Tuesday, March 13, 2007

ما أعرفش


تسألونى مالك ؟..أقول ما اعرفش ..كل يوم نفس الملامح ..نفس الدربكة الدماغ ..كل حاجة شبه بعضها ..زميلتى سألتها عملتم ايه؟..قالت كلنا جبنا زى بعض ..تقديرات الدفعة واحدة قلت لها يظهر ان قنبلة هيروشيما الذرية نزلت عليكم فخلتكم شبه بعض ...طيب ..الصبح على قنطرة التسعة قرب موقف الجامعة أجد سيدة متشحة بالسواد معفرة وحالتها مزرية ..نائمة على الكوبرى تصرخ "جعانة والنبي جعانة .."اليوم التالى ..نفس السيدة "جعانة والنبى جعانة ..جعانة وطبعا عندها طاقة غريبة ..من أين واتتها الطاقة على الصراخ وهى جوعانة ؟..ده الواحد لما بيبقى جعان بيبقى مش قادر يطلع نفس ..جايز بتطلع تصبيرة بين الحين و الآخر فى الخباثة من تحت العباية ..."المشكلة انه مافيش ابداع كل يوم نفس الجملة ...الست المجاورة مبدعة حقيقى مرة تضع فى يدها شلن"يعنى 5 قروش "ومرة بريزة ..ومرة ربع جنيه ..ومرة تحط جركن ميه صغير ومرة تحط إزازة حاجة ساقعة" ميه برضه .."كل حاجة شبه بعضها ..25 سنة وأكتر شبه بعض ..سنوات مضروبة بقنبلة ذرية من عينة هيروشيما وناجازاكى ..تفتكروا امتى هنتغير بجد ؟...أقولكم ..إن غد لناظره قريب..كلام جرايد بقى ..!1

1 comment:

Diyaa' said...

مبروك علي أول خطواتك الخجولة في التدوين ولو أنك عمتلي مدونة قبل كده وشكلك نسيتي الأكاونت اصلا
عاجبني التفاؤل اللي كله طيبة اللي معنونة بيه مدونتك
اول بوست تعليقي عليه بسيط
تقدري انتي تغيري الملل ولو استسلمتي تستاهليه الصراحة يعني البني ادم فينا بيعشق الاستسلام
مبروك علي البوست الأول وعقبال الأول بعد الألف
سلام عليكم