الله يرحمنا شعب.. - شعب ناكر للجميل وعلى رأي مفيد فوزي إن الرئيس مبارك يسهر طول الليالي من أجل البحث عن أكل للسبعين مليون واحد.. تخيلوا فاتورة موبايل سيادة الرئيس وهو يحاول الاتصال بكبار تجار الأكل في العالم - اشحنوا شحنة قمح زيادة، فيرد التاجر الوقح "مش معقول مستر بريزدينت شعبك بياكل كتير!" وبالتالي يضطر الرئيس - الذي لا يقبل كلمة واحدة على شعبوبه حبيبه اللي هم إحنا!- فيقاطع هذا التاجر والاتصال بآخر وهكذا دواليك - لا مؤاخذة الأمر ليس له علاقة بالدوالي مطلقاً!- وتخيلوا رصيده الضائع على الدول وعلى تجار الغلال الفاسدين المستغلين - أكيد موبينيل اتكلم من القلب! هذه المقدمة العاطفية حتى لا تظنوا بالمقال الآتِ الظنون ولا تظنوا أني من الناقمين والعياذ بالله.. مش كده؟؟
على فكرة المقال مكتوب من كام شهر كده!ا
*********************
في يوم جميل – كما يقول الكتاب- جاءت أمي تناقشنا في قضية مهمة .. " خالك محمد بيقول لي النهاردة إن 600 جنيه مايكفوش أسرة صغيرة( أكل) طوال الشهر ..أكل وبس!" .. بالطبع خرجت مني" الإبداعات السيريالية في صرف المرتبات الشهرية"! .."ليه دول 600 جنيه .. كتير!" .. وبعد جدل ومناقشات انتهت بجملة حاسمة من أمي " طيب اسكتِ انتِ وهي .. انتم عايشين في الأحلام!" ا
****************
بعد كلمة الخبرة .. تشككت أن 600 جنيه بإمكانها أن تُسير مركبا .. لكن يوم الأربعاء .. ولأجل حظي الجميل ..كنت أستمع لبرنامج "الراديو دليلي" – هو برنامج يهتم بحل مشكلات الناس على إذاعة الشرق الأوسط*- اتصل بهم رجل – والرجال كثير الحمد لله – اسمه "عم سيف" ..55 عاما..من احدى قرى "البحيرة" ..كان موظف أصغر من الدنيا ..لكنه موظف ..أقلها ضامن معاش ..أفضل بكثير من رجل أعمال في حجم الدنيا والكواكب المجاورة .."ويا ولداه ما عندهوش معاش!".. كان لا يهتم بإعلانات "اسأل استشير ..هناك خبير" ..فكانت النتيجة عشرة من البنين والبنات .. مافيش مشكلات ..ثروة بشرية ، الصين عندها مليارات من البشر ..عادي ..- عدوها- مركب الحياة يتهادى حتى هوى بالرجل وأحيل للمعاش المبكر وسنه 50 عاما – يعني عنده معاش الحمد لله !- تخيلوا معاشه كم ؟ ..(قل أعوذ برب الفلق) .." خمسه وخميسة" .. حوالي 16 ألف .......قرش! .. – يا وعدي.. ودول يدخلوا الواحد كم مرة جنينة الحيوانات!-ومعاه حوالي "640 " ربع جنيه – يعني غنى فاحش – يعني حوالي كده بالعملة الصعبة – الجنيه يا أفندي عملة صعبة على الناس !- حوالي .. 160 جنيه .. افتراء..صح ؟ .. الرجل يود أن يزيد معاشه قليلا .. – قليلا!- الإذاعي "سعد مصطفى " سأله " مش كتير عشرة من ست واحدة؟!" .. قال " آه كتير ..أنا طلعت اتنين من التعليم ..مالهمش ذنب.. أنا كمان عامل عمليتين .." سأله المذيع "لو اتجوزت من أول وجديد ..هتخلف كام؟" ..طبعا قال "كنت هخلف اتنين تلاتة بالكتير " المذيع .. "كفاية اتنين".. عم "سيف" بصوت يغلب عليه الغلب والتصميم " اتنين ..تلاتة بالكتير!".. طيب لو كان فعلا عنده طفلين .. تعالوا نتخيل الحكاية ..؟
*********************
ربنا ابتلى عم "سيف" - بلاءا حسنا طبعا! - لأني كنت أنا زوجته وأم العيال و وزير المالية .. ! ا– تخيلوا !- وكنت وقتها واعية .. لذلك كان عندي من العيال " عنترة" – ماتسألوش عنترة ومروة إزاي؟!- و بنوتة "فراولة".. عنترة في الشهادة الإعدادية ..وفراولة – بالصدفة- في الإبتدائية .. استلمت منه الـ 160 جندي .. بالإضافة لـ عشر جنيهات بعت بهم كرتونة بنبوني – كفاح بقى – و40 جنيه حصيلة بيع زوجي الإفتراضي "سيف" لعلب الكبريت والأقلام و الولاعات الصيني ..طوال شهر.. الحصيلة يا أم عنترة ..210 جنيه .. سألته بكل رومانسية بلهاء " الشهر فيه كام يوم يا سيف يا روحي – إذا كان في روح أصلا!- يرمقني بنظرة أكثر رومانسية"يا وليه.. الشهر الحكومة مخلياه يوم !".. آه صحيح ! ا..30
*******************
عندي الآن " 210 " جنيه .. و 30 يوما و من غير (بطاقة تموين)! .. . أولا يجب أن يتناولوا إفطارا مناسبا .. بـ "جنيه" طعمية .. و"50" قرش خبز ..."كل يوم؟..آه كل يوم!".. الحمد لله ..45 جنيه طاروا ! .. باقي يا أم عنترة 165 جنيه .. ندخل على الغذاء .. " لازم ياكلوا زفر ( لحمة يعني) .. نقول كده .. نصف كيلوا لحمة يكفي في شهر؟.. أيوه كويس! .. بـ 16 جنيه ..و3 كيلو رز الكيلو بــ 225 قرش .. يبقى كده 675 قرش ..و زجاجة زيت 2 لتر بـ 15 جنيه .. وكيلو عدس بـ 650 قرش .. والثوم موجود خزين .. والبصل 2 كيلو بــ 6 جنيه .. والطماطم يجي 5 كيلو ..بحوالي 3.75 قرش .. وفلفل كيلو بـ 3 جنيه .."ركزوا كده مجموع ما مضى 57 جنيه + 45 إفطار= 102 جنيه .. " .. وطبعا في أيام سيكون طعام الغذاء فيها (فول وقرنبيط وبتنجان)... والقرنبيط الواحدة بحوالي 4 جنيه ..والبيضة بــ 50 قرش .. وسيكون هذا الطعام سبعة أيام في الشهر .. متوسط اليوم من 10 إلى 15 جنيه ..يعني 12.5 جنيه .. يعني حوالي 87 جنيه ونصف! .. يعني المجموع الكلي للطعام – القرديحي كما هو واضح – 189.5 جنيه يا مؤمنين .. الباقي بالضبط 20.5 ونصف ..آه نسيت أنبوبة الغاز .." 7 جنيهات " ..تبقى معي إذن 13.5 جنيه ! .. من غير شاي أو سكر .. من غير مصاريف دروس ومدارس ..من غير صرف مليم على الملابس ..أو الدواء .. من غير فواتير كهرباء ومياه ..من غير مصروف للعيال ولأبيهم ..ومن غير ليه! ا..
*****************
طبعا "عنترة " ..شبلي العزيز .. متوقد القريحة ..ذكي ..تهور وطلب أن يأخذ درس في "اللغة الإنجليزية"..وطبعا لأن ابني لازم يكون أحسن واحد في الإنجليزي..لذلك أوصيت عم "نبيل" القهوجي جارنا أن يأخذه ساعة كل يوم في المقهى ..حيث يضبط له الراديو على "بي بي سي إنجليش".والبرنامج الأوروبي "وبالمرة يسمع الإذاعة التعليمية ! – طبعا الشركة قطعت الكهرباء .. و أصبحت ثلاجة جارتي الست "أم زكي" ملاذا لطعامنا .. و عنترة وأخته يذاكرا على ضوء عمود الشارع وأحيانا على كشاف السيارة نصف نقل التي يمتلكها جارنا "برعي!" .. – بالذمة مش أم مثالية!- آه "فراولة" أيضا كانت متهورة وطلبت درس تقوية في "الرياضيات" ..وبما إن "عم نبيل" أصيب بإختناق مني ..قررت أن أرفع "فراولة" فوق كتفي حيث شباك "مستر إبراهيم " مدرس كل المواد.. حتى تتمكن من الإستماع والتدوين الجيد لما يشرحه الأستاذ بلا مقابل .. "
كان يأخذ شهريا 25 جنيها بالمناسبة !"ا..
آه عندما أصيب فلذة كبدي "عنترة" بمغص حاد ..و لا مؤاخذة "إسهال" .. عندها قمت بتحضير فصين من الثوم وعصير الليمون ..وقلت له "بالشفا يا ضنايا ..كله من حنفية الميه العمومي ..كان لازم يقطعوا الميه كمان!" .. قال عنترة بكل وقاحة " يا ماما أنا سمعت عن حاجة اسمها صيدلية !"..قلت له بوقاحة أشد من وقاحته .."دي يا غبي وصفة "هدى سلطان"!".. نظر لي هذه المرة ببراءة "مين؟!" .. أرد بكل فخر "آه زماااان أيام التلفزيون والكهرباء ..الحاجة (ثعلبة) في مسلسل (الوتد) نصحت عيالها لما الكوليرا هجمت بالتوم والليمون ..فهمت يا فصيح ..؟ ..خذ!" ..يمر الشهر ..وسؤال خنيق أراه متحفزا في عيونكم .. والـ 13.5 الباقيين يا "أم عنترة"؟..يا ستار.."الواد عنترة أصيب بعد الوصفة بنزلة حادة .. طاروا في كشف شعبي ..ومضاد حيوي ليس له حيوية!ا
******************
كما رأيتم .. مغامرة ليست بالسهلة ! .. أسرة صغيرة وسعيدة ..ربما يرى البعض أن هناك مبالغات – لكن ولا مبالغات ولا يحزنون حتى- 160 جنيها ..أو حتى 210 "على اعتبار العمل الإضافي ..أو حتى 300 جنيه .. لا أدري حقيقة ما الذي سيفعله عم "سيف"؟- أقصد ملايين الــ"سيف" في مصر!- حتى إن عمل أولاده .. وحتى ..وحتى ..الآن بعد أن تعبت نفسيا – رغم ان التجربة السابقة مجرد كتابة- شعرت فعلا بمعنى ومرارة المثل العامي الجميل (الفقري)"جيت أبيعك يا حنة ،قالوا كترت الأحزان .. جيت أشتغل مسحراتي ..قالوا ده خلص رمضان"! ا
Comments
مسائك جنيهات وإنصاص فضه
ربنا يكرمك وتخلصى امتحانات على خير
الله يكون في عونه
تحياتي
عازماكى على تاج مملكة "امتى الزمان يسمح ياجميل"..أو تاج الأحلام كما يطلقون عليه
لما تخلصى امتحانات ابقى جاوبى على أسئلته.. درجته هتنضاف كأعمال سنة تدوينية
ربنا يرحمنا
كان الله في العون
لك الله يا مصر
:(
خالص تحياتي
ربنا يوفقك يا استاذه مروه فى امتحاناتك
شدى حيلك
ربنا معاكى
تحياتى
آختى الكريمة
لما أراك لم تشاركي معنا في حملتك إلى الآن ؟
أختى الكريمة : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أختي الفاضلة أن مشاركتك في هذه الحملة سوف يكون احد أسباب نجاحها ونشر لغتك
ندعوا إلى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم
يابنتى ايه الكآبه دى؟
أنا باتخض كل مادخل ألاقى المزيكا اللى انتى حاطاها وصورة الراجل
اقلبى الصفحة بقى
غريبة اوى
والله اجدادنا دول يابنتى كان عندهم بعد نظر
قالولك مصر ام الدنيا
ودلوقتى احنا بنستخدم نفس الجملة
بس بلوك جديد
يلعن ام الدنيا
ومين ام الدنيا؟؟
اجدادنا قالوها