أحلى سلام للوسادة الخالية!ا

مجرد فضفضة.. احسبوها زي ما تحسبوها!ا

أحلى سلام للوسادة الخالية!ا


عزيزي المواطن عبد الحليم حافظ..

من مدة لم أستمع إليك- وحشتني يا عم-، ولا أدري لماذا عندما عدت للاستماع إليك اخترت "أي دمعة حزن لا"؟!.. ربما لأن صوتك وأنت تقول "أي دمعة حزن لا لا لا.." فيه تحد غريب.. تحد لم يمنع دمعي من محاولة التشويش على الكلام الذي أكتبه على صفحة "الوورد"!.. اسكت يا ليمو، بالمناسبة.. مش نزلت ويندوز جديد!.. الويندوز القديم كان يستنجد.. "ارحميني!"، طبعاً مش عارف يعني إيه ويندوز، طبعاً ما إنت مش زيي ليسانس آداب وتربية قسم إنجليزي.. بتقدير عام جيد جداً على الحرك رك، والمدارس عايزة الخبرة، زملاتي شاطرين برضه، ومعاهم مرتبة شرف كمان.. بس اللي اشتغل في مركز كمبيوتر، واللي اشتغلت في الدروس.. واللي اشتغل عامل في شرم.. واللي.. واللي.. واللي حب وما طالش!ا


نزلت الويندوز- لا ما اشتغلتش في النجارة يا حليم!- "الكاشير" كتب على الفاتورة 20 جنيه.. كان المهندس قايل لي 15 جنيه قبلها، فتحت الشنطة، باطلع الفلوس.. "حضرتك قلت 20؟!".. نظرت بكسوف للمهندس.. "هو مش اتفقنا على 15؟!"- سترد واحدة رقيقة، ياي على 5 جنيه!.. ومواطن تاني غني غنى فاحش "يعني إيه 5 جنيه!"- زي الشلن على أيامك يا حليم! تعني حاجة والله بالنسبة لناس كتير!.. أي نعم هم لا يصلحوا ثمناً لوجبة عند أونكل كنتاكي.. أو ماك.. أو تلك الأسماء الماجنة.. وأيضاً لا يصلحوا كرسم لدخول سينما محترمة؛ لمشاهدة فيلم قليل الاحترام لحمادة البرنس أو أي حد برنس.. وكمان لا يصلحوا رسماً لدخول مدينة ملاهي محترمة، أو حتى ثمناً لمضاد حيوي ابن حلال- ما سبق يعد تشاؤماً- لكن بالتفاؤل:- الخمسة جنيه فيها 20 ربع جنيه! اكتشاف!.. الخمس جنيهات من الممكن أن تدخل مريضاً عيادة خيرية ويتبقى له نصف جنيه يشتري به عصير قصب- أيوة يا عبد الحليم البلد لسه بخير!- من الممكن أيضاً أن يشتري بهم ثلاث سندويتشات كباب وكفتة من عند حاتي نؤنؤ.. أو أبو شنب.. ويتبقى له نص جنيه ممكن يفرح به العيل ابنه ويشتري له كيس "...".. و النقط أعني بها هنا كيس كاراتيه معفن مليء بالمواد الملونة وبعد الشر اللي فيها بلهاريسيا العصر- أيامك كان في بلهارسيا، الآن الشعب ثقافته انجليزي.. النونو بقى اسمه كانسر!- وجعت دماغك؟.. نسيت أقول لك إن الخمسة جنيه ثمن أجرة المواصلات بين الزقازيق وطريق الشحططة وصيد لقمة العيش بالصنارة والمجد والشهرة بالقطارة!.. طبعاً القاهرة!، على فكرة بمناسبة الأغاني.. لازلت أستمع لأغنيتك (التحنيسية)- غير التحميسية حضرتك!- "بالأحضان"! بأي قلب فعلاً كنت تغني بهذا الاحساس؟!" ياما شفتك ع البعد عظيمة، يا بلادي يا حرة يا كريمة.. وزعيمك خلاك زعيمة!".. طبعاً واحد يتريق "زعيمة عصابة؟!".. بالأحضان؟.. يا مصانع.. يا مزارع.. يا مداين.. يا جناين.. بالأحضان.. نور عيني وحبايبي.. وعزاز قوي على قلبي.. ياللي على الجرار وقصاد لهاليب الصلب!- أنا باشتغل في حديد عز لا مؤاخذة!- فكرت في أن أحضن كل ما حضنته وأنت تغني.. اكتشفت اكتشافاً عبقرياً.. هو أنه لم يعد لدينا ما نحتضنه، حتى – لا مؤاخذة- لم تعد لدينا رفاهية الخيال الكلاسيكي الرومانسي في حضن المخدات- وأحلى سلام للوسادة الخالية!- والتي يا صديقي لم تعد من "أجود أنواع القطن المصري الطويل التيلة". المخدة التي قد يحتضنها المواطن عوضاً عن حبيبته- مصر طبعاً!- أصبحت تنجد بالشراشيب- بقايا قماش الخياطين مفرومة!-وسائد محشوة بالشتات، على الأقل زمان كنت يا عبده تحط صورة لبنى عبد العزيز على المخدة وتحضنها بقلب جامد في الفيلم – كان اسمك صلاح أياميها- كانت المخدة فيها قطن مصري، حتة من مصر،يااااه وطني من يومك يا حليم!ا

.. وختاماً كل سنة وأنت طيب.. واحنا كده..!ا

.

Comments

Unknown said…
الله ينور يا مروة هو انتى يا بنتى من غير حسد والله كل كلامك كدة فى الجون؟؟؟ على فكرة بجد كل مقالاتك فى اى حتة حلوة اوى جدا خالص وبص وطل يشهد علية...الله ينور يا مروة يا جمعة انا فخورة بيكى يا بنتى والله
مروة
بجد تسكتى تسكتى وتجيبى من جوه

أنا برضه مش عارفه ليه
كل ماشوف فيلم "الوسادة الخالية" ولا اسمع حليم الساعة سته على أغانى إف إم وأقارن بأغانى اليومين دول من عينة خد قلبى وخد عيونى وخد كل حاجة وأمشى أنا حافيه- طبعاً مفيش غنوة كده بس قصدى الأغانى اللى فيها التضحية بزيادة- ولا لما أشوف مسلسل تركى من عينة "سنوات الضياع"-ربنا مايحكم عليكى!- ولا لما أشوف الخمستاشر طرحة على راس بنوته ومن تحت بنطلون اتحشرت فيه حشر ولا لما ست كبيرة تكاد تخلع كم الجاكيت اللى أنا لابساه عشان ربنا يخلينى ويسترنى وآخد منها مناديل زينه بالإكراه ولا الست اللى وقفت مترددة تجيب بلوك النتيجة اللى باتنين جنيه وخمسه وسبعين ولا بلاها حساب للأيام السنة دى.. ولا ولا ولا
باحس إن زماننا بقى هضمه عسير ..بقى فج كده وألوانه غير متناسقة بالمرة

شفتى! كل ماقرالك بتشجعينى ع الكلام
مع إنى باقول ياقلبى ياكتاكت يامانت شايف وساكت! بس ده على سيرة حليم والخمسة جنيه الزيادة وعذاب البحث عن وظيفة... ربنا يعلم أنا بادعيلك قدايه.. ربنا يكرمك ويوقعك ف ولاد الحلال بس
باحب أقفلها بحاجة تبعث ع التفاؤل

رحت بنها للمرة الأولى وأضفت إلى معلوماتى إن وسيلة المواصلات الرئيسية هناك هى مينى ميكروباص كده وأجرته ربع جنيه!!! كمان أكلناأحلى سندوتش فلافل وكان بنص جنيه

لسه الدنيا بخير برضه.. بس ف حتت حتت
بذرة امل said…
يا يامروة جيتى على الوجع
لما حكيتى عن صحابك اللى محدش فيهم حقق اللى هو عايزه
Unknown said…
الله عليكي يا ست
لما بتكتبي حاجه بمزاج بتطلع زي الطبخه بالظبط
مظبوطه ومتكلفه
زي دماغك يا مرمر
تسلمي حبيبتي
ايدك على خمسه جنيه حق التعليق
Ahmed elshebli said…
bossy ya marwa ya bnt khalty
ana faker sanat 97 we ana filgam3a
kont barkab el2atr men elgamaleya
lilmansoura
litanta
lishebeen elkoom
3ashan awafar 2 geneeh
3ashan el pegioh kan be 6
dlwa2ty ya marwa ya bnt khalty
we hena
in usa
momken masalan at3asha be 30 dollar
yb2a masr fe3lan bekheer
en 3ashwa wa7da hena kanet tkafeeny aroo7 elgam3a bel3arabeya tool elsana
shofty e7na rokhas ezay?
وعجبى

وااة وميت مليون الف ااه

وع الوجع والجرح اللى بتتكى علية يامروة يابنتى

شكلى كدة بندب صح

ههههههههههههههههههههه

طب سلام بقى قبل ما الناس تتلم علينا ..
Unknown said…
الله يرحمه عبد الحليم بجد جبار جدا
تقبلي مروري
كويس ان أول زيارة ليا كانت في موضوع شدني
مودتي
أنتظرك
عمرو said…
يا أما تدوينة واحدة فى كام شهر يا أما 17 تدوينة فى الثانية !!

:)


كويس !


بالمناسبة, ابقى سلميلى عليه, مش عارف ليه وحشنى مع انه كان لسه معايا امبارح !!
Anonymous said…
استاذه مروه
صباح الورد والفل والياسمين
اولا تعرفت على مدونتك الرائعه عن طريق الصدفه حيث انى كنتى اقوم بالبحث على موقع الياهوو عن كتب للاستاذ الراحل عبد الوهاب مطاوع رحمه الله ولاقيت مدونتك فى نتائج البحث
ولكن الغريب انى ما ان دخلت المدونه حتى قضيت بها ساعه حتى كتابتى لهذا التعليق اقرأ
المدونه جميله جدا جدا جدا بدون مجامله وليس من عادتى تصفح المدونه كاملا الا فى حالات نادره منها مدونتك ان شاء الله
اتمنى استمرارك واتمنى لك كل السعاده
وصباحك ورد
مختفيه فين؟
امبارح سمعت حليم
و"ابقى حاول حاول حاول تفتكرنى".. فافتكرتك

ماتغيبيش كتير لو سمحتى.. باقلق
تصدقي يا مروة لما جمعت بذكاء بلاغي جميل بين عبد الحليم والويندوز حسيت إنه زي أي حاجة في دنيتنا منفدة على بعضها ومأثرة في بعضها


مروة بجد وحشتيني وبسلم عليك دايما مع هبة وهي كمان وصلتلي سلامك

نفسي أشوفك مرة، وياريت تزوريني في مدونتني
mostafa rayan said…
هذه التدوينة يطلق عليها الكوميديا السوداء - من كتر همنا وخنقتنا بنضحك -
بس عارفة اسم مدونتك وطريقتك الساخرة فيها فكروني بفؤاد قاعود الشاعر العظيم كان بيكتب بعض الأشعارالساخرة في باب في صباح الخير
كان يطلق عليه ( صباح الفل )
صباحك فل وورد دايما
السلام عليكم ورحمه الله وبركاته

ازيك يا مروه والله بجد وحشتينى جدا
سامحينى انى متابعتش موضوعاتك من فتره كان فيه ظروف بالمنزل عاوزاكى بس تدعيلى يا مروه وابقى طمنينا عليكى علطول وان شاء الله لى عوده لمتابعه وقراءة الموضوعات السابقه
R-H-S said…
جميل اوي البوست دا
تسلم ايدك
تحياتى
Unknown said…
الله الله
ما شاء الله عليكى
أ/ مروة

كلام حلو اوووى
و عجبنى طريقة الكتابة

خصوصاً الحتة ديه

الأغاني.. لازلت أستمع لأغنيتك (التحنيسية)- غير التحميسية حضرتك!- "بالأحضان"! بأي قلب فعلاً كنت تغني بهذا الاحساس؟!" ياما شفتك ع البعد عظيمة، يا بلادي يا حرة يا كريمة.. وزعيمك خلاك زعيمة!".. طبعاً واحد يتريق "زعيمة عصابة؟!".. بالأحضان؟.. يا مصانع.. يا مزارع.. يا مداين.. يا جناين.. بالأحضان.. نور عيني وحبايبي.. وعزاز قوي على قلبي.. ياللي على الجرار وقصاد لهاليب الصلب!- أنا باشتغل في حديد عز لا مؤاخذة!- فكرت في أن أحضن كل ما حضنته وأنت تغني.. اكتشفت اكتشافاً عبقرياً.. هو أنه لم يعد لدينا ما نحتضنه،
--------
صحيح نسيت اعرفك بنفسى
مدون على باب الله
كان ليا مدونة
و قررت انشطها
ياريت تشرفينى فيها
انا ضفت مدونتك
فى الليسته عندى
بإعتبارك مدونة عتيدة

ياريت تنورينى
صحيح انا احمد بدراوى اللى بيضيف صور عمرو سليم
بس بعيد عنك واخذ اجازة من الفيس بوك
شوية و حتواصل من خلال المدونة

سلام
اه اللينك

http://ta3melboyout.blogspot.com/
five stars said…
كلام جميل بالاضافة لجمال عبد الحليم حافظ طبعا , بس في سؤال في ليسانس اداب وفي بكالوريوس تربية ايه بقي ليسانس آداب وتربية قسم إنجليزي ؟
دا انجليزي دا يا مرسي
وعموما بالتوفيق
five stars said…
كلام جميل بالاضافة لجمال عبد الحليم حافظ طبعا , بس في سؤال في ليسانس اداب وفي بكالوريوس تربية ايه بقي ليسانس آداب وتربية قسم إنجليزي ؟
دا انجليزي دا يا مرسي
five stars said…
This comment has been removed by the author.
صباح الورد يا مروة، وربي يسعد أوقاتك، ويدينا العمر ونشوف من تاني أجدع وسادة تخلينا نستعيد أحلامنا اللي ضاعت..
Yasser Hussein said…
موضوع جميل
في انتظار المزيد
:)
خالص التحية
ابنك يقولك يا بابا طلع النهار
ابنك يقولك يا بطل عاوز الفطار
و صورة للشعب المهزوم تحت الراية المكسورة
زى الفل
حليم وايامه ومخدته مش سعد الصغير وحماره وشعبان وريسوه
قرأت صدفة ما تيسر لي من كتاباتك
الحقيقة تعكس الواقع المعاش بصدقا
و نفس السؤال أطرحه على نفسي خصوصا المدة الأخيرة
أحسن حل الواحد يغير النظارة حتى يتغير المشهد ومعه يأتي الجديد" المنتظر" يعني
أردت بكلمتي السريعة التحية والتمنى .....
www.hs10121962.jeeran.com
R-H-S said…
انتي فييييييييييين؟
momken said…
تسلم ايدك يا مروة

الا قوليلى صحيح

مين عبد الحليم حافظ

دى مدون...(زميل يعنى)ولا تعرفيه من النت

احنا قربنا نينسا حتى الرومانسيه وكلام الاغانى

تحياتى
www.tadwina.com said…
مرحباً >،
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/959

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.

و لكم جزيل الشكر،
فريق عمل تدوينة دوت كوم.
http://www.tadwina.com
-_- said…
اه يا حليم
السلام عليكم
تعلق خفيف لانى اول مرة ادخل مدونتك
جميلة جدا المدونة
سلام
Tears said…
رقيقة جدا مدونتك
micheal said…
يا سلام لو أدخل ألاقي بوست جديد
:)
rashida said…
ايه الدماغ دي .. يا روقانك

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي