادي!"- وأنا فعلا عادية لكن لست بهذا السوء، الثقة بالنفس حلوة!ا
زميلنا " محمد- أفلاطون" يوعد الفريق بالسفر- عيب جدا تربية الزقزيق تكون من المساهمين الأوائل في قيام المهرجان ونجاحه وتعتذر- الدكتور المسئول عن التقييم يجمعنا في مكتبه بقسم أصول التربية.. "فين الزجل والشعر؟".. يتقدم "بدر وفوزي" ويلقي كل منهما قصيدة.. أراقب الدكتور- الذي رغم كل هذا أقدره جدا- أجده يعبث ببعض الأشياء على مكتبه.. يلتفت لهما.." عايزكم تقولوا لي الصور الشعرية الجديدة؟".. كل يجتهد في إخراج الصور الجديدة.. ينظر الدكتور بنصف ابتسامة" أيوة.. كويس.. كويس"، يتقدم محمد أفلاطون بالزجل "أمشي وأنا في سن الصبا.. أمشي ومافي ع الطريق حدا".. ويحكي عن عم "سيد" الغفير"حارس بوابة بلدنا (الشرقية)".. الدكتور لا يعلق ولا يناقش-
بالمناسبة القصيدة فازت بمركز!ا
وجاء الدور علينا.. الدكتور كان يعرفني مسبقا من محاضرات "التربية والمشكلات" في العام الماضي.. "إزيك يا مروة.. أخبار الكتابة إيه؟".. "الحمد لله يا دكتور تمام.." صدمني بسؤال محى ابتسامته الودودة بمحلول "كلوروكس" مركز.. "ويا ترى بقى إيه هي إنجازاتكم بالنسبة للثقافي؟!".. يا نهار أبيض.. إنجازات مرة واحدة!"بنيت شوية في الأهرامات.. وعملت مشروعات سكنية لشباب المثقفين!".. قلت له "هو لازم إنجازات.. إحنا حققنا مركز في مسابقة الدوري الثقافي التيرم الأول".. "طيب هسألك سؤال اتسأل لابني اللي في أولى ابتدائي وجاوبه صح على فكرة "- الله أكبر على الكلام وعلى الأسئلة المعلقة على مشانق التعجيز!- "ليه الطيارة فيها أربع محركات؟!".. فكرت وقلت "عشان مش معقولة الأربع محركات هيشتغلوا أكيد في احتياطي.. صح كده؟!".. التقطت "هناء" الخيط مني "يا دكتور اتنين هيشتغلوا واتنين احتياطي".. ينظر إلينا مبتسماً "كده صح.. مضبوط.. بس أنتِ يا مروة مش جاوبتي بالضبط!".. أسأله "طيب حضرتك عندك أسئلة ممكن نطلع عليها؟".. يجاوبني" أيوة... عندي كتير.. كتير جدا.. بس مش على الكمبيوتر هنا.. في البيت!".. علمت بعدها أن هناك تقرير رُفع لعميد الكلية ذكر فيه أن الفريق الثقافي دون المستوى.. أخبرنا
"أفلاطون" بهذا التقرير بعد انتهاء المسابقة وبعد النتيجة.. أهو هم دول الثقافي اللي دون المستوى!".. ياااه الحمد لله..
بعدما خرجنا من مكتب الدكتور.. استقبلتنا الأمطار.. دعوت الله تعالى في سري "يارب إن كان هذا السفر خير.. سهل لنا الأمر ونسافر".. وجدت إتصالا من "بكار" في العاشرة مساءاً- التوقيت وليس برنامج منى الشاذلي طبعا :)– "أنا بتصل عشان أأكد الميعاد.. جهزي حاجتك، بكرة الساعة عشرة إن شاء الله".. استعنت على الشقاء بالله.. يا معين يارب.. ربنا يستر
Comments
أحب اعرفكم بنفسى انا / أيمن العــــــراقى ..احد اعضاء الفريق اللى فى الصورة .احب اقولكم ان احنا قابلنا صعوبات كتيرة اوى بخصوص المشاركة فى المهرجان وبفضل الله اتغلبنا على كل الصعوبات .ورحنا الوادى وكانت المسألة ادمنا مسألة عند. وبفضل الله أولا,وبفضل الدكتور/ محمد عبد المنعم(رائد الفوج)والاستاذ/محمد عبد العظيم,والمدام/نعمات(مشـــرفين),بالاضافة الى مجهود الفريق العظيم استطاعنا تحقيق اعلى المراكز وابقينا مكانةالجامعة فى درجتها العليا,وعندما عدنا لما نلقى بالا او أى اهتماما من رعاية الشباب ,وهذا لايهمنا .المهم اننا رفعنا رأس الدكتور اللى تعب اوى علشان خطرنا .وكلنا ندين للدكتور محمد عبد المنعم بكل الاحترام والتقدير.
ايمن العـــــراقى
فى انتظار بقيت الاحداث
ربنا يستر
اكيد فزتوا بمركز ولا لسه هتفوزوا
البوست ده ليف نقوم نصلى ركعتين وندعى لكم
ولا قديم نقوم نصلى وبس
هههههههههههه بتكلم بجد
وعلى فكره انتى متسجله غياب فى اخر بوستين لى
حلو أوى الجو ده
عارفه! ساعات باحس إن سنين الجامعه دى ضاعت كده معرفش إزاى
كان لنا نشاط محندأ على مستوى قسمنا بس.. ياااه كانت أيام حلوه أوى
سفر وصور وضحك وظأططه
باحب طريقتك ف الحكى
باحس إنى قاعده معاكى وباسمع
هاه وبعدين؟
عامة حمدالله على السلامة ومبروك الانجاز والتفوق
وفى انتظار المزيد
تحياتى
انتم كنتم فى مسابقة يعنى دى المفأجاة صح
انا بخب المسابقات
بس انا شايفة ان احلى حاجة انكم سافرتم الوادى الجديد انا بحب السفر ونفسي ازور طبعا العالم كله بس دلوقتى على الاقل محافظات مصر كلها
واللى فهمتم انكم خدتم مركز عموما الف مبروك
سلام
انتى مش هتكملى الجزء التانى
لانى ايمن حكى
بس الف مبروك
وعلى فكرة انا عاجبنى اوى الدكتور من خلال كلامكم عنه
تحياتى
وبتصقل الشخصية
سعيده انك انسطى
بالتوفيق دايما
الف مليون مبروك ليكى ولكل اللى ف الصوره
دايما منصورين كده ابطال الشرقيه
احسن وحوووووووووووووش
مش عايزة أقول غير كده
على فكرة يا ريت تعملي حسابك نتقابل على نص 4 عند هبة في المنصورة
المرة الاولى عشان فوزتوا بالمركز الاول
والمرة التانية عشان نجحت بتقدير عالى
الف الف مبروك عقبال لما ناخد الليسانس
نستنى باقى الاحداث بقه ان شاء الله
تحياتى \حسام يحى
لا تبتعدي كثيرا
انا حاسس ان انا اللي هاسافر
اسلوبك جميل
مستني اللي حصل
:)
ليه الطيارة ليها 4 محركات؟
وبهذه الإجابه التلقائية
وبرغم الجو الماطر والإعصار
استجاب الله لدعائك
فالنسأل الله اللطف فيه
انتظار بقيةالاحداث وعلى فكرة احلى حاجة فى الجامعة بجد ممارسة الانشطة
ربنا يوفقك
انا ذهبت الي الوادي الجديد...تجربة كانت جميلة و مثيرة.....الحقيقة
احببت الوادي الجديد.
بالنسبة للمسابقة...انتم كلية تربية
علي حد فهمي من الموضوع...يعني الدكتور
كان يفترض ان يقول لكم ان المكسب و الخسارة امر وارد و طبيعي لانه لا يوجد
من يفوز دائما و لا من يخسر دائما..
انما الاهم ان نأخذ بالأسباب و نستعد
و الباقي علي الله....
يارب تكونوا حققتم نتيجة مرضية و استمتعوا بوقت جميل في الوادي الجديد..
و اشتريتي تمر هههههههه.
تحياتي و تقديري
مغامرات بنت بطوطة فى بلاد القوطة
هل من مزيد
بكرة ف نفس المكان اشوف باقى المغامرات
ممكن
يا سارق ياء النداء من حروفي
لماذا أنت مرتبك ؟
نعم أعنيك أنت
ادعوك للإنضمام للفكرة
فانت وحدك .. ذلك الذي لم يأت
هذا طريق لم يكن يعرفه احد
و لا يعرف احد
طريق لم تعرفه اقدام المارة
و لم تدنسه من قبل عجلات سيارة فارهة وقودها من عرقك و دمي
تعالي معنا و املأ الدنيا بالضجيج
نظرة على اسرار اون لاين لن تضيرك
و مشاركتك تأكد انها مصدر سعادة لنا
http://asraronline.com/vb/
ذوقك راقى دايما
و موضوعاتك و حواديتك حلوة و دمها خفيف ، يا شتى ما تخفيش البداية الطفولية كلنا عيال
هههههههههههههههه
بس نسيتى تذكرى ان القلق طعمه خاص برده لما يكون وراكى ناس فى البيت قعدين بيحسبولك بالثانية
الله يكون فى عونك واضح انه كان يوم صعب ، عمرى ما جربت معسكرات قبل كده
مبروك على اللى انتو عملتوه
وان كنت كطالب ثانوية عامية
مش فاهم ايه هو بالضبط
تحياتى
الف مبروك يا ميرو
والله العظيم فرحتلك جدا جدا يا اجدع شرقاويه فى الوطن الشرقاوى
وعايزين نعرف بقية الحكايه لانى متاكد انك هتحكيها باسلوبك الرائع المعتاد
باركيلى عملت الحلقه التانيه فى المسلسل
الف مبروك مره تانيه
وعقبال ما اباركلك يوم فرحك
تحياتى اليكى يا ميرو
كانت خدعه ولا ايه
ممكن تبصى على مدونتى ...انا لسه عملاها ..و عايزة اجمع ناس حلوة كتير زيك
http://wa7di-ofakker-137.blogspot.com/
فكرتيني لما كنت في المهرجان الثقافي في الفيوم
برضه أول مرة أروح الفيوم
ورحت لوحدي
مش عارفلها أول من آخر
بس الحمد لله اتسترت
بالنسبة للإنجازات
أكيد كسرنا الدنيا
ماخدناش ولا حاجة
المسلسل ده بييجى امتى؟
كل شهر حلقه ولا ايه؟
أيمن العراقي: يا مرحباً يا صباح الفل والزمالة.. إيه يا عم التعليقات الحلوة دي؟.. الحمد لله فعلاً ربنا كرمنا وفعلاً أنا فرحانة عشان الدكتور السكرة ده.. منور المدونة يا زُمل
*****
لماضة: الحمد لله.. ربنا يستر يا لماضة يا مشغولة:)
*****
بطوط حبوب: دكتور بطوط هنا!.. إزيك يا محمود؟.. قوم صلي ركعتين وادعي لنا رغم انه مش لايف ولا حاجة:).. صباحك ورد
******
هبة المنصوري: وحشتيني جداً يا هبة!- تصدقي اني ندلة لأن المسلسل كسلت أكمله لأني كنت في طنطا وشوية كآبة كده!- أنا برضه باحب الجو ده يا هوبا، فعلا هي سنين بفوت هوا!.. حاضر هقول وبعدين:)
*******
همس الأحباب: الله يسلمك.. ربنا يخليك، منور
*******
ياسمين: صباح الفل يا ياسمينة.. كانت مسابقة كركبة أعصاب.. حاجة عسل خالص!.. الحمد لله أخذنا مراكز.. كنتِ تعالي معانا وكنت هضبطك:).. منورة، إزي كفر الشيخ والمنصورة؟
******
مدحت محمد :ليه بس يا مدحت! هكمل إن شاء الله.. أيمن باشا مش حكى كل حاجة:)الله يبارك فيك.. فعلا هو دكتور زي العسل بجد ربنا يحفظه
******
نيرفانا:أنا سعيدة بتشريفك أرض مدونتي:).. كلامك تمام فعلا التجارب بتدي أبعاد تانية للشخصية و خبرات وذكريات حلوة.. منورة
******
د/ أجدع بنوتة: الله يباااارك فيكِ يا أجدع بنوتة شرقاوية عسولة:).. حلوة وحوش دي!.. منورة يا بلديات
******
عصفور طل من الشباك: يا خبر أبيض وملون بالورد البلدي!.. رحاب بنغسها طلت على مدونتي.. أنتِ كمان وحشتيني جدا يا قمر.. يارب تسمح الظروف وأقدر آجي وأقابلك في المنصورة إن شاء الله.. المهم أخبارك إيه؟.. طمنيني..
******
بذرة أمل: الله يبارك فيكِ يا نسمة يا قمر.. عقبال ما ناخد الليسانس إن شاء الله.. يارب
******
حسام يحيى: منور يا صوت الحرية.. بجد والله اعذرني أنا ماكانش ليّ نفس أفتح المدونة بتاعتي أصلاً!..منور
******
عبد الرحمن فارس: منور يا عبد الرحمن مدونتي للمرة الأولى:).. حاضر إن شاء الله هحاول ألا أبتعد كثيراً
:)
*******
المفقوعة مرارتها: أنا حاسه ان مرارتك اتفقعت أكتر وانتِ بتقولي وبعدين لأني غبت كتير عن المدونة!.. منوراني للمرة الأولى ويارب ما تكونش الأخيرة:)
******
أنا إنسان: منور يا أستاذ.. بجد أنا خايفة تقرأ باقي الحلقات تحس انك مش عايز تسافر من كتر الملل!.. منور يا إنسان.. ومتشكرة جداً
:)
******
الملاح التائه: شفت يا عم الأسئلة!.. وبرغم الجو الماطر والإعصار فعلا على رأيك ورأي عبد الحليم!.. منور يا ملاح المدونة عارفة اني مقصرة في زيارة مدونتك.. سأحاول علاج التقصير:)
*******
موناليزا: منورة يا جميلة.. حاضر هكمل إن شاء الله، وعندك حق إن أجمل حاجة في الجامعة هي ممارسة النشاط.. بتخلي الواحد عنده خبرات أكثر..
*******
أبو أمل: حلوة جداً بنت بطوطة دي:).. آسفة جداً لأني اتأخرت بجد..
منور المدونة.. تحياتي
******
أمين سر: حاضر.. سوف أحاول المرور.. شكراَ وجزاك الله خيراً وبراً
*****
عاليا حليم: صباح العندليب يا لولو!..آه والله يا عاليا انتِ بتقولي فيها على البيت!.. بجد ميرسي متشكرة انتِ اللي ذوق يا عاليا.. نفسي أشوفك بقى!.. منورة
******
واد غلبان: الله يبارك فيك يا جميل وربنا يعينك على الثانوية العامية:).. منور المدونة
*******
صالح سعيد: يا أهلا بأجدع مواطن في الوطن الشرقاوي!.. الله يبارك فيك يا صالح يا جميل.. مبروك مبروك على الحلقة التانية.. الله يبارك لك يا بلديات، شكراً.. يارب فعلا الحلقة التانية تطلع حلوة:)
*******
pinkyrose
الله يخليكِ.. تسلمي يا قمر:)، حاضر إن شاء الله هشوف مدونتك وهتكون حلوة زيك كمان إن شاء الله.. صباحك ورد
********
مصطفى السيد سمير: يا أهلا بيك يا شاعر..الله يسلمك، المهم انك رحت الفيوم واكتسبت خبرة جديدة مش كدة ولا إيه؟.. الفيوم دي حكاية يا مصطفى والله، ناسها غلابة جداً.. ما علينا.. عقبال ما تحقق مراكز في مهرجانات تانية:).. منور
*********
جنة:منوراني يا قمر.. ربنا يخليكِ، يارب ما تكون المرة الأخيرة.. صباحك ورد