تاجيييين.. وحتة


تاجين في الراس ..!ا

تاجين وصلوني من العزيزتين هبة المنصوري- الأحلام.. والتاج الآخر البوليسي..من لماضة.. وبما اني تأخرت لأني كسولة في الرد على الأسئلة أصبحت أرتديهما كالطفلة التي في الصورة.. لخبطة!.. ربنا يستر عليكم من الملل

اذكر 5 أحلام على الأقل تخص ماضيك وتحلم فيها بتغير الأشياء .. ماذا ستعدل وماذا ستترك؟؟

يااااه؟ خمسة أحلام؟.. أحلامي كانت عجيبة جداً فيما يخص الماضي.. أولاً كان نفسي أمثل مع محمد صبحي، محمد صبحي بالنسبة لم يكن مجرد ممثل له طلة حلوة على الشاشة، أو ممثل له كاريزما.. لا.. تعدى محمد صبحي بالنسبة لي هذه المرحلة للدرجة التي أصبح فيها أحد أهم الشخصيات التي ساهمت في تكوين شخصيتي.. بابا ونيس بقى!ا


حلم ثاني: أتجوز أحمد عبد العزيز!- فتى أحلامي في هذه الفترة-لم يكن مجرد ممثل.. أعماله الفنية كانت مؤثرة في شخصيتي بشكل كبير، كانت شخصية لها مبادئ.. لا أنسى الوسية "خليل حسن خليل.. كفر صقر، مديرية الشرقية!"، أو حتى مسلسل المال والبنون "يوسف عباس الضو.."، و"من الذي لا يحب فاطمة"- خاصة إني باحب اسم فاطمة!- انتهاءاً بأكثر أدواره تأثيراً.. سيف الدين قطز في مسلسل الفرسان.. كانت نهايته مأساوية بالنسبة لطفلة عمرها 9 سنوات.. "مات ليه. اهيء وإزاي يسيبه كده.. "بيبرس".. كان راجل طيب قوي!ا..




حلم ثالث: أكون لعيب كورة محترف في النادي الأهلي!.. وهذا الحلم كان من توابع حبي لكابتن ماجد!.. أحب أهدي الحلم ده لكل الزملكاوية.. اكتشفت اكتشاف ظريف.. إن صديقتي الأنتيم وزملائي الأعزاء وأساتذتي الكرام زملكاوية!.. أهلي.. أهلي!ا



حلم رابع: كانت عندي عادة وأنا طفلة، هي أني أضع لكل يوم من حياتي في نهايته عنوان كالحلقات التلفزيونية.. مثلاً اليوم الذي تحدث فيه خناقة في المدرسة أسميه الخناقة.. اليوم الذي تأتيني فيه مصاصة من جهات مختلفة (المدرسة والبيت) أسميه يوم المصاصة!ا العادة دي لها علاقة غير مباشرة باتجاهي للكتابة



حلم خامس: إني أكون طبيبة!.. كان اعتقاد مني بأن مهنة الطب الوحيدة التي يمكنها تضميد جراح العالم!.. اكتشفت أن أعصابي لا تتحمل – رقيقة بقى!- وأن الطب ليس الوسيلة الوحيدة لاسعاد البشرية.. حلم كمان.. كان نفسي جداً أدخل الجيش!ا

#####

اذكر5 أحلام على الأقل تخص مستقبلك


باحلم بجد إني أشوف الناس كلها مبسوطة.. مش عارفة متعلق بمستقبلي ولا لا.. لكن ضحكة أي حد ما أعرفهوش بتسبب لي كم من التفاؤل والسعادة التي قد لا يتخيلها أحد.. أكيد لو الناس فرحت واتبسطت.. هافرح لأني من الناس.. لكن لأنها الدنيا.. ولأننا في مصر.. فلا بد من اكسير الحزن.. قدر المكافحين في الحياة!..


باحلم إني أكتب حلو.. والناس تتبسط من كتابتي.. وما أكونش مجرد اسم يمر مر الكرام.. "أسيب بصمة"- فيش وتشبيه!- وكمان باحلم جداً إني أشتغل في الإذاعة المصرية لأنها أثرت في شخصيتي جداً.. "هنا القاهرة!".. بس ربنا يستر على آذان المستمعين.. واضح إني هاقدم في الراديو "الأسرة البيضاء" وهاستضيف متخصص أنف وأذن وحنجرة على طووول!ا

باحلم إن كل اللي باحبهم يلاقوا سكتهم، وينولوا بعد الصبر كل خير، وأكتر من اللي في بالهم.. وباحلم أرد الجميل لكل من فتح لي طاقة نور بقصد أو من غير قصد.. يا مسهل


باحلم إني أشتغل مع.. مع.. عمرو سليم!.. أيوة الفنان عمرو سليم رسام الكاريكاتير.. عقلية رائعة، فنان متميز.. يارب يكون رئيس تحرير مجلة في يوم من الأيام عشان أشتغل معاه.. لأنه من الناس اللي شجعوني جداً في البدايات..



باحلم بخبطة صحفية كبيرة.. رغم إني بعيدة عن صحافة الخبر وكل كتاباتي سواءاً في الدستور أو بص وطل.. تعبير عن الرأي.. صحافة رأي.. لكن مين يكره إنه يكشف مفسد؟.. دي حاجة حلوة قوي.. حتى أحقق حلمي في أن أكون محققة كبيرة أو وكيلة نيابة!ا

اذكر شخصين على الأقل متواجدين في حياتك حالياً كنت تود وجودهم قبل الآن بزمن


# مشمشة صديقتي

# شلة الدستور وبص وطل

# أصدقائي وزملائي في تربية الزقازيق "أجدع وأجمل ناس"

# أصدقائي من جامعة الزقازيق بشكل عام.. "شلة كلية الطب".. بعضهم كان تعرفي به لمدة قصيرة لكنهم للحق مؤثرين

اذكر شخصين على الأقل غير متواجدين في حياتك حالياً كنت تود وجودهم الآن أو في حياة أولادك مستقبلاً



# الأستاذ حسن عبد الفتاح مدرس علم النفس في مدرستي الثانوية

# مستر محمود مدرس اللغة الإنجليزية

# الأستاذ محمود مدرس التاريخ

# الدكتور محمد جلال أستاذ الأدب الانجليزي في جامعة الزقازيق- من الأساتذة اللي شجعوني جداً جداً.. وكمان الدكتور محمد ناصف أستاذ التربية المقارنة في تربية الزقازيق والدكتور محمد عبد المنعم مدرس نفس المادة..





التاج الثاني... انت مين ياللي أنا مش عارفك؟؟


من أنت؟


إيه السؤال الصعب ده؟..



وكنت تحب تكون حد غير نفسك؟


إحم.. بجد مش إجابة دبلوماسية.. بس أحب أكون مروة.. لو نجحت فعلاً في كده يبقى حاجة حلوة!.. لكن ده ما يمنعش إن في شخصيات يعتبر أثرت في تكويني بشكل مباشر.. محمد متولي الشعراوي.. محمود السعدني.. حمد صبحي . عبد الحليم وأحمد زكي.. عاطف الطيب ؛ وما حدش يقول لي حاطة محمد متولي الشعراوي مع الناس دي إزاي!!




بتدون ليه - امتى - لمين وفين؟


هاهاهاها.. باضحك لما أفتكر بدايتي التجريبية مع التدوين في 2006 كان ليّ حوالي 3 مدونات تقريباً، وكلهم طاروا لأني كنت بانسى كلمة السر أو باكتب اسم المستخدم اسمي – ما كنتش اعرف انه الإيميل!- لما بدأت تدوين كان عندي عدة أسباب.. نافذة إبداعية جديدة.. لما اندمجت في التدوين اكتشفت إن في ناس حلوة تستحق أن تدون من أجلهم، ويستحق ابداعهم الاحترام والتقدير، بالاضافة الى فرصة إني أستفيد من تجاربهم على المستوى الابداعي وعلى المستوى الانساني بالمقام الأول



منظر أو موقف مش قادر تنساه عمرك؟


منظر.. منظر؟.. آه منظر الناس في العيد الكبير لما بيسمعوا إن حد دابح عجل! شكلهم يتمازج بين المأساوي والفكاهي المضحك والمسخرة وقلة الأدب!..

موقف.. آه موقف عبوووود..!!ا



أمنية شبة مستحيلة نفسك تتحقق؟


شبه مستحيلة.. هي مش مستحيلة قوي..

إن التعليم في مصر يتصلح حاله



تحب تكون مكان حد مشهور ؟مين ؟ وحتعمل ايه وقتها؟


مكان حد مشهور.. باحب محمود سعد جداً.. وقتها هاعمل ايه.. ايه؟ هاشرب العصير بتاعي وبتاع الضيوف لو كان في ضيف رخم!.. طفاسة




شايف مستقبلك إزاي ؟


مستقبلي؟.. إن شاء الله خير!.. افتكرت وأنا باقرأ السؤال ده جزء من تتر كتبه أيمن بهجت قمر.. " العمر بيجري زي القطر.. والدنيا مفارق كلها ملفات.. ماشيين على سطر وسايبن سطر.. ومين فينا زي ما اتولد مات؟!ا




المستوى الأجتماعي تختار زوجتك /زوجك عل أي أساس؟ المال /الدين/الجمال


والله يعني المال زايل.. والجمال جمال الروح.. ويا روح ما بعدك روح.. وهذا الأمر مكتوب مكتوب!!.. لا بجد.. هختاره وسيم؟.. معاه فلوس؟؟.. ولا وسامته ولا فلوسه هاتحسسني بالأمان.. إلا إذا كان راجل شهم ومتدين وعنده أخلاق.. يعني على رأي زميل عزيز.. يا بنتي نادر قوي تلاقي حد عنده أخلاق!.. طالما نادرين يبقى موجودين يبقى في أمل حتى لو قربت من التلاتين!ا.. الله الله شفتم القافية!ا





امتى يكون الحب أعمى؟


الحب مش أعمى!.. الحب نعمة كبيرة من عند ربنا، وأعتقد إن الحب كائن حاد البصيرة- ربنا يكفينا شر عمى البصائر- الحب هو روح الدنيا.. تخيل إنك لا بتحب بلدك ولا أصدقاءك ولا دنيتك.. تخيل إنك اتجوزت لمجرد آداء الخدمة الزواجية "زي الخدمة العسكرية كده!".. تخيل إنك اشتغلت من غير ما تحب شغلك.. تخيل حياتك مجردة من الحب كمعنى مجرد.. "جحيم!".. أحلى حاجة بجد لما الواحد يكون متأكد إن ربنا بيحبه لما يشوف النعم اللي معاه.. حتى لو هو كائن مقصر ومذنب بيحس بخجل.. إزاي ربنا يحبني الحب ده كله وأقابله بالتقصير ده!.. أما إذا كان السؤال متعلق بحب قيس وليلى وعنتر وعبلة.. فأصمم أن الحب حاد البصيرة.. أعمى في حالة واحدة زي ما بيقول شكسبير "الحب أعمى لأن المحبون لا يرون الحماقات التي يرتكبونها هم أنفسهم!".. كده ممكن!ا




شايف الدنيا إزاي؟


الدنيا دي زي البحر.. بس خلاص




صفة أو عمل جميل نفسك نشاركك فيه؟


نفسي بجد ما نسكتش ع الباطل.. بأي حجة.. نفسي نقول "لا" قولاً وعملاً..

سهلة مش كده؟؟




Comments

التعليق الأول
هي هي هي هي هئ

والله يا أخت مروة كلامك عن الممكن والمستحيل والصورة الجميلة واليوتوبيا ومعارفك الزملكاوية- هعديهالك- يحمل قدرا لا بأس به من الأمل المستحيل في غد غير مشرق بالمرة
بس انتي قلتي كلمة
بس جون
تتمني تكوني نفسك لو نجحتي
يا سلام.. هوا دا
ودا يخلينا نسال: احنا مين؟..وعايزين نكون ايه؟.. واللي يجاوب صح يكسب... يكسب... يكسب نفسه يا مروة يا جمعة

سؤال أضيقيه لباقة الأمال: متى تحس مروة جمعة بأنها رضت عن نفسها؟
سؤال صعب.. مش كدة؟
Noha El-arabi said…
احب فيكي لسعانك يا ميرو
باحلم علي ادي
علي ادي اوي
استمر يا جميل
حنوصللللللللللللللللللللل
اكييييييييييييييييييييد
Diyaa' said…
دخلتي في سكة التاجات ؟
يا مسكينة :(
أنا تعبان..هروح أنام ..لسه متعشي أصلاً..بعدين هبقي أجي أقرا وأرغي
تحياتي..وحشتني مدونتك
وبالمناسبة أنا مع عمرو في سؤاله
الكلام دة كبييير
عاجبنى أوى موضوع عنونة الأيام.. حاجه كده زى مسلسلات الحلقات المنفصلة.. أو حتى المتصلة- ساعات كان أسامه أنور عكاشه بيعملها
وأنا كمان كان نفسى أمر بتجربة زى تجربة الجيش كده.. معسكر أو رحلة طويلة شويه أو حياة ف مكان جديد بناس مختلفة
حلم بقى إنى أشوف الناس اللى باحبها مبسوطه ده باحلمه كل يوم.. هو وحلم إن يبقى لى بصمة.. ربنا ينوله لينا
وموقف مش قادره تنسيه موقف عبووود! لو قلتيها تهريج فأنا باقولها بجد.. أول مرة أروحه كدت أبكى.. وكان كل منايا أروح بيتنا.. تصورى إننا يومها ركبنا أتوبيس لطنطا ومن طنطا ركبنا بيجو.. كانت رحلة مكوكية مايعلم بيها إلا ربنا.. هو مين عبود بقى بالمناسبة؟ بافتكر علاء ولى الدين وهو رايح الجيش كل ماتيجى السيرة
وكويس أوى إنك شايفه الدنيا بحر يامرمر.. كده مش هتحتاجى تصيفى.. ومش هيجيلك الأمنية اللى قاتلانى اليومين دول.. نفسى أقعد ع البحر شويه كتار

يلا صباحك شباك مفتوح على بحر تركواز ورمله نضيفه وعيال مبسوطه وعوامات ملونه والفريسكا أيوه الفريسكا
Cold air said…
السلام عليكم
ازيك يا مروة و بجد بحييك علي إجباتك الجميلة و الجامدة دي و حسيت فعلا بشخصيتك الناضجة اللي تقدر ترسم طريق بدايتها و تحاول تحديد مستقبلها بنفسها و سعدت بكلامك عن السؤال اللي بيقول كان نفسك تكوني مين غير نفسك إجابتة غاية في الموضوعية و الدقة لأن الإنسان السوي هو الذي يؤمن بقدراته مهما كانت قدرات الغير

مع تحياتي
100
100 ياحبيب قلبى ضربة معلم ياباشا بحبك ياواد
اجاباتك لذيذه اوى يا مروره وبجد فيها حاجه
نفسك الناس تقول لأ قولا وعملا
اهو عملا دى عصبه اوى
الناس بقت تقول لأ لحاجات هم نفسهم بيعملوها
ربنا يستر
عمرو said…
مروة هانم

موهبتك التى تتحدث عن نفسها كالعادة, اعصار من الظرف و الضحك والمؤثرات الروحية الحادة التى تبهرنى فى كل مرة ولا أعظمها فيلم تومكروزى !!!1


أصبت بسعادة قصوى-بالطبع- عندما قرأت (شلة طب الزقازيق) ضمن اجاباتك... ليس لأننى من ضمن تلك المجموعة بالتأكيد (أنا مين أصلا يعنى؟؟!! ) ..., ولكن لأنى تأكدت من ان فى كليتنا ناس بتفهم !!!1


تحياتى يا أميرة الموهوبين (زى أبوتريكة كده.... مادمنا اهلاوية زى بعض بقى )..... وسأقول كما يقول الجميع : استمرى


صباح الفل
Anonymous said…
دايما بلاقى صعوبة فى الرداو التعليق على كلامك لكن بوجة عام ممكن اقولك انى حسيت بألفة مع الكلام اغلب الردود كان سهل اتوقعها فى ضوء فهمى ليكى وكتير قوى لاقيتة مشترك بينا زى الشعراوى ومحمد صبحى لان اكتر ناس ساعدت فى تكوين شخصيتى فعلا الشعراوى وصبحى ود نبيل فاروق والرائع د مصطفى محمود تحياتى و....
احمد عبد العزيز مش ده اللى طول الحلقة الاخيرة يقعد يقول قتلتنى يا بيبرس قتلتنى يا خاين يادون طب ولنعمة لاوريك
ايه هو ما كنش بيقول كده
اصلى ما اتفرجتش غير على الحلقة الاخيرة
هى الحلقة اللى كان بيموت فيها
واقول هايموت لما ينضرب بالسكينه
يطلع صاحى
اقول هايموت لما يقع من على الحصان
ويطلع صاحى برضة
اقول لبيبرس ييجى عليه ويخلص منه
الاقي بيبرس قاعد جانبة وهاتك يا عياط ال ايه مش هو اللى طعنة"غزه"يعنى
اخش انام واسيبة لحد ما يودع
الاقى نفسى باحلم باغتيال السادات
استغفر وانام ع الجنب التانى
احلم باغتيال كنيدى
سبحان الله
السلام عليكم

ازيك يامروة ياحبيبتى
وحشاااااانى خالص

تاجين وحتة وكل سنة وانتى طيبة مع كل تاج

بس بجد انتى انسانة جميلة اوى
وان شاء الله هيكونلك مستقبل جميل
ربنا يوفقك يااارب وتحققي كل اللى بتتمنيه

بالنسبة للتعليم اللى ممكن ينصلح حاله
ف كل شئ ممكن ومفيش حاجة مستحيله وان شاء الله التعليم يكون أفضل ويتحسن ان شاء الله

بالنسبة للزمالك فمتخبطيش فى الحلل يااخت مروة
:D

بالنسبة لكتاباتك وانك نفسك تسيبي بصمة فأنتى فعلا كتاباتك بتعجبنى جدا جدا وأسلوبك مميز جدااا

بالنسبة لأحلامك اللى كانت واللى لسه هتكون ان شاء الله فأتمنالك انك تحققي كل اللى بتتمنيه وتحققيهاان شاء الله


تحياتى ليكى يامروتى ياقمر
مروة صباحك عسل استمتعت بالإجابات جدا في وقت صرت فيه شديد السخافة لدرجة أني لااستمتع هذه الأيام حتى بشوب عصير القصب الذي يمثل اكسير السعادة بالنسبة لي!
من جديد أكرر لك نصيحتي الخالدة.. استمري ولاتتوقفي عن الكتابة أبدا.. وستكونين- وبكرة قولي الواد محمد قال- حاجة كبيرة قوي
صباحك وردي وحتة!
Unknown said…
ههههههه
عاوزه تبقى دكتورة يا فقريه
طيب بصي لاختك واتعلمي منها
ده احنا دلوقتى بيخوفوا بينا العيال الصغيره
جميله اجاباتك يا مروة زيك بالظبط
هبة ربيع said…
""نفسي ما نسكتش على الباطل بأي حجة
:)
ربنا يحقق أمانيكي كلها ، كتابتك جميلة جدا
تحياتي
يوم المصاصة
هههههههههه
يبقى ده كان يوم التاجين بقى

انا معاكي مفيش امل في اصلاح التعليم
ربنا يستر


اوروفوار
Marwa Friday said…
عمرو الطاروطي: أهلاً بعمدة طاروط!.. والله يا أخ عمرو أعتقد إن الانسان مننا لازم يتفاءل شوية!.. احنا مين؟.. وعايزين نكون ايه.. اممم انت تقصد الهدف المحدد.. لو الانسان مننا حدد هدفه ده هايسهل له حاجات كتير.. أحس إني راضية عن نفسي لما بجد- يا رب يا رب- أحس إن أمي مبسوطة قوي، وما أطلعش فاشلة دائماً في وجهة نظرها (مشكلتي إني بافشل في حاجات ما حدش بيفشل فيها تقريباً!).. حاجات كتير تخليني راضية عن نفسي، ممكن أتخيلها، لكن كأرض واقع عارفة ان مرحلة الرضا عندي لا تتعدَ الرضا بالمقسوم والحمد لله على كده..!.. منور يا عمرو يا طاروطي.. يا رب تكون أخبار الفيلم تمام يا ريس.. إلى الأمام


---------------------------------

نهى العربي: يا خواتي باحبها!.. عارفة يا نونا إني حد ما عندهوش دم ومقصرة في حقك.. على فكرة بادخل مدونتك ومتابعاها.. بالنسبة للحلم فأنا باحلم على قدي.. هانوصل إن شاء الله يا نهى.. ربنا كريم قوي.. صباح الجمال
---------------------------


ضياء: صباح الفل يا ضياء.. منور المدونة فين تعليقاتك من زمان.. صعبة التاجات دي!.. ألف سلامة وألف هنا.. واضح إن العشا كان تقيل فما عديتش ترغي تاني!.. راجع اجابتي على عمرو
:)

-------------------

صباح الصباح: ربنا يعزك يا كبيييير.. صباح الورد
-------------

هبة المنصوري: وحشتيني بجد يا هبة.. قسوة الحر والأيام اللي هي ورا أيام ورا أيام.. مخلياني نفسي أشوفك أو آجي المنصورة بالهليكوبتر- عفواً البيجو!- تخيلي كل العربيات اللي بتودي للزقازيق فينيتو!.. فاكرة لما ركبتيني القطر هاهااهاهاها.. كانت أول مرة أركبه!.. فعلاً موقف عبوووود لا يغيب كابوسه عن بالي هذه الأيام.. أصيف؟ يا ريت.. عمري ما عملتها الحقيقة!.. يمكن عشان كده شايفة الدنيا بحر!.. صباحك جميل يا هبة.. صباح من الجنة يا رب.. ما لا عين رأت ولا أذن سمعت ولا خطر على بال بشر.. دعواتك
---------------------------


Cold air
وعليكم السلام ورحمة الله وبركاته
ربنا يخليك.. ويبارك فيك.. شكراً على تعليقك الجميل.. وحلوة عبارة (الإنسان السوي هو الذي يؤمن بقدراته مهما كانت قدرات الغير).. شكراً تاني وصباح الورد
:)
-----------------------------

مشمشة كامل: يا حبيبة قلبي- شفتِ إزاي باكلمك بالضمير المؤنث عندي نظر!- أنا خلاص يا مشمشة صدقت إني بـ 10000 راجل.. طب حتى قولي باحبك يا بنت!.. والله انتِ عسل.. ربنا ما يحرمني منك

---------------------------------

بطوط حبوب: الله يكرمك يا محمود.. فعلاً عملاً صعبة مع اللي بنسمعه وبنشوفه.. ربنا يسترها علينا.. منور.. هيييه مش لك على فكرة 5 جنيه مش أول تعليق!ا

-----------------------


عمرو: صباح الفل يا جميل.. بجد إنت من الشباب – ماشاء الله- الواعد بجد.. وليّ الفخر إنك زميل في جامعة الزقازيق حتى لو كنت على قوة كلية الطب.. كانت مفاجأة عبقرية عندما علمت أنك لازلت بالفرقة الأولى طب- الحمد لله انت رايح تانية- بجد سعدت جداً إن في ناس زيك انت وأحمد جمال.. في سنكم وفي تفكيركم – آل يعني أنا اللي عجزت!- وبجد كلامك أخجلني جداً.. بجد أتمنى أن أستحق كلامك هذا وأن أظل عند حسن ظنكم.. ومش ترجع تقول – أنا عارف كان عاجبني إيه في اللي بتكتبه!- ربنا يسعدك.. بخصوص لقب أميرة الموهوبين فده لقب حلو قوي لو كنت استمريت لعيبة كورة شراب!.. ربنا يخليك يا دكتووور ويوفقك ونشوف ابداعاتك منورة.. فقط اعطِ للمبدع بداخلك فرصة الانطلاق.. وبشائر مدونتك تدل على هذا الابداع.. انطلق يا أبا تريكة الطب المصري
صباح الفل
----------------------------

يوسف: أهلاً يا أستاذ يوسف.. منور..الشيخ الشعراوي بصمة.. محمد صبحي من الناس اللي أثرت في أجيال.. أما نبيل فاروق فله تأثير.. لكني الحقيقة لم أكن من هواته أو متابعيه بشغف.. منور وصباح الورد

------------------------------

واد غلبان: يااااه انت لسه فاكر المشهد!!.. بس انت يا أخي ذاكر التفاصيل الدموية ليه كده؟؟- دم دم دم!!-.. معاك حق كان الواحد بيقعد يفكر قتله ليه وبعدين عيط ليه؟.. عموماً شكراً على هذا التعليق الكوميدي.. كنيدي مرة واحدة.. طيب طالما اغتيالات احلم بالأميرة ديانا!!.. صباح الفل
:)

--------------------------------


وعليكم السلام ورحمة الله وبركاته
إزيك يا رضوى.. انتِ لكِ وحشة برضه وفعلاً مقصرة أنا معاكِ بقالي ياما ما زرتش مدونتك... ربنا يخليكِ يا رضوى ويحقق أمانيكِ.. صح ممكن يتصلح حال التعليم إن شاء الله لما أبقى سيدة مصر الأولى!.. أخ انتِ زملكاوية نسيت!- حتى أنتِ يا رضوى!- ينفع أخبط بغطيان الحلل يا أخت رضوى؟؟.. ربنا يكرمك على كلامك الجميل.. آمين يا رب.. سلامي لمنيا القمح كلها
:)
Marwa Friday said…
محمد هشام عبيه: صباحك جميل يا أستاذنا- غصب عن أكسفورد!- ربنا يكرمك يا محمد.. ويسعدك.. وكفاك الله شر السخافة- لا أعتقد أن كاتباً موهوباً مثلك لديه عقدة السخافة المتوفرة لدى الكثيرين- معك حق في أن القصب نفسه عصارة الهم باتت في طعمه!- وبالنسبة لنصيحتك الخالدة التي أحفظها- من كتر ما قيلت لي منك ومن ناس كتيييير!- أنا فعلاً بدأت أحس بالباروما أو الصدأ يأكل تفكيري.. القلم لا يطاوعني أصلاً.. ده اتكتب وده اتناقش وده اتهرى وده مش حلو ولازم تشوفي أكل عيشك بعيداً عن الكتابة ولو شوية – دي نصيحة خالدة من اللي حواليا برضه!- ويا رب يا رب أكون (حاجة) كبيرة قوي كما تقول إن شاء الله.. ساعتها يا عم لك سبحة ومصلية هدية.. ده أنا رايحة أحج يا جدعان مش أي كلام!.. أسعدك الله وبجد يا رب أكون على قدر هذه الثقة التي تتكلم بها.. صباحك فل
:)

-----------------------


لماضة: شوفي وأنا بارد على تعليقك سامعة أم كلثوم بتقول إيه؟؟.. وكفاية بقى.. تعذيب وشقى ودموع في فراق ودموع في لقا!!.. خلاص والله حفظت إني فقرية!- عسل أنا عارفة- لا يا دكتورة ما انا رجعت في كلامي بقى.. شفتِ عاقلة من يومي!.. ربنا يخليكِ يا جميلة وما يحرمنا ولا يحرمك من لماضتك
:)

---------------------------------

هبة ربيع: صباح الفل.. منورة المدونة يا هبة.. آمين يا رب وإنتِ كمان ربنا يحقق لك أمنياتك.. وشكراً على رأيك يا جميلة.. ربنا يكرمك
تحياتي
:)

---------------------------------


طهقانة بسكوتة
صباح الفل.. كان يوم التاجين فعلاً!.. هو مش ما فيش أمل.. هو في أمل بس محتاج تنفس صناعي!.. ربنا يسترها.. منورة يا جميل.. إلى اللقاء إن شاء الله
:)

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي