كل سنة و "بريد الغلابة "طيب






رأى ...لولا اختلاف الرأى يا محترم



يااااااه ...من كام يوم كان 29 مارس ..صحيح ؟..ماذا يعني هذا اليوم يعني ..عيد الأبوبة ..؟!..بيحتفلوا بيه بعد عيد الأمومة ...مثلا !.لا لا ..اليوم ده ذكرى ميلاد صفحة بريد الغلابة ..صفحة "رأي "..سنة على ميلاد شقتي الصغيرة فى عالم الصحافة فى "الدستور" الأميرةالأثيرةبنت الأصول ...التى كثيرا ما ساعدتنى فى دفن فلول اليأس التى أستمتع بخنقها ..-مابحبش الدم !-سنة أقول فيها ل"محمدين " كل سنة وانت طيب يا"محمدين "أقصد طبعا "محمد هشام عبيه "والرسام الجميل "محمد عبد الله "اللى فعلا كان ربنا فى عونة خلال سنة رسم فيها بأعواد الفل هموم القراء بالفعل ..و"محمد هشام عبيه "الذي صدر لنا أجمل شجيرات الفل الصغنونة على باب فيلا "صاحبة الجلالة "-مش أنا طبعا !- .كان ربنا فى عونه هو الآخر ..كام ايميل وكام بريد ..وكام موضوع حلو وكام موضوع مستفز-مواضيعي طبعا !-..كم شجرة فل زرعها ...كم موضوع طنشه أو كان دون المستوى ليّ..."كتيييييير"..



الطريف انه خلال هذه السنة ناس عرفوا ايميلي عندما قرأوا موضوع لي ملفوفا بيه ساندويتش "الفول ورانا ورانا !"...عادى ده فخر طبعا ..وناس كانوا فاكريني واسطة ..منهم دون ذكر أسماء "محمود عصام "بعت لى ايميل لازلت أحتفظ به ..ليه ؟..ما أعرفش ..هذا جزء منه"الحقيقه انا بهنيكى على كلامك وعلى الفلم حتى لو كان ابيض واسودبس عندى كلام كده محشور في زورى بقالو كتيرهو ايه السر فانك بتنشرى فالدستور بطريقه متكرره..انا مش شامم ريحه حاجه لا سامح الله
الدستور مفيهاش الكلام ده لكن انا حفظت اسمك من غير ماخد بالى..." انا قلت كل حاجه بااااااااااااااى محمود عصام
طبعا عبده الرزل اللى جوايا ما بطلش زن بعت له رد شكرته فيه وقلت له بمنتهى الرذالة بالنسبه للنشر فى الدستور فأناوالله ماليش حد اعرفه فى الوسط الصحفى ,وبعدين متكرر يعنى اسلوبى وحش ؟..ولا عشان بتشوف اسمى كتييييييير؟؟ معلش غير الاسم لو مش عجبك هههه...على فكره انا قريت لك شعر فى الدستور .. وجميل ...اشمعنى بقى ؟...انت تعرف حد هناك ؟.طبعا رذلة ورخمة طبعا ..رغم انه قال انه مش شامم ريحة حاجة وكلامة كلة تلميحات "ما اكونش قريبة الجدع محمد هشام عبيه ؟"..ممكن برضه يبقى جوز بنت خالتى -اللى هى خالة ماما -أخت جدتى الجميلة ...الست "لوزة "تحديدا!-بالمناسبة هو محمد متجوز أصلا ؟!- الغريبة إنى فعلا لاكنت شفت محمد هشام عبيه ..ولا كنت أعرفه معرفة شخصية ..كل ما كنت أعرفه ان الراجل اللى فى الصورة يبقى رئيس "ريس ..!"صفحة بريد القراء ..وانه جاري -دقهلاوي -ودمتم صباح الفل ..صباح الفل...محمود عصام يرد "هو طبعا اسلوبك مش متكرر ولا حاجه بس انا شوفت اسمك كتير لدرجه انى حفظته انا بعت الف قصيده نشرولى واحده اللى اداك يدينا باى .."طيب توقف عبده الرذل عن الزن ..مش مشكلة ..خلاص..أمري لله ..حتى بعدها توقفت عن الكتابة ..حالة كئيبة وظروف كئيبة واجهتنى ...وبعدها عدت ابنة لصفحة القراء ...فى الحقيقة كان "محمدا "مشجعا لى فى البداية -والى الآن طبعا- بايميلاته القصيرة التى تحثني على الاستمرار ...رسوم محمد عبد الله ..كانت تعطينى أمل ..رغم انها لناس مبوزة ..ومكشرة .. وناس ضاحكة أحيانا ..القراء جيرانى هم أجمل مافى الصفحة  





...آخر ما كنت أتوقعه هو حصولى على "الريشة الفضية "لشهر أبريل عن موضوع نشرلى يوم 19 ..قعدت أضحك عندما وجدت الموضوع ..مروة جمعة جريدة الدستور-19 أبريل مين دى ؟





Comments

ROMIL said…
يا محاسن الصدف
تصدقي أنا كمان كتبت في صفحة محمد هشام
كان شعور جميل أن أقرا أسمي في جرنال زي الدستور
والناس اللى تقرا الجرنال تقولى أنت حتتحبس قريب
وحيعلقوك وحاجات من اللى بتحصل عادي ده
تحياتي


ROMIL
الله يسهلك يا حاجه مروه
بصراحه انتي تستاهلي تاخدي جايزه الفرخه الذهبيه علشان موضوعاتك الجميله دايما

بس خلاص
علي راي عمنا حازم الحديدي
ميرسي من هنا لغاية الزجازيق يامروة.. هنا دي يعني المنصورة أو القاهرة!
بجد دي أحلى تهنئة جت لي بمناسبة مرور عام على الصفحة دعك من أنها التهنئة الوحيدة أصلا!
بس كون فيه حد عارف تاريخ ميلاد الصفحة وحابب الناس اللي كتبوا فيها زيك كده ده يخليني سعيد وأشعر ببهجت لا تتخيليها..ميرسي للمرة المليون.. وأشكر الصفحة أنها عرفتني بناس موهبة وجدعة زيك كده..صباحك فل وقصب سكر
Marwa Friday said…
روميل :أشكرك على تعليقك أما من ناحية الحبس فاحنا محبوسين خلقة فى مصيدة كبيرة شوية ..!ا

هيثم أبو عقرب :شكرا يا حاج هيثم جدا ..بس الفرخة الذهبية جائزة تحفة مع صابعين محشى بلاتين يا سلام الف هنا وشفا ..على فكرة اسمها بث خلاص!ا

محمد هشام عبيه :صباح السكر يا عم محمد يا جميل ..بجد أنا اللى متشكرة جدا من هنا "الزقازيق" إلى ماشاء الله يا -ريس- واخترناك اخنرناك .."دخلت فى مود المعركة"..ربنا يوفقك دائما وربنا يجعلك مبهجج على طول وفرحان ..وأنا كمان أشكر الصفحة انها عرفتني بانسان جدع وموهوب بجد زيك ..وشكرا على ال83 كيلو متر من الميرسيهات ..!ربنا يوفقك ..
الف مبرووك

الريشة الفضية
تطلع لها كام جرام ..
يعني تيجب لها قد ايه دلوقت



بس
بصراحة
احييك على اسلوبك الحلو

وكل سنة وانت طيبة
مبروك المدونة
وعلى فكرة
انا كمان اخدت الريشة الفضية
عن موضوع
من البلكونة اتحدث
بس بصراحة
عن معرفش عنها حاجة
ولا اعرف مين بينظمها
Marwa Friday said…
أكتب بالرصاص :الله يبارك فيك الريشه الفضية بتجيب دلوقتى تقريبا انفلونزا الطيور !..متشكرة جدا جدا

شمعي أسعد:الله يبارك فيك يا باشمهندس مبروك عليك الريشة الفضية وعقبال الفرخة الذهبية على رأى هيثم أبو عقرب
nohamy said…
كل سنة المحمدين طيبين و انتى بخير كمان
اعقبال ما تمسكى صفحة الرأى مكان محمد كمان
nour said…
و الله اصياة يا مروة ده محدش لاحظ عيد ميلاد الصفحه حتى الجرنال شخصيا مجبش سيرة بس ده ميمنعش انها صفحة جميييلو و دلوقت بقت احلى صفحة عندى بتعجبنى علشان مفيهاش اصتناع و تمثيل الوحيدة اللى كده دلوقت فى الستور مع كل احترامنا يعنى وممكن ده علشان الناس هى اللى بتكتبها و علشان محمد هشام عبيه هو اللى بيحررها
كل سنه و انتوا طيبين و طبعا انا كمان عرفتك من الصفحة دى و من صفحة بريد بتاعة اضحك للدنيا الله يمسيها بالخير بقى:))))
فبركة said…
هايل يا ارق ارزل اطيب اغلس قارئة اصبحت زميلة فى عالم الصحافة
لكن المهم من كل ده اخلاصك وطيبتك وموهبتك
تستاهلى كل خير مش لأنك صاحبة واجب ولا لأنك دايما عشرية وبتحبى الناس لكن لأنك مروة جمعة
افتكروا الاسم ده كويس يا جماعة لأنه بكرة هيبقى حاجة كبيرة أوى ى ى ى ى ى
سلام
Marwa Friday said…
بني آدم مع وقف التنفيذ : أمسك صفحة الرأي مكان محمد هشام فى حالة واحدة ..إذا كنت تتمنى لى الصلع المبكر لأنه ساعتها هدقق فى تفاصيل كل ميل وورقة جواب ..ربنا يعين محمد على ما ابتلاه ..بس أرجوك لو مسكت الصفحة بعد عمر ان شاء الله..-محمد هيكون رئيس تحرير مجلة كبيرةان شاء الله مش هيبص للفتات ده !-تجيب لى زيت جرجير
عشان الصلع ..!ا

نور : الله يكرم أصلك يا أجدع مين عرفتهم عن طريق صفحة البريد ..فعلا هي صفحة الغلابة يانور ونبضهم ويارب تفضل كده على طول ..مش هتيجى الزقازيق بقى ؟

فبركة :الله يخليك يا شريف كلك ذوق أخجلتم تواضعي ..انت فى الآخر بتقول افتكروا الاسم لأنه بكره هيبقى حاجة كبيرة "قول إن شاء الله"بس ماقلتش كبير فى ايه بالضبط ..جايز حد يعجبه الاسم ويسمي مصنع الشاي بالنعناع على اسمي ..عشان فيه يوم أجازة ولمة وكده..جمعة يعني ..!ا
Diyaa' said…
أجيبلك أنا زيت الجرجير واهتمامك بالصفحة بقي اهتمام تستاهلي عليه إنك تبقي إنتي اللي ماسكاها فعلاً ومبروك علي كل حاجة حققتيها لأنك من الناس اللي من قلبها بتكتب
مبروك عليكي وعقبال ما أحفي كده عشان تنشريلي رسالة في الصفحة اللي بترأسي تحريرها يا ريسة
وأنا عن نفسي عايز إسمك يتنشر كل يوم إيه المشكلة ..علي الأقل إنتي وصلتي ومش هتبيعينا :))
برسم علي كبير
كل سنة وبريدك وبريد الغلابة ومحمد هشام طيبين
سلام عليكم
Marwa Friday said…
أشكرك كثيرا ياضياء ..أخجلتم تواضعي بجد ..وان كان على الرسالة مافيش مانع أعمل على ورقة لحمة بريد للغلابة كويس كده بس الرسالة تكون مختصرة ...فاهم ..مختصرة ..كفاك الله شر الصلع ..ان ماكنتش أصلع أصلا! ا
Ghazalivitch said…
صباح الورد والياسمين, مساء الفل والنرجس علي احلي مروة في الدنيا, ربنا يخليلنا الاستاذة, بجد انا بحب قصصك اوي يا مروة ومقالاتك , وربنا يوفقك واشوفك كده زي هيكل ولا احسان عبد القدوس ولا الضظوي والفناجيلي, ايه اللي دخل الضظوي والفناجيلي هنا مش عارف, بس اهم مشهورين وخلاص, ربنا يوفقك ويكرمك بجد وميرسي اوي اوي علي احلي هدية قدمتيها للجمعية انك تحطي الموقع بتاعنا في اجمل واطعم مدونة في الدنيا, انا والهل ما صدقت لما بعتيلي اللينك بتاعها .
علي فكرة نفسي بجد تزوري الاقصر وتيجي تشوفي جمعيتنا والشباب بيعمل ايه لو لقي الفرصة , بس بعيد عن كدابين الزفة وبتوع الطبل البلدي, والله يا مروة شباب بيعطي كتير ومش عايز مقابل, كل ده علشان حاسس ان البلد دي بتاعته وان الناس دول اهلوا والاطفال الفقراء واليتامي دول اطفالنا واننا حنتحاسب عليهم.
وميرسي مرة تانية علي هديتك الجميلة ويارب كل اصحابك يشاركوا معانا ولو بالافكار, او يساعدونا ان مؤسسات او منظمات تتبني فكرتنا.
إبراهيم - الأقصر
hima333@hotmail.com

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي