أكتوبر ..!ا

أكتوبر ..!ا


النهاردة 6 أكتوبر !..كل سنة وأنتم طيبين!..تعرفوا انه بداخلي حقد دفين على الواقفين في هذه الصورة؟..منذ زمن لم نرفع علم مصر ولم نعرف حلاوة النصر - احمدوا ربنا ان الرئيس مبارك لم يورط مصر لا مؤاخذة في الحروب ولا في المشاحنات ..كفاية ان شرم الشيخ بقت عاصمة مصر!-فاتت 34 سنة ..ماذا فعلنا بعد أكتوبر غير أوبريتات أكتوبر ..واول ضربة جوية فتحت باب الحرية ..واديها حرية تديك طراوة!...بداخلي حقد على شباب هذه الفترة ..كنت أتمنى أشارك في الحرب - مش لأني فقرية وغاوية حروب وخناقات!- ..أتمنى أن أصنع نصرا ..ويا سلام لو كنت تخيلتني أيامها في نفس سني هذه ..عبرنا القنال ..انتقمنا لشهداء بحر البقر ولشهداء 67 ..عندي احساس بالإكتفاء الذاتي من الفرح والنصر لدرجة تجعلني أطير ..أطيييييير!..أكتوبر آخر قادم لا محالة ..ولن تظل مصر مقيدة بقيود سبتمبر ..حقيقي أحس بهذا..لكن امتى ..العلم عند الله ..مش عايزة حد يقول اننا محررين ..لا ..البلد محتلة ..ماذا تسموا السكوت على ثلاثة شهداء على الحدود المصرية من حوالي بالضبط ثلاث سنوات!..البلد بخير والأمن مستتب والضربة الجوية قوية ومدوية والفضل للرئيس مبارك في النصر العسكري العظيم ..ولسلاح الطيران ..سلاح مشاة ايه ده؟ دعوة مني لقراءة هذا الملف المميزوالذي أعده "محمد هشام عبيه ونانسي حبيب"في مجلة بص وطل تحت عنوان "6 أكتوبر 6 ستات "...وربنا يديمها عليكم ذكرى حلوة!ا

____________________________

الأغنية ..للجميل محمد منير ،تتر النهاية لمسلسل نقطة نظام ..كلمات إيمان بكري

لحن البديع ..عمار الشريعي

Comments

Unknown said…
صباح العسل والفل يا جميل
ان شاء الله بكره احسن متقلقيش
المهم نعيد ترتيب افكارنا صح وترتيب اولوياتنا كمان
وربنا يرحم رجالتنا اللى ماتت فى 73
عموما
كله فى مصلحة الشعب
واخده بالك معايا
مصلحة الشعب

انا بشترك معاكي في الحقد ده يا مروووة
انتي فكرتيني بكلمه حلوه اووووي قريتها في مدونه
الشباب دلوقتي مستعدين يفحتوا في الصخر عشان ينجحوا
بس للاسف مش لاقين صخر
كل سنه وانتي طيبه
صباح الورد
اولا اعترض وبشدة على ان احنا معملناش حاجة بعد حرب اكتوبر
الدليل الذى رأيتة بعينى:قيام رجال القوات المسلحة البواسل بتغيير ماسورة صرف صحى بتوريل
وقد شارك فى هذة العملية مختلف الاسلحة من مواسير و مفاتيح انجليزى
وتحيا مصر حرة مستقلة بفضل تدريبات جيشها الباسل
وعجبى
مش دعايه للبوست والله يا مروه
بس شوفى كده وقولى رايك لانه ييهمنى طبعا مش زى استاذى محمد هشام


http://ensazaman.blogspot.com/2007/10/blog-post_8153.html
صباح الفل يامروه
انا كمان كان فعلا نفسى اكون موجوده فى الفترةدى
كنت اكيد هحس انى عملت حاجه بجد
بس انا حاسه بحاجه غريبه ليه حتى الاحتفالات بيوم 6 اكتوبر مش زى زمان كنت بحس بيه قبل كده قوى
المشكله عندى ولا هو فعلا كده؟
yas said…
مش عارفة معتش بحس ب6 اكتوبر زى زمان بقي يوم عادى واحلى حاجة فيه انه اجازة والاحلى ان اليوم ده كان محاضرة د.بندق والحمد الله مخدنهاش هى كانت يوم السبت مش اجازة يعنى بس احنا ضحكنا عليه وقولناله انه يوم 6اكتوبر قلنا لأ خلاص يبقي مفيش محاضرة علشان عيد تحرير سيناء ههههههههههههههههه معلش اصل مثقف زيادة عن اللزوم
بس احنا لو كنا عايشيين سنة 73مكناش هنحارب برضه يامروة علشان احنا بنات كنا هنبقي ممرضيين فى الهلال الاحمر وانا مقدرش اعصابي بتتعب من العيانيين ومحبش يبقي ليا اى علاقة بالطب هو انا صحيح دخلت علمى ليه وانا مكنتش عايزة ولاادخل طب ولا اسنان ولابيطرى تخيلى كان مفروض ادخل ادبي
يالا هعيد ثانوية عامة بقي وادخل اعلام ادعولى هههههههههههههههه
كل سنة وانتى طيبة يامروة
yas said…
نسيت اقولك
حلو اوى قبل ان يأكلنا الخوف
كتبتيه حلو اوى اسلوبك بقي اجمل وكمان معظمهم كنت بفكر فيه برضه
مش عارفة معجبنيش اوى الملف بتاع اكتوبر هما عملوا ملات احلى من كده زمان بتاع 11سمبتمبر كان تحفة بتاع اكتوبر مش اوى
يعنى ال6 احداث المفرحيين مش مقنعيين خالص تقربا مفيش احداث مفرحة فى تاريخنا فحطوا اى حاجة مش مقتنعة ان فوزدولةبالامم الاريقية يبقي من اكتر 6 احداث مفرحة فى تاريخ بلد حتى لو كانت مصر ولا حتى وصلنا لكاس العالم ممكن تكون حاجات مفرحة ساعتها لكن مش حاجة مستمرة للابد مش زى حرب اكتوبر ولا حتى تأميم القناة الحاجات دى اما بتشوفى اغنية عن اكتوبر ولا بتسمعى خطاب عبد الناصر ساعة التأميم جسمك بيقشعر لكن والنبي اما يعيدولك جون
حسام حسن هيحصلك ايه ولا حاجة طبعا
والحتة بتاعت العوائق حسيت بملل وانا بقرأها علشان كلها معلومات توجع الدماغ بس اكيد هما كانوا لازم يكتبوها يالا سلام بقي
فعلا وانا كمان يامروة كان نفسى اكون موجود
واضم صوتى لصوت سارة
ان الاحتفال ماعدشى زى زمان
شكلهم عاوزين ينسونا التاريخ
عشان مش نسىء لاسرائيل
Anonymous said…
مين اللي يحقد على مين
على الأقل إحنا عندنا ريس حكيم مش ممكن يحط إيده في بق الأسد
وعندنا ضربة نفتخر بيها
وعندنا استقرار
والأهلي بياخد بطولة أفريقيا كل سنة
وبيروح اليابان
مع " مطرب الثورة "
سعد الصغير
وعندنا الوطني اليوم
والواحدة صباحا
وممتاز القط
وفريق الصقور
وإذا كان مات مننا 3 على الحدود
في ملايين بتموت جوه الحدود
حتفرق على 3
اسامة يس said…
انت فكرك حد حارب الا مبارك حد عمل اي شيء الا هوه لا دا يبقى تقصير منك كبير لو افتكرتي ان في اي حد عمل شيء الا هوه ... بس ليه تحسديهم اغبطيهم وخلاص عشان نتمنى لو كنا معاهم ويكونوا معانا ....
ويارب تكون الايام الجاية خير...
لك خالص التحية
Anonymous said…
بوست جميل بجد وكلنا اعتقد بنشاركك حقدك على مش الى فى الصور كل الى كان على الجبهه ايامها
كل سنه وانتي طيبه بكل المناسبات الحاليه التي تاتي متتابعه
وانا موافقك تماما في الراي في الحقد او بلاش الحقد
ممكن حسد هؤلاء الشباب الذين اتاح لهم قدرهم ان يكونوا رافعي علم مصر في هذا اليوم العظيم
تحياتي
micheal said…
ما احنا برضه رفعنا علم مصر يوم 10 فبراير 2006
:)
تحياتي لكي
و كل سنه و أنتي طيبه
يادى النيله يا جماعه انا قريت الموضوع ده فى كذا بلوج وبردوا هقول نفس التعليق بجد نفسى نبص لقدام اوكى هنحتفل باكتوبر اه انتصرنا بس هنفضل لامتى عمالين نقول احنا انتصرنا واحنا اللى عملنا واحنا واحنا اولا قبل اى شىء توفيق ربنا ولانه كان معانا دايما هو اول اصباب النصر ثانيا لازم نبص بقا لقدام علشان كده كفايانا تاخير وتخلف ....اه بجد تخلف مش ملاحظين اننا خلاص عمالين نرجع لورا والريس ربنا يعينه من يوم ما طلعت على وش الدنيا وانا بسمعه يقول احنا عند عنق الزجاجه طيب انا نفسى اعرف الزجاجه دى العنق بتاعها كام سنه يعنى ولا ملهوش اخر يعنى نفسى بقا نخرج من الزجاجه دى اللى كابسه على نفسنا
yas said…
ميشيل
هو ايه اللى حصل يوم 10فبراير 2006
بس اكيد كسبنا ماتش صح
A long distance said…
كل سنه وانتي طيبه يا مروه
mrgkiller2020
فبركة said…
ألف رحمة ونور عليكى يا شيماء
اللهم أرحمها وأرحم كل موتى المسلمين
اللهم أرحمنا فوق الأرض وتحت الأرض ويوم العرض عليك
رجاء من الكل زيارة مدونتى وقراءة البوست الأخير
جزاكم الله خيرا
عليوه said…
عارف انى متاخر فى الرد بس بعذرى وان شاء الله مش هتاخر عن 6 اكتوبر اللى جاى واللى هيكون شكله زى اكتوبر ده من غير اى جديد ولا قديم والله يرحم شهداء اكتوبر 73 ويرحم شهداء ما بعد صعود الرئيس مبارك للحكم ما هو كلنا فى الاخر شهداء بس هما ليهم جنه الخلد واحنا لينا جنه مبارك
micheal said…
كسبنا بطوله افريقيا يا ياسمين
:)
حد ينسي برضه
:)

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي