كنت حاسس إني أنا وأهلي الأجانب ...! ا

كنت حاسس إني أنا وأهلي الأجانب! اا


الجيران من كل جانب ..كانوا أكترهم أجانب ..
انجليز حالهم يغيظ ..والعجايب كنت حاسس إني أنا وأهلي الأجانب ..! ا

لتحميل الأغنية انسخ الرابط...ا

http://songs.njom.net/music/arab/rm/abdelhaleem/abdelhaleem97.rm

**********************************

غدا الذكرى ال51 لتأميم قناة السويس ..."قرار رئيس الجمهورية بتأميم الشركة العالمية لقناة السويس البحرية شركة مساهمة مصرية!" سواء اتفقت أو اختلفت مع جمال عبد الناصر ..لايمكن أن تنسى التأميم ..قناة السويس التي مات فيها جدودنا ..أنا شخصيا رغم ولادتي بعد الحدث بثلاثين عاما كامله ..كلما اسمع هذا الخطاب أصفق بحماسة ..إحنا أممنا القنال ..إحنا أممنا القنال ..!..مهما اختلفت مع عبد الناصر ..اتفقت معه ..أو خالفته ..حتما سيحرك فيك هذا الحدث أحاسيس كثيرة..منها الحزن..الخوف ....ياترى هيبيعوكي امتى؟! يا خبر معقولة تتباع ..-تتخصخص أشيك!-لا ..آه ليه لا ..معقوله ...؟..يا شيخة بطلي تخاريف ! ا
**********************
صعب أن تتصور الحكاية بهذا السيناريو ..بعد نصف قرن من تأميم القنال في الإسكندرية ..يقف الرئيس مبارك ..معلنا عن القرار الجديد -من المنوفية أو شرم الشيخ - أعتقد شرم مكان لطيف !-قرار رئيس الجمهورية بتأجير الشركة العالمية لقناة السويس البحرية ..الحكمة تقتضي ان القنال يتأجر ..وأعتقد يا جماعة المكسب هيعود على مصر لما شركة أمريكية إسرائيلية متطورة تمسك القنال وتطوره ..مكسب الأمة محفوظ ..أيها الشعب ..إنكم تستحقون الحياة الكريمة وما اضطررنا لتأجيرها إلا من أجل الكادرات التي سأوقعها ..كادر لكل مواطن ..من أجل سرنجة نظيفة لكل مواطن ..حنفية مياه نظيفة لكل مواطن ..ياولاد كله هياخد اللي هو عايزة ..التأجير بشكل مؤقت ..تصفيق حاااد ! ا
الضغوط تزيد الوضع اكتئابا ...خاصة بعد أن تمت خصخصة مياه الريّ ..وقطع لسان كل محمد أبو سويلم ..يقول "كنا رجاله ووقفنا وقفة رجاله "..وخصخصة مياه الصرف الصحي ..-التي يعرف العالم المتطور كيف يمكن الإستفادة منها -مما اضطر المواطنين إلى تشميع دورات المياه والإتجاه إلى الفلوات -الصحراء يعني!- الضغط على الدلتا سيقل -مما يجعل رجال الوطن يفكرون في خصخصة رمال الصحراء!- خصخصة التعليم -عودة الكتاب-والمرافق-كله يستخدم الكارو الحنطور!- ..التأمين الصحي تمت خصخصته وعاد الناس للطب البدائي ..-أي تعويرة اكبسها ببن أو بتراب فرن !-وطبعا الغاز الطبيعي المصدر إلى إسرائيل سيرتفع ثمنه ..وسنعود للكانون وللفرن البلدي!..بنوك البلد بيعت بثمن بخس ..مشاريع التنمية تحتل كالعادة صفحات الجرائد القومية الملونة ..ولا تخرج من الصحف إلى الواقع ..من تلد امرأته ذكرا يخفي نبأ ولادته - لأن هناك مشروع تبادل ثقافي بين مصر وهولاكونيا(!) يتم بموجبه تبادل الأطفال الذكور مع حيوانات الزراف النادرة ..طبعا لفترة مؤقته !..السد العالي تمت خصخصته لحساب شركة عالمية ..ولم يتبق الا قناة السويس ..!..أعلن المستثمر الصغير -محمود محيي الدين- عن إن قناة السويس مجرى دولي من حق العالم كله ..ولذلك سنتبرع به للكرة الأرضية كلها ..ولا أحد يعرف أين ذهب إيصال التبرع ..والشعب يعلم انها خصخصت لكن
كالعادة ..امشي جوا الأسمنت يحتار عدوك فيك..ياللا حسن الختام ! ا
******************************
طبعا ماسبق خيال سوداوي أتمنى أن لا يحدث -وأتمنى لو حدث ألا نسكت!-..خاصة بعد سياسة البيع التي ينتهجها النظام ..آخرها بنك القاهرة ..ثم بنك مصر للعظيم طلعت حرب -لسه بيفكروا يبيعوه!-الذي كانوا يدرسوه لنا في الإبتدائي كابن لمحافظة الشرقية-ولد في القاهرة لأب من ميت أبو علي الزقازيق- بنى مصر جديدة حقيقية ..شركات الغزل والنسيج ..مصر للطيران ..السينما ..بنك مصر..أنشأ اقتصادا مصريا قويا في فترة الإحتلال ..أشياء كثيرة محفوظة ..أعمال كثيرة منقوشة بماء الورد في قلب مصر ..يتم بيعها من قبل من لا يخاف الله ولا يرحمنا ..كأن لم تشبع نهمهم كل هذه الملايين التي تصب في جيوبهم يوميا ..كأنها ستصطحبهم إلى قبورهم ..يا سلام ..المقبرة بحي ..ترابها دولارات ..سقفها رخام مطعم بالفيروز ..الكفن مبطن باليورو ..أما الجنيهات المصرية على الشاهد الرخامي ..حسبي الله ونعم الوكيل! يا خوفي لنرجع نغني ..نفس الغنوة اللي فوق لعبد الحليم ..والعجايب -مع اننا مش عجيبة!-كنا حاسين اننا إحنا الأجانب !اا
****************************
الأغنية .للشاعر /أحمد شفيق كامل
لحن /محمد عبد الوهاب

Comments


انا مبحبش عبد الناصر
لاسباب اقتصاديه بحته
بس بحترمه جدا
يمكن الحجات الي بحترمها فيه
اكتر من الحجات الي بعارضه معها فيه
بس الي عملوا فينا حسني مبارك
يخليني اروح قبر عبد الناصر
وابوس التراب الي مدفون فيه
yas said…
حلو اوى الموضوع
وحلوة اوى حكاية تبادل الاطفال الذكور بالزراف مينفعش بنات يعنى ههههههههههههه ولاانتى عايزة تتخلصى من الرجالة
انا ياستى مش عندى مدونة ومش ناوية اعمل
انا كنت فكرت بس بعد كده غيرت رأيي
انا مش عندى موهبة الكتابة للأسف هتقوليلى مش لازم ابقي فظيعة يعنى بس كمان انا مش حاسة ان حياتى فيها حاجة مهمه اكتب عنها يعنى هتملوا منى من الاخر
وزى ماصحابي بيقولوا انا بضحك لجوه وانا كمان باتكلم لجوه وبكتب لجوه فموضوع التدوين هيبقي بالنسبة لى فكرة فاشلة جدا
ويا مرمر لازم يبقي عندى مدونة علشان نبقي صحاب مينفعش كده يعنى
انا عرفاكى من زمان على فكرة ونفسي نبقي اصحاب
سلام
yas said…
اه نسيت هو انتى قصدك على ايه انه اغنية لعبد الحليم حافظ
كنت حاسس انى انا واهلى الاجانب دى اغنية
ولا ايه
عبد الناصر الرئيس الذى حكم مصر وتفانى فى خدمتها وخدمة شعبها
اقرأوا التاريخ وانتم تعرفوا
فعلا شكرا جدا جدا ليكى

http://resalamisr.blogspot.com/
Diyaa' said…
خيالك اللي سميتيه بالسوداوي..حسسني فعلاً أد إيه أنا غريب في بلدي...لما تلاقي واحد كل قيمته في الحياة إنه ابن دادي ونسيب للباشا وواخد كل حقوقه وزيادة .. وأنتي مش واخدة 1% منهم...يبقي فعلاً الخيال ده يكاد يكون واقعي مع بعض المبالغة المحببة منك واللي بحبها في أسلوب كتابتك
وجعك اللي باين في البوست حسيته بقوة وأسلوبك اللي حسيته بقي فيه خبرة أكتر اتمني إنك تحافظي عليه ومتبطليش كتابة وزي ما قال عمرو..هتبقي صحفية كبيرة :))
سلام عليكم وللأسف مش سمعت الأغنية
Reemo said…
رغم انى بختلف مع عبد الناصر فى حاجات
بس ده ميمنعش ان الراجل ده عمل حاجات كتير كويسه
بحييكى على البوست يا قمر
أنا قلت اعدى أسلم عليكى يا مروه
ميرسى يا حبيبتى لسؤالك عليا
وبجد وحشتينى خالص
قبلاتى
سندباد said…
جميل اوي البوست تحياتي
Anonymous said…
كالعادة مميزة وكلماتك مؤثرة
وانا واحد من الناس اللى بحب عبد الناصر من غير ما اعيش زمانه لانه كان قوى كل اللى عاصروه قالوا ده
كان قادر يواجه الدنيا بصوته وتحديه للجميع حتى لو تكن قوته تكفى مواجهة العالم
وده سر حب الملايين له فى عصره عن حق
اما الان فمن يحب مبارك ولا ابن مبارك
اللى اثار العز عليهم بتخلينا نحس انهم ملوك دولة اخرى غير مصر
الناس دى مش عارف بتكره مصر والشعب المصرى قوى كده ليه
نهايتة
تحياتى لكلامك الجميل يامروة
ماجد ابراهيم
Anonymous said…
كلام رائع طبعا فان كنا نختلف مع عبدالناصر او نتفق معه فسيظل رغم عن الجميع زعيما نفرح عندما نجد صورته على التلفزيون او نسمع احدى خطاباته على الراديو ورغم الحرب الضروس التى شنها السادات ومن بعده مبارك وأعوانهم على عبدالناصر الا انهم لم يستطيعوا الى الان ولن يستطيعوا ابدا محو حب الناس لهذا الرجل
اسف انى اطالت فى تعليقى .
بس معلش فى النهايه عندى سؤال مهم قوووووى هى القناه لسه ماتبعتش ولا ايه؟ هما لما يجبرونا نعدى منها السفن الحربيه ايام حرب العراق متبقاش بالذمه دى قناتهم واحنا مجرد حارسين ليها يحرسك ربنا من العين يارئيسنا يامطلع دينا وحارق اهلينا ومغرق اخواتنا وحارم اولادنا من التعليم والصحه واللقمه الحلوه

الخولى
البوست جاااااااامد

كالمعتاد

وكالمعتاد هقولك

روعة

تحياتي العمييييييييييقة

وتعليقي غلى البوست هيكون
(...)
أحتج بشدة على موضوع قطع لسان محمد أبو سويلم ده ...مين اللي يقدر يعمل كده؟ ، وحتى لو كان فيه اللي يقدر تفتكري مش هايقدر ان شعاره اتغير وبقي اجري يا محمد أفندي؟
صباح الورد
والتميز يا استاذه


الاختلاف مع عبد نالصر موجود لان فيه فكر ومنطق احنا معترضين عليه انما تقدرى تقولى فيه منطق ايه النهارده


على غرار اللوحه التى كتب عليه
القدس
فتحها عمر وحررها صلاح الدين...فمن لها الان


مصر
اسس اقتصادها طلعت حرب...امم شركاتها عبد الناصر

وباعها مبارك الان
بصراحة برغم عدم احترامي الشخصي لعبد الناصر لكن بغض النظر عن ذلك كان للمصريين احترامهم بره مصر


مع إنه كان مبهدلهم في بلدهم

أما دلةقتي فبابا حسني مبهدلنا بره وجوه


أحمدك يا رب
Marwa Friday said…
آسفة لتأخير الرد

محمود علي : إزيك ..طبعا أحترم وجهة نظرك ..وعندك حق ..منها لله أنفلونزا الطيور سبب كل بلاوي البلد! ا

ياسمين :إزيك يا سكر ..عجبتك الفكرة؟
لا طبعا مش لازم يكون عندك مدونة ..لكن ازاي اوصلك يا سمسمة؟..واقولك اكتبي ولا يهمك ..يعني احنا اللي محمود السعدني ..أهو على قدنا ..تحياااتي يا سكر ..آه دي جزء من أغنية لعبد الحليم حافظ..اسمها ذكريات

مواطن زهقان :أنا اللي متشكرة لأنك نورتني جدا جدا ..

ضياء : إزييك؟..فعلا الواحد حاسس انه غريب وهو في بلده ..معلش والله مسيرها تتعدل ..ياعم كاتبة كبيرة مين ..في السن ..ممكن! ..ربنا يتقبل دعائك ..تحياااتي

ريموووووو: أكسكلوسيف ..يااااه ازيك فينك من زمااان قوي؟..وحشتيني انتي كمان ..ربنا يكرمك يارب ..شكرا على مرورك

سندباد :أشكرك يا سندباد على مرورك وعلى مجاملتك ..منور
Marwa Friday said…
صحفي مشاغب جدا : كالعادة منور ..ومتميز في تعليقك ..أنا قلت العيب مش في نظامنا العيب في انفلونزا الطيور اللعينة ..هقولك ايه؟..عبد الناصر رغم كل حاجة كان بيحب البلد ..لكن هم بيكرهوا مصر ليه ؟..فيمكن لأنهم من الشركسية ..هي الشركسية دي نوع من الفراخ صح ..مش بقولك يا ماجد انفلونزا! ا

الخولي : صباح الفل ..عارف حرقة دمك مخلياني اشم رائحة الشياط ..عندك حق ..هي القناة لسه ما اتباعتش ؟..ربنا يتولانا ويهدينا ..تحياااتي ومنور

لو كنت أعلم : بجد زيارتك أسعدتني يا دكتورة ..والله يخليكي على كلامك الجميل ويارب أكون عند حسن ظنك ..تحياااتي يا سكر
Marwa Friday said…
أحمد حربية وسيد تركي : صباح الفل يا أحمد ..والله إحتجاج منطقي ..بس فين محمد أبو سويلم ..؟أكيد موجود ..في مكان ما ..يمكن احنا كلنا ..لكن إجري يا محمد أفندي تخص محمد واحد بس ..أظن إنك عارفه كويس ..طبعا من غير تفكير محمد سعد! منور يا أحمد

إحنا : منور يا أحمد ..تعرف سر وكستنا اننا ساكتين ..- والسكوت علامة الرضا طبعا - عاجباني جدا جملتك مصر
اسس اقتصادها طلعت حرب...امم شركاتها عبد الناصر..باعها مبارك الآن " بجد معبرة ..هي لسه مصر فيها احنا ..احنا ولاد النهادرده ..صح.؟

عصفور طل من الشباك : روبي الجميلة صباح العسل والورد ..بجد نورتي ..فينك من زماااان؟..شوفي يا عصفورة ..أحترم إختلافك مع عبد الناصر ورأيك في حكاية بره وجوه ..بس أنا بلومك لأنك ماسمعتيش اعلان المرحلة الحالية ..من جوه وبره نظافة أكيده كل مره ..يعني أبيض يا ورد ويافل!ّ ..مافيش خالص ..ربنا يكرمك
عليوه said…
مساء الورد عليكى اولا انا زيك تمام لما بسمع خطاب التاميم بس انا مش بسقف انا بلاقى نفسى بقشعر وبحس انى عاوز اعيط يمكن من الفرحة او يمكن لانة ما حصلتلناش حاجة حلوة من يومها غير حرب اكتوبر مش عارف علشان كل حاجة بقيت بلون اسود مقلم با اسود وفية نقط سودة زى ما قال كريم عبد العزيز كلها بقيت حاجات سودة من اول موت عبد الناصر كامب ديفد ورئاسة مبارك مرورابا الحاجات الجديدةغرق العبارة وحريق القطارات وقلب القطارات والكويز والتطبيع وحرب العراق ومعاهدات السلام فى فلسطين وتعديل الدستور والانتخابات النزيهة وحبس ايمن نور يمكن الحاجة الحلوة بين كل دة كانت انتصار حزب اللة اقوللك اللة يرحم عبد الناصر والسادات واقول لكل المعترضين عليهم انهم ملايكة وسط شياطين اليومين دول

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي