Thursday, March 22, 2007

مبارك يرسم لنا مستقبلا...


فى يوم من أيام شهر فقراير الماضى كنت كعادتى افسد متعة صديقاتى النازحات من السرفيس لأنزل عند بائع الجرائد الشهير اتصفح الكتب ..والجرائد "المتكومة اتخيلها مرصوصة عندى على الكنبة الموجوده فى الصالة ..على مكنة الخياطة القديمة ..تحت السرير ..تحت المخدة ...المهم أقراهم كلهم ..تخبطنى المانشيتات ..تجعل قلبى مزأططا ..."شجاعة مبارك فى التعديلات الدستورية ..الخطوات الاصلاحية على الطريق ..-يظهر انه طريق مقطوع -طبعا حاجة جميلة واوريجنال جدا جدا ...ده غير صور البنات الحلوة ...وعفريت السيدة زينب ..والجن اللى جاب فيرس انفلونزا الطيور للبلد...سيبكم من المانشيتات ..أنا لقيتنى فجأة ببص للسما ...لفوق ...لقيت لوحة دمعت منها -والدمعه تكفى لحلة كشري- بصرت ودققت كثيرا لكنى لم أجد ابدا صورة اجمل من الصورة المعلقة ..ايه الفخامة والعظمة دى .."إذا كان القدماء صنعوا لنا حضارة ..فمبارك يرسم لنا مستقبلا ..!"...جملة معبرة وفيها معانى راقية راقية ..تفتكروا الواحد لو شاف جملة زى دى فى الطريق العام يعمل ايه ؟؟1-يمشى ويعمل نفسه مش شايف ..2-يفتح بقه ويحملق فى اللوحة ..3..-يبكى -من الفرحة لأن مستقبله بيترسم بالألوان ..؟؟..

أعتقد أننا يجب علينا ان نفرح لأن مستقبلنا بيترسم ..والرسم بياخد وقت خصوصا لو كان بالألوان الجواش ...ربع قرن مش كفاية ..الرئيس الفنان مازال يفكر فى مناخير مستقبلنا ..ياترى شبه مناخير جوليا روبرتس ولا ستيتة بنت بهيجة ...ويا ترى عيون مستقبلنا ..ززى عيون زكيبة العمشة..ولا عيون ملوخية الخضرا -عايزينها تبقى خضرا - ..الفم بقى يا جماعة تفتكروا يترسم بسوستة ولا يتقفل بغرز ؟..حاجة محيرة ..الشعر بقى ؟ حاجة محيرة فعلا فعلا...الرسم فن ياجماعة ..الحمد لله المرحلة الأولى من الاسكيتش الملون أسفرت عن رسم وتلوين 34 مادة من الدستور ..عموما الفنان فنان واذا كان القدماء صنعوا لنا حضارة ...فنحن أمام مستقبل مطبوخ بدقة ..مرسوم بريشة الفنان مبارك ..فنان الشعب المنحوت أصلا ...!!1

6 comments:

Diyaa' said...

اشك إن مبارك يعرف يرسم أبعد من توريث ابنه
وحتي دي بيرسموها الحرامية اللي حواليه اللي واكلينها والعة
عايزين حد يتحاموا فيه لحد ما يستنزفوا كل الخير اللي في البلد
صراحتك بساطتها هيا اللي بتخلي الواحد يكمل للأخر
بس شوفيلنا حل بقي للوضع ده
عايزين نسيبها ونمشي بدل حرقة الدم دي

مروة جمعة said...

والله يا ضياء الراجل بيعمل اللى عليه احنا اللى منفسنين منه ..ماحدش عنده الجرأة انه يمسك ريشة ..ماتحرقش دمك وروق كده هتبقى فل !1

nour said...

يخرب بيتك
يا بت بقى فى قانون ارهاب دلوقت يعنى هياخدونا كلنا تحرى يا معلمه
و الله انت مش هتتهدى الا لما تروحى المعتقل
:)))
طبعا عندك حق فى كل اللى قلتيه
معلمه يعنى

مروة جمعة said...

مساء الفل يانور
هو فيه بيت لما يتخرب اصلا ...الله يخليكى انتى اللى معلمة يا جامدة ربنا يوفقك

فبركة said...

هايل يا مروة

Asad said...

المهم بقى إن عم طلعت حط الناحية التانية صورة للسيدة الفاضلة أوي سوزان مبارك , لسة بقى صورة المحروس جمال بيه بس المشكلة إن دي ملهاش مكان إلا مدخل حمام الجامع !!