الهدية

كل سنة وبريد الغلابة طيب 2


الهدية! ا




جميل جداً أن يتذكرك أحد في وقت لا تتوقعه مطلقاً.. ألهذا السبب أحب أغنيتي "حاول تفتكرني" لعبد الحليم، و"فكروني" لأم كلثوم؟!!ا


**********



كنت أحدثه عن أن الله قد يبعث للإنسان منا بهدية في وقت لا يتوقعه.. وإنه مهما طالت الأزمات، ومهما رأى الدنيا مقطبة له بحاجبيها الكثيفين – زي أبو جهل في الأفلام القديمة كده!- .. طالما ظل قلبه متشبثا بأبواب السماء المفتوحة الذراعين دائماً.. فهناك أمل وهناك مفاجآت وهدايا، كما أن هناك صدمات أيضاً تزيد الحياة حلاوة وبهجة! ا


كنت حقيقة متحمسة وأنا أقول هذا الكلام..كنت أناقش باقتناع شديد وإصرار على رأيي..كنت عندما أقول هذا الكلام لمشيرة، نسمة، أمل، أو دعاء، أتلقى تقريباً ردود فعل واحدة.. ابتسامة وجملة "أنتِ يا مروة بتحلمي كتير".!ا



الطريف أن عشية قولي لهذا الكلام تحدث لي أزمة!- كانت أزمة وليدة اللحظة-.. يا أهلاً بالأزمات.. يا فارج الغمم يارب.. افرجها من عندك يا كريم، ابسطها يا باسط.. ولم أتذكر كل الكلام الذي قلته لـ "محمد" في الصباح!.. والذي ربما أخذه على محمل أنه "مجرد كلام والسلام.. أو مجرد برقية تعزية قصيرة لا طعم ولا لون ولا رائحة.. وأنه عليه الإنتظار كثيراً مثل مصر كلها- رغم أنه شخصية طيبة ومتفاءلة- حتى يحصل على الهدية!".. لا أدري كيف استقبل كلامي في الحقيقة!.. لكن المُدهش أني كنت نسيت أني قلت هذا الكلام في الصباح عن اقتناع وأنا تحت البطانية أفكر في أزمتي.. حتى غلبني النوم والتعب..


أصحو قبل الفجر- فجر الأربعاء- بدقيقة واحدة على صوت منبه التليفون المحمول، الساعة الرابعة وأربع دقائق.. وجدت إشارة برسالة جديدة على التليفون..بينما صوت المبتهل - لن أنسَ اسمه- "علي الزاوي" في تلك اللحظات الفاصلة قبل الآذان "الصلاة والسلام عليك يا رسول الله" من مسجد سيدنا الحسين رضي الله عنه- يا سلااااام على العلامات على رأي باولو كويليو-.. أفتح الرسالة مع آذان الفجر.. من زميلي العزيز "محمد الجارحي"..".... أول حاجة تعمليها الصبح تشتري الدستور الأسبوعي.. بلال فضل ومحمد هشام عبيه كاتبين عنك كلام حلو قوي".. اعتدلت في فراشي، أغلقت الرسائل بالكامل.. وقلت "مين؟ بلال فضل!.. محمد هشام عبيه؟!.. محمد الجارحي! هو أنا باحلم؟.. آه يا ظهري.. آه يا دماغي!"ا


أعود وأفتح الرسائل.. إنها حقيقة!.. الحمد لله.. الحمد لله..
هدية من رحم السماء في وقت من أشد أوقات الدنيا طهراً وبراءة.. يااااااه على المفاجأة عندما تكون غير متوقعة وغير محسوبة..
إنها الهدية التي كنت قد تكلمت عنها إذن!
ا
صحيح إن الموضوع ليس بهذا الحجم.. لكني فرحت جداً..



ياااه.. عم بلال فضل طلع فاكرني!.. ياااه على الكلام الجميل يا محمد هشام عبيه!- ربنا يخليك يا أخي ولا يحرمنا من كلامك الحلو نحن معشر الشراقوة!.. ا



ذهبت للجامعة راكبة أوتوبيس المحافظة المتهالك.. كان ولا الأوتوبيس السياحي المكيف.. رغم إن "الجيبة" الحلوة الأمورة نالها قطع لا بأس به.. ورغم إن ساقي حدث بها تقريباً التواء من الجلسة الغريبة التي جلستها في "ميكروباظ" المحافظة.. إلا أني كنت راضية- للمرة الأولى- عن "الربع جنيه" الذي دفعته أجرة!ا


دخلت الكلية....
كانت غرفة اتحاد الطلاب بها بعض الطلبة الذين ليس لهم علاقة بأي شئ.. يااه هو مين بلال فضل؟!- أخذت أشرح لهم بلال فضل، بلال فضل يا عالم.. فيلم "واحد من الناس"و...... نظر لي هذا الزميل "المستفز" نظرة تشبه كثيراً نظرة الممثل الكلبوظ جداً، "غزال" الذي كان يعمل حانوتي غبي مع إسماعيل ياسين في فيلم "حماتي ملاك".."انت أكلت الزبون يابن المفجوعة؟ ... والنبي ما أنا يا معنمي.. دي منبى.. منبى يا معنمي!".. ثم قال بنفس النظرة "تقريبا.. آه..ً دي أفلام ركيكة!"
ا



محمود "بكار" أمين اللجنة الثقافية فرح جداً.. وقال ضاحكاً "ياااه بلال فضل!.. وياااه؟ مروة.. مروة ولاّ تشابه أسماء!".. "لا يا محمود.. والله؟.. مروة.. مروة!".. نسمة كانت فرحانة أكثر مني! وأمل كانت كذلك، "ألماظ"أيضاً فرح جداً.. بعد أن خرجت من غرفة الإتحاد وأثناء تمشيتي في "كوريدور" الكلية قابلت مجموعة أخرى، كان أولهم محمد "أفلاطون" الذي أخذ مني الجريدة متسائلاً.. هو فيه إيه!.. "ما فيش يا ريس!".. عندما قرأ الكلام الجميل الذي كتبه محمد هشام عن الشراقوة، قال قارئاً ومبتسماً- ربما في أمل- "مروة جمعة وصالح سعيد وعمرو الطاروطي وقريباً- إن شاء الله- أفلاطون"! هل تذكر حكاية الهدية؟!ا


*****************
كل سنة وحضرتك طيب يا عم بلال.. "دماغ الصفحة الأولى" "شكراً على كل هذه البهجة!" ا
كل سنة وأنت طيب يا محمد هشام عبيه.. دمت أستاذاً وأخاً وأباً – حلوة أباً دي!- وصديقاً لكل القراء البسطاء
أمثالي- على فكرة لم أهاجر الصفحة لكنها ظروف!-!ا
كل سنة وأنت طيب يا محمد عبد الله يا رسام يا موهوب.."شكراً على كلامك الحلو"ا
كل سنة وأنتِ طيبة يا دعاء العدل يا أجمل رسامة.. "دمك عصير قصب يا دودو بجد!"ا..

وكل سنة ومدونتي طيبة.. يااااه سنة تدوين!عرفت فيها ناس من أجمل ما يمكن، ربنا يخليكم ويسعدكم

.. من حسن حظي أني بدأت التدوين في العيد السنوي لصفحة رأي.. شقتي الصغنونة المحندقة في بلاط صاحبة الجلالة !ا

كل سنة وكل الدنيا حلوة
ومصر تنتظر حتماً هدية ما.. يارب عن قريب!
ا

دعواتكم لي جميعاً.. الإمتحاناااات!
ا
_______________________________________
كل سنة وبريد الغلابة طيب رقم 1 كتبتها العام الماضي..

Comments

Empress appy said…
عارفه اللى خلانى فرحانه من البوست انى لقيتك فرحانه بجد وحسيتك كده

كل سنه وكل حاجه طيبه

وعموما كلنا مستنيه هديه حلوه بس نقول ييا رب
ربنا يديم عليكى الفرح والسعادة
بوست جميل بجد
و مدونتك كلها تحفة
تحياتى ليكى
و لكى منى باقة ورد
صبـــــــــاح الورد
رغم الاختلاف الكبير بينى وبين جريده الدستور وصل لحد ان قررت مقاطعتها
بسبب صفحه الدين وكلامها فى الدين عموما بطريقه تستفزنى
الا اننى مازالت اتلصص-دون ان اشترى - على صفحه قلمين او ضربه شمس او هذه الصفحات التى تستضيف صغار الكتاب بس كتاب جامدين اوى
وحاسس بفرحتك اوى لما يكتب عنك واحد زى استاذ بلال الصحفى-وليس السينارست- حاجه تفرح بجد
ولو قابلتيه ابقى قوليله انت جامد اوى كصفحى ووحش اوى بقدر جمالك كصفحى فى كتابه الافلام
والسلام ختام
بذرة امل said…
عارفة يامروة انا لما قرأت تدوينتك دى اتفألت غم انى داخلة على النت وانا مخنوقة بس اتفألت اوى
عشان حسين انك مبسوطة
انى احبك فى لله
Diyaa' said…
كل سنة وأنتي أسعد ..ومن وسط نكد لجنة السياسات وأزمة الشرق الأوسط وكل حاجة مش حلوة بنلاقي حاجة بسيطة ربنا باعتهالنا عشان نبقي أقوي ونكمل ونحاول لأن التوفيق مش بييجي إلا للي يستحقه وزي ما قلتي ..الكتابة مكانتش بالحجم..بس المعني والمعني كبير وفرحتله أوي
يا رب تفضلي علي طول طيبة وسعيدة وربنا معاكي في الأمتحانات

تحياتشي بقي
Unknown said…
كل سنه وحضرتك طيبه والى الله اقرب
كل سنة وأنتى طيبة يامرمر

أيوه قد ايه الواحد مشتاق يفرح
يفرح بجد
وأنا فرحانة لفرحك

بالرغم من إنى لسه ماجبتش العدد الحقيقة بس فرحت للجو المبهج اللى انتى عاملاه بالمناسبة دى
مناسبة محدش يستطعمها غير اللى حضر ميلاد الصفحة وبداية الحدوتة والناس اللى بقت حاجة كبيرة أوى دلوقتى وكان ليهم شخبطة فى صفحة رأى

سعيدة إنى اتكعبلت فى عدد دستورى قديم عرفنى بناس حلوة زيك يامرمر
ويلا نطفى الشمع بقى أنا جعت
Unknown said…
ايه ده بجد
انا هروح ادعبس على الجرنان في كل حته لحد ما اجيبه
بجد مبسوطه مبسوطه مبسوطه ليكي يا مروة
عشان تعرفي ان كلمتي لا ممكن تنزل الارض ابدا
:))
yas said…
كل سنة وانتى طيبة يامروة وتعيشي وتفتكرى
Marwa Friday said…
آبي: صباح الورد يا قمر.. ربنا ما يحرمني من فرحتك ولا من زياراتك.. كل سنة وأنتِ طيبة يارب الهدية قربت قوي قوي يا آبي على فكرة!.. إن شاء الله، يارب

________________

مواطن مصري نايم: ربنا يسعدك متشكرة جداً.. ولك مني كل التحية وكل المنبهات التي تباع في البوتيكات عشان تبقى مواطن مصري مصحصح.. صباحك ورد
:))
________________

بطوط حبوب: يا دكتور اختلف زي ما أنت عايز "لولا إختلاف الرأي يا محترم".. أنا كمان ما كنتش بالعة صفحة الدين قوي ومش عارفة ليه؟!.. ياريت يا ريت أقابله يا محمود.. بس كده حاضر إن شاء الله :)).. ماننحرمش من مرورك

________________

بذرة أمل: مخنوقة ليه بس يا نسمة؟.. إنها الامتحانااااات!.. ولا يهمك يا قمر، ربنا يخليكِ.. يارب أشوفك أكبر مدربة تنمية بشرية يا رب.. وأنا كمان باحبك وأنتِ عارفة بلاش تكسفيني ههههههه
ربنا يسعدك دنيا وآخرة :)

_________________

ضياء: عاش من رآك منور مدونتي المتواضعة!.. معاك حق ربنا كريم.. ربنا يسعدك ويفرحك يا ضياء وربنا يوفقك الإمتحانات على الأبواب.. شكراً جداً جداً.. :)

_________________

أنا إنسان: وحضرتك طيب وبالصحة و السلامة.. آمين يارب ربنا يتقبل دعاءك..

_________________

هبة المنصوري: صباح الأفراح واللي جاي أحلى من اللي راح.. ربنا يخليكِ وما يحرمني منك أبداً.. يااااه فكرتيني ببداية الحدوتة.. تعرفي إن بداية الحدوتة كانت متواكبة مع أزمة ليّ؟.. أنتِ اللي فكرتيني دلوقتي!.. يااااه ربنا يسعدك ويوفقك ومطرح ما تمشي السعد يجري وراكِ راكب أجرة دقهلية:)).. يا للخيانة العظمى.. جاتوه لوحدك كده؟.. ألف هنا وشفا ياللا مسامحاكِ
:))

________________________

لماضة: لا بجد؟.. بجد؟.. وحشتيني جداً جداً يا لماضة والله بجد كنت في سيرتك مع زملاء في كلية الطب حدانا في جامعة الزقازيق :)).. ربنا يخليكِ ويسعدك ويفرحك :) أنا مبسوطة لأنك مبسوطة بشكل عام.. طبعاً ومش هتنزل يا سي حنفي!.. صباحك ورد يا دكتورة

_________________________

ياسمين: وأنتِ بالصحة والسلامة يا ياسمين.. ربنا يسعدك.. متشكرة:))
Anonymous said…
فعلا كان كلام جميل جدا
بس بصراحة عنده حق
الشرقية دي فيها سحر
فيها
فيييييييييييييل
Anonymous said…
رغم محاولاتى المستميته من قبل فى ترك تعليق متواضع على مدونتك الرائعة .. لكننى دوما وكعادتى أخفق فى هذا بسبب جهلى المطبق بأبسط أساليب التعامل مع هذا العالم المعقد .. لكنى هذه المرة مصر إصرارا شديدا .. فقط كى أقول لك : كل سنة ومدونتك فى سمو وكل سنة وبريد الغلابة على صفحات الدستور فى تنافر وتشاحن وإنشطار كأنشطار القنبلة الذرية ليخرج لنا مهوبين مثلك .. كرماء مثلك .. حالمين مثلك
ومبروك على النيشان والوسام الذى حصلت عليه مؤخرا من بلال فضل ومحمد هشام عبيه .. وعقبال ما تتقلدين ( قلادة النيل ) من فخامة الرئيس بعد حصولك على نوبل فى الأدب أو ( البوليتيزر ) فى الصحافة أو على الأقل جائزة مصطفى وعلى أمين .. لكن المهم أن من يقلدك القلادة رئيسنا المحبوب القادم .. الذى يشبه فارس الأحلام عند الفتيات ؛ ولا يأتى أبدا .. ووقتها ربما أكون قد تعلمت كيف أترك تعليقى البسيط على كتاباتك
مبروك يا مروة
تحياتى
أحمد فتحى
أنا قريت الموضوع يوميها بس ما كنتش عارف انتي و لا لأ
ألف مبروك
ربنا يفرحك علطول
*سمر* said…
اولا ربنا معاكى فى الامتحانات الى انالسه مخلصاها :)
ثانيا : انا فرحت لفرحتك ..ان بعد العسر يسر ..ربنا يديم عليكى الفرحة
ان شاء الله
تحياتى :)
مرمر
ميرسى ع الغنوه
تعرفى إنى جبت فيلم بنات اليوم مخصوص لما فيه من أغانى روعه- مش أختك- وفساتين أحلى

ويامفرقين الشموع قلبى نصيبه فين؟ عيب عليكو بجد

للأسف يامرمر معرفتش ألاقى العدد
بس وصيت الراجل بتاع الجرايد يجيبلى نسخة شاردة من أى حد
Anonymous said…
كل سنة وانتى طيبة يا مرمر يا شرقاوية يا جميلة ويارب دايما متفائلة وسعيدة كدة بالمناسبة اول ما حسيت شكل الصفحة تاكدت ان اسمك هايبقى موجود...بالتوفيق ان شاء اللة فى الامتحانات شدى حيلك
Noha El-arabi said…
بجد يا مروة كانت هدية زي الفل
مروة

بجد الدستور دى جميلة وكل اللى شغاليين فيها جمال واللى بيقروها كمان

ثانيا أنا بحسدك تقولى ليه؟
علشات إنتى أول واحدة أشوفها بتاخد هدايا قبل الأمتحانات

وياريت تكون دى دفعة حلوة علشان تنجحى بتقدير وتعدى السنة دى

ربنا يوفقك

ومعلش ع الإطالة
بما اننا شراقوة زى بعضينا ، وبما انى متابع افكارك من زمان من على صفحة رأى فى الدستور جريدتى المفضلة
وبما ان حصل حلقة تواصل بينا
يبقى لازم تزورى مدونتى واسمع رأيك
خالص تحياتى ليكى .. اللى متأجلة من زماااااااااااااااااااان
احلى هدية بجد

ربنا يوفقك

شيتوووووس
كل سنه ومدونتك والدستور طيبين وبخير

وزى ماقلت عند صالح

انتو فعلا خير سفير عن الشراقوه

تحياتى ويارب ف تألق ومفاجئات تفرحك دايما
كل سنة وانتى طيبة
والف مبروك
طب ما فيش اى حاجة كده على الماشى
عيب ده حتى الشراقوة اهل الكرم ههههه

تحياتى
خالد
khobayb said…
This comment has been removed by the author.
khobayb said…
متأخرة

بس .. ألف مبروك

أدام الله سعادتك
السلام عليكم

ازيك يانروة ايه اخبارك ياجميل

كل سنة وانتى طيبة وبخير يااارب وكل سنة وانتى فرحانة وكل سنة وانتى عندك أحلام عاوزة تحققيها

تحياتى ليكى ياقمر وربنا يوفقك دايما
وايه آخرة الغياب يا رأفت بس؟

فينك يابنتى؟
Anonymous said…
مساء الفل يامروه باشا
بسم الله الرحمن الرحيم
وبه نستعين
والصلاه والسلام علي أشرف المرسلين
ثم أما بعد

أول تعليق ليّــا هنا في تاريخ حياتي
يارب يكون وش الخير عليكي
طبعا .. أصل انا مش بييجي مني الا الخير
وعلي رأي المثل
يامدونين ياقاعدين يكفيكوا شر الجايين


كان نفسي أوي أدخل أكتب أي حاجه
بس انا طول عمري متأخر
متأخر أوي جداعلي الآخر
في كل حاجه بعملها
بس آهي ملحوقه
واللي فات نجري وراه لحد مانلحقه

بس بردو .. ماجاوبتنيش
ايه السر في الشرقيه
أنا بفكر أسيب دمياط
وآجي الشرقيه سنتين خمسه تسعه
جايز العدوي توصلني
بس دي حاجه تقلق فعلا

لأني ساعتها هكون في موقف الخاين الغشاش
للبلد الأم دمياط
ومطمرش فيّـا العيش والفول المسوس
وجايز جدا يصدر قرار بعدم دخولي المدينه الام بعد كده
وده اللي مش هسمح بيه أبدا
لأني مواطن مخلص
وبحب دمياط
اللي شربت من نيلها
وجربت أغنيلها
و ...... انتي عارفه الباقي بقي


مش عايز اطول عليكي
بس والله الكلام كتير أوي ماشاء الله
أنا قلتلك من الأول اني رغاي
استحملي بقي اللي يجرالك

أه قبل ما أنسي
مبروك للمره التانيه
علي الكلام اللذيد اللي مصر كلها قرئته وفرحت بيه
ولسه في دماغي
الثلاثي المرح فعلا
بس انا مش شايف غير ثنائي بس
الضلغ التالت مش باين خالص
قصدي يعني هو ليه مش عامل مدونه زيكوا انتي وصالح بيه


يييييييييييييه
البتاعه دي بتقوللي الجمله الخالده اللي عايز ألغيها من القاموس عفوا لقد نفذ رصيدكم قوم روح بقي
بس اللي حاصل ده حرام
لاني لسه ما اتكلمتش
ليه ما اتكلمتش ياجماعه
اعمل ايه
والكلام اللي عندي ده اوديه فيه

يلا بقي
ملحوقه في وقت تاني

انا عارف انك زهقتي مني علشان انا رغاي أوي
بس أعمل ايه
ده طبعي

سلام بقي علشان مش عايز أطول عليكي
ياهوووووووووه
Anonymous said…
مساء الفل يامروه باشا
بسم الله الرحمن الرحيم
وبه نستعين
والصلاه والسلام علي أشرف المرسلين
ثم أما بعد

أول تعليق ليّــا هنا في تاريخ حياتي
يارب يكون وش الخير عليكي
طبعا .. أصل انا مش بييجي مني الا الخير
وعلي رأي المثل
يامدونين ياقاعدين يكفيكوا شر الجايين


كان نفسي أوي أدخل أكتب أي حاجه
بس انا طول عمري متأخر
متأخر أوي جداعلي الآخر
في كل حاجه بعملها
بس آهي ملحوقه
واللي فات نجري وراه لحد مانلحقه

بس بردو .. ماجاوبتنيش
ايه السر في الشرقيه
أنا بفكر أسيب دمياط
وآجي الشرقيه سنتين خمسه تسعه
جايز العدوي توصلني
بس دي حاجه تقلق فعلا

لأني ساعتها هكون في موقف الخاين الغشاش
للبلد الأم دمياط
ومطمرش فيّـا العيش والفول المسوس
وجايز جدا يصدر قرار بعدم دخولي المدينه الام بعد كده
وده اللي مش هسمح بيه أبدا
لأني مواطن مخلص
وبحب دمياط
اللي شربت من نيلها
وجربت أغنيلها
و ...... انتي عارفه الباقي بقي


مش عايز اطول عليكي
بس والله الكلام كتير أوي ماشاء الله
أنا قلتلك من الأول اني رغاي
استحملي بقي اللي يجرالك

أه قبل ما أنسي
مبروك للمره التانيه
علي الكلام اللذيد اللي مصر كلها قرئته وفرحت بيه
ولسه في دماغي
الثلاثي المرح فعلا
بس انا مش شايف غير ثنائي بس
الضلغ التالت مش باين خالص
قصدي يعني هو ليه مش عامل مدونه زيكوا انتي وصالح بيه


يييييييييييييه
البتاعه دي بتقوللي الجمله الخالده اللي عايز ألغيها من القاموس عفوا لقد نفذ رصيدكم قوم روح بقي
بس اللي حاصل ده حرام
لاني لسه ما اتكلمتش
ليه ما اتكلمتش ياجماعه
اعمل ايه
والكلام اللي عندي ده اوديه فيه

يلا بقي
ملحوقه في وقت تاني

انا عارف انك زهقتي مني علشان انا رغاي أوي
بس أعمل ايه
ده طبعي

سلام بقي علشان مش عايز أطول عليكي
ياهوووووووووه

كان معكم
خايب الرجا
المتعوس علي عينه
المأسوف علي حظه
المغلوب علي أمره
المتنيل بتسعين نيلا
واللي زهقان من كل الناس
أحمد سلامه
وما اجملها من بشارات يحملها لنا الله حينما تشتد الازمات ويشتد الظلام نرى بصيص من النور يبعث الامل بداخلنا
كل سنة وانتى ومدونتك طيبين
===================================
ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التالي
http://kawlansadida.blogspot.com/2008/04/blog-post_21.html
وجزاكم الله عن إسلامكم خيراً"
Bongo said…
بوست جميل

و المدونة كلها جميلة جدااا

بس حاولي تكبري الخط شوية لأنه صغنووون خالص
كنت هتعمي و انا بقرا :D :D

تحياتي
Marwa Friday said…
مصطفى السيد سمير:فعلاً هو كان كلام بديع جداً كمان.. الله يكرمك ما الصعيد برضه فيه تركيبة ساحرة عجيبة"ولاد عم بقى!".. بجد مش مجاملة.. بس حلوة فيها فيل دي!.. منور

أحمد فتحي: أشكرك جداً على كلماتك الرقيقة الجميلة والحالمة.. الله يبارك فيك ويعزك،- وصفك لشهادتيهما بالنيشان قليل كمان- قلادة النيل!..نوبل!- آمين يارب هو أنا أكره برضه!- بس أعتقد إن أحياناً الظنون تخيب وفارس الأحلام يأتي!.. يارب اوعد مصر بفارس حليوة وجدع يتقي ربنا فيها!ا


مهندس مصري: منورني دائماً يا باشمهندس.. الله يكرمك ولك مثل دعوتك الجميلة

سمر: إزيك يا سمورة أيوة كده ادعي لي.. كفارة يا هانم:)).. ربنا يكرمك يارب ويخليكِ..


هبة المنصوري: العفو يا هوبا.. أي خدمة.. أجدع من برنامج "مايطلبه المستمعون"!- أنا باحب الفيلم وأغانيه جداً وفساتينه كمان!- عموماً العدد معايّ.. أما عن الغياب يا هبة والله كانت قلة مزاج على تشكيلة هايلة من الأشياء الأخرى.. ما تقلقيش على رأفت صاحبتك - أنا!- ربنا كريم.. ماعنديش دم مازرتش مدونتك من فترة:((.. سامحيني:))..


يوسف : وحضرتك طيب يا أستاذ.. ربنا يخليك على دعواتك وأمنيتك.. اللهم آمين.. استمر في الدعاء من فضلك!ا

نهى العربي: عصفورة الإسماعيلية.. يا هلا هلا.. فعلاً كانت هدية أحلى من الفل بشوية كمان.. ربنا يديم الأفراح:)).. ا


محمد صبحي: منور منور يا زميل التربية - انت جامعة عين شمس صح!- على فكرة بقى يا محمد قل أعوذ برب الفلق.. بتحسدني عيني عينك كده!.. ربنا يخليك على كلامك وعلى زيارتك.. وربنا معاك في الامتحانات وفي الشعر الإنجليزي كمان:)).. صباحك ورد


استراحة محمد : أهلا يا محمد.. وأهلاً بكل بلدياتي الحلوين.. ربنا يخليك على المتابعة وإن شاء الله أزور مدونتك قريب.. بس كده؟.. منور


الوحدة بتقتلني: ربنا يخليك هي كانت أحلى هدية بالفعل.. ربنا يوفقك انت كمان يا شيتوووووس


د/ أجدع بنوتة: كل سنة وأنتِ شرقاوية جدعة وجميلة.. ربنا يكرمك وما يحرمنا منك يا خير مؤيد للشراقوة كلهم.. ربنا يسعدك إنتِ كمان بمفاجآت حلوة كتيييير :))ا

همس الأحباب: وانت طيب يا خالد.. الله يبارك فيك ياعم.. المرة الجاية إن شاء الله يا خالد:)).. هل عندك شك في إن الشراقوة أهل كرم:)).. صباحك ورد

خبيب: ولا متأخرة ولا حاجة يا دكتور.. الله يبارك فيك.. ربنا يسعدك

عاشقة الوطن: وعليكم السلام ورحمة الله وبركاته.. إزيك يا رضوى؟ معلش أنا فعلاً مقصرة معاكِ فوق ما تتخيلي - ماعنديش دم بقى!- ربنا يخليكِ ويبارك فيكِ يا قمر.. ربنا يوفقك في الإمتحانات.. :))ا

أحمد سلامة: يا أهلاً وسهلاً بأهالي دمياط وعمدتهم في صفحة رأي أحمد باشا سلامة.. ولا رغاي ولا حاجة يا عم:)).. وبعدين انت تنور الشرقية كلها، مش عارفة إيه السر في الشرقية؟- يمكن عشان باحبها مش هاعرف أكشف لك سرها!- لكن دمياط كمان فيها سر.. شوف عندك مثلاً دعاء العدل وانت وأحمد خير الدين وناس كتير حلوين بطعم المشبك وشياكة الموبيليا.. مصر كلها فيها سر :).. مبروك انت كمان يا أبو حميد على الكلام الحلو المكتوب عنك.. ياحماسي ياللي هتودي الناس في داهية :)).. يارب تعليقك يكون خير طبعاً.. من فضلك ما تقولش متعوس على عينه وإلخ.. إلخ.. فكك من التشاؤم العملية مش ناقصة غم ونكد يا جدع!.. صباحك ورد

موناليزا: وأنتِ طيبة وبالصحة والسلامة يا قمر.. شكراً على دعوتك الكريمة:)ا

بونجو: الله يكرمك ويخليك.. لا بعد الشر عنك.. أعمل ايه!.. كبرت الخط دخل في بعضه!.. حاول تكبر حجم الشاشة من عندك اضغط على بكرة الماوس اللي في النص مع كنترول واختارحجم الشاشة اللي يناسبك.. صباحك ورد

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي