صورينا.....! ا

صورينا....!ا

      يا واد يا تقيل!ا


      في اليوم الأول من "أسبوع فتيات الجامعات"،لم أفاجأ بكمية العساكر الذين طوقوا (ستاد جامعة الزقازيق).. فيما يبدو أنهم أتوا لأن الاستاد ممتلئاً عن آخره وكان لابد من منع الطالبات والطلبة الزائدين عن الحد المطلوب.. بالمناسبة كان داخل الإستاد "وزير التعليم العالي، ووزير التضامن الإجتماعي،ومحافظ الشرقية، ومحافظ المنيا و..!.. لن أتحدث هنا عن انهم يمنعون الطلاب عن (جامعتهم).. وأن الأمر فيه رائحة السياسة ومنع المتظاهرين- أقصد الداخلين- لجامعة الزقازيق.. ربما خوف على مصلحة الطلاب – خلي احنا نيتنا فل الفل- أحب قراءة وجوه العسكر- الغلابة.. الذين يموتون على الحدود.. ويقفون بمناسبة ومن غير مثل"الزنهار"- لأن هذا الواجب- كانت ملامح بعضهم مبتهجة "هييييه بقى أسبوع مزز الجامعات!"- عفوا أسبوع فتيات الجامعات- والبنات ألطف الكائنات طبعا- أجمل كائنات فعلا"مش لأني بنت!"- وها قد نزل من السماء كنز لهؤلاء الواقفين فوق التراب، فرصة للمعاكسات.. راقبتهم بفضول شديد.. أحدهم غنى عندما مرت فتاة "عيون القلب سهرانة ما بتنامش!"- راقي.. فاكر نفسه العسكري الصغير أخو نجاة الصغيرة!- مع أن الأنسب- في موقف كموقف العساكر أن يعاكسوا مثلا بـ"عيون الكلب سهرانة!"- البوليسي طبعا ما فيش غيره!ا.


      كنت أصور حشد العساكر- كلهم يطاردني في وجوههم أحمد سبع الليل البريء-.. سمعت أحد العساكر يهمس لزميله"إلحق.. إلحق.. دي بتصورك.. معجبة بيك!"- هابي فالنتين!-.. أمر مضحك أن أعجب بفتى أحلامي – العسكري الأخضر- وأصوره بمنتهى الجرأة في أسبوع الفتيات.. "باحبه يا بابا.. عايزة أتجوز ده يا أماي..!"ا..


      قلت لأحدهم "أنا هصور.. أظن عادي؟!".. فقال "يوووه ده إحنا اتهرينا تصوير!.. صوري.. صوري.. على الهم والغم اللي احنا فيه".. ثم قال وهو يشير إلى زميله الأسمر الصعيدي الملامح "ماتصوريش العسكري ده.. إسرائيلي!".. وجدتهم يضحكوا.. فقلت "صعيدي ولا إسرائيلي؟!".. فقال زميله "لا.. صعيدي من جنب السودان!".. صورت بحذر.. قال لي عسكري آخر ببراءة وكأن الزائرة المنتظرة.. قادمة إلى بلاد تركب الضفادع "هي صحيح.. صحيح.. سوزان جاية؟!.. سألت "سوزان؟!".. قال "أيوه.. سوزان مبارك!"- سوزان كده حاف يا عسكري.. أدبسيس!- قلت له "مش عارفة.. بس طالما أنا عرفت أوصل للجامعة، والمواصلات شغالة عادي.. والبلد سالكة يبقى هي مش جاية!".. لمحت نظرات الشماتة "أحسن أخذتم بمبه".. تركتهم وحاولت النفاذ من طريق آخر قالته لي صديقتي التي دخلت "الاستاد".. وجدته مغلق بالعساكر أيضا!.. يا مسهل.. سألت العسكري الطيب.."ممكن تعديني.. مش معايا متفجرات والله!".. قال لي ادخلي من هذه الحارة الجانبية.. قلت له بإصرار"طيب ما هي ..هي.. عديني من هنا لو سمحت!".. فقال" معلش.. ودنك منين يا جحا.. أوامر!".. سمعت رتبة فيما يبدو أكبر منه "إحنا هنتكلم مع الناس ولا إيه؟!".. قلت.."طيب.. طيب.. بلاش مشاكل!".. بعد أن حاولت النفاذ للداخل بكل الصور.. لم يعد أمامي إلا "التشعلق" فوق السور.. وطبعا كل سور عنده عسكري!.. مضيت بعد أن أوشك وقت الإحتفال على الإنتهاء.. وجدت رجل كبير سنا،يرتدي بدله عسكرية – فيما يبدو كان صول- ملامحه بدت مألوفة بالنسبة لي.. سألته نفس السؤال "هو ما ينفعش ندخل؟!".. قال"مع الأسف .. لا".. ابتسمت وقلت له.. "كل سنة وأنت طيب ياعم".. فقال مبتسما ابتسامة عذبة "وأنتِ طيبة".. أكملت في تردد "ده بمناسبة عيد الشرطة اللي كان من كام يوم كده!".. فقال لي منفعلا جملة الختام التي أضحكتني كثيرا؛ لأنها جملة الشعب؛ ولأنها جملة غير متوقعة من هذا الشخص بالذات..........ا
      ا "الله يخرب بيت الشرطة!"ا

    Comments

    هكذا الحال في بلادنا

    الشرطة اصبحت اكثر من الناس

    حسبنا الله ونعم الوكيل
    khobayb said…
    أسلوب - كالعادة - متميز وجذاب

    المأساة ليست في وجودهم بحد ذاته ، المأساة في جملة العسكري صاحب الأدب السيس ، وجملة الصول : "الله يخرب بيت الشرطة" ..

    إنهم يعلمون ويفهمون ، لكنهم قانعون بـ"ودنك منين يا جحا"

    لكن .. ما رأيك في أسبوع فتيات الجامعات ؟!
    ههههههههههههه
    والله بجد الناس دول بيصعبوا على وخصوصا النكت الى بتطلع عليهم بتثبت انهم اغبيه
    النكته بتاعت لما يروحوا اول يوم للتجنيد يقولوا الى بيعرف يقرا شمال والى مبيعرفش يمين
    بياخدوا بقى الناس الى بتتبقى فى النص عشان يحموا الجامعه من المخاطر العظيمه والعظيمه جداااااااااا

    مره وانا فى اعدادى - اعدادى ده بناخده فى الجامعه نفسها فى كليه علوم مش فى القصر العينى زى بقاى السنين- كنت داخل للجامعه والراجل بيفتش الشنطه قلت له والله مفيش فيها حشيش قالى لو فيها هعديك انا عندى اوامر مدخلش منشورات مش حشيش
    كنت هموت من الغيظ سعتها بس مت من الضحك هههههههههههههه
    only spot said…
    بجد بتوع الامن المركزى دول يصعبو على الواحد رغم انى بتنرفز لما بشوفهم جدا لكن اصعب شئ انك تنفذى اوامر بدون استخدام العقل والمره اليتيمه الى اتمردوا فيها على الوضع بتاعهم ده كان فى التمنينات ويا ريتهم اتمردوا على الى مبهدلهم لا دول طلعم على المحلات وكسروها يمكن عشان كده كتير من الشعب بيكره القطاع ده كره العما
    مع ان القطاع ده لو بجد اتعلم واتنور ممكن يبقى شوكه جامده فى وش الفساد مش اداه للفساد
    بالنسبه لاسبوع الفتيات سمعت انه صابو الفساد برده وكان فيه تحيز جامد لجامعه الزقازيق
    عموما تحياتى لاسلوبك الرقيق ودايما ممتعانا ببوستاتك
    تحياتى
    كل ده بيحصل كل ساعة في بلدنا في كل حته فيها

    ربنا يستر على الكل

    دمت بخير
    Anonymous said…
    الأخت الفاضلة : مروة
    السلام عليكم ورحمة الله وبركاته
    حقيقة أسلوبك رائع وشيق ..وتنبعث منه رائحة صحفية موهوبة ومشاكسة

    تقبلى تقديرى واحترامى

    أخوك
    محمد
    Unknown said…
    ههههههههههه
    طيب قوليلى يا مروه
    وهو بيقولك وانتى طيبه
    قالهالك بايده ولا برجله
    ههههههههه
    من ساعة ما اتغير الشعار وبقى الشرطه فى خدمة الوطن
    بقيت عماااااار يا مصر
    خليفتك فى الشعلقةونط الاسوار
    صباح الفل يا مرمر
    علوة said…
    عارف إني مش بيعجبني العجب
    وعارف إن نقدي دايما بيضايق
    بس هعمل ايه بقى طبيعتي
    ..
    بجد بجد تسلم غيدك ويسلم قلمك
    ايه ده يا مروة ؟
    جمعتي بين الرسم والتصوير
    التصوير بالقلم
    صدقيني انا سمعت الدوشة بتاعة الاستاد وانا بقرا الكلام
    بجد استمتعت
    صباحك فل
    مظلومين والله العساكر دول

    فى مره عندنا فى المطار

    قريب جدا طياره فرنسيه

    دخلت فى سور شركة البترول
    طبعا من داخل المطار

    الدنيا هاجت وماجت الحق ياعم

    الطياره لو كانت دخلت على الخزانات
    كان المطار ولع

    احنا طبعا كنا فى اماكن شغلنا بس الخب فى ثانيه
    بقى فى المطار كله
    قلنا نروح نشوف الموضوع ايه
    لقينا الدنيا هناك مقلوبه ومتعرفيش كم العساكر دول جم منين

    المهم عملو كردون حولين الطياره
    بالبراميل ولفين حولين البراميل دى شريط اصفر
    لافف حولين الطياره
    اليوم كان هوا جامد
    البراميل قعدت تطير

    واحد من الساده الضباط فكر فكره جهنميه
    وهو بيبص ع العساكر
    وقال ليه مانعملش العساكر دولل براميل
    ههههههه
    وياعينى عمل العساكر براميل

    والله الصور عندى
    لو الرد بيسمح بتنزيل الصور كنت نزلتها

    يلا معلش طولت عليكى

    تقبلى مرورى
    احمد سكر
    هما يصعبوا على الواحد


    بس المفروض يفهموا هما بيعملوا ايه

    لكن صعب نعرفهم بالغلط اللى بيعملوه

    وتحياتى
    Anonymous said…
    يااااااااه بقالي كتير مدخلتش المدونة بتاعتك ولما زرتها لاقيتها حافلة ببلاوى كتيرة

    بس والله العساكر اللى انتى صورتيهم بيأخدوا اوامر وبس الرك على الى بيدى الأوامر هو مين ؟؟؟

    طيب هو انتم سمعتوا عن الظابط سوري ده ملازم شرطة قصدى لسة خريج يعنى مبدأش حياته اللى توفي فى القناطر على ايد بتوع المخدرات ...هو لية مدام هو للسة ظبوط ضغير بيواجههم المفترض الظباط الكبار فين الله أعلم
    هو الصراحة الشرطة فى كل حتة وده شئ طبيعى واللى انا سامع فيه أن الصين هتصدرنا عساكر صيني عشان عملية القبض على المجرمين تكون سهله
    Unknown said…
    زى عادتك أسلوب يشد و يرسم بسمة طالعة من الألم ما اعرفش ازاى
    مبدعة بجد يا مروة

    ( أحب قراءة وجوه العسكر- الغلابة.. الذين يموتون على الحدود.. ويقفون بمناسبة ومن غير مثل"الزنهار"- لأن هذا الواجب- كانت ملامح بعضهم ) فعلا ساعات الواحد بيسرح بخياله و بفكر العساكر دول و لا بتوع الأمن المركزى من ساعة ما شفت فيلم( البرئ ) بس نكتة اوى العسكرى الى قال لزميله الحق بتصورك .. هابى فلانتين

    و الله بوست تحفة يا مرمورة

    و مساءك عندليب
    yas said…
    ازيك يامروة
    انا برضه مش فاهمة اسبوع فتيات الجامعات يعنى ايه واشمعنى فتيات ومفيش فتيان وبيحصل ايه فى الاسبوع ده ومادام هو للفتيان فيه فتيان حاضريين ليه بقي
    يابنتى وايه نزلك الجامعة انا اسبوع الشباب كان فى المنصورة قلت هيييييه اسبوع كمان اجازة ونمت فى بيتنا
    الزقازيق شكلها حلو
    يالا سلام
    بذرة امل said…
    ازيك يامروة
    بجد الكلية ملهاش طعم من غيرك
    مرة جدا
    بصى بجد انا خلاص هتجنن من البلد بتاعتنا دى
    على راى اخويا
    مقبرة مصر العربية
    اللى كل حاجة فيها ماشية بشألوب
    يابنتى كويس انك ما دخلتيش
    ده احنا جالنا يوميها ضربة شمس
    بذرة امل said…
    مروة ما تنسيش تجاوبى على سؤال خبيب
    بما انك كنتى معايا فى التنظيم
    فزلوكة said…
    الله يخرب بيت الشرطة
    طب لما ربنا يخرب بيتها
    الشعب هيشتم مين!!!؟

    أما بالنسبة للأمن المركزى
    أحيانا وأحيانا فقط بيصعبوا عليا
    بحس إن هما ياعينى الحاجة إللى الكل بيطلع زهقها فيهم , بس برضوه هما مالهمش مبرر
    إن فرعون وهامان " وجنودهما" ا

    وبعدين إيه الجمال فى التعبير ده

    سلسة ولذيذة
    ربنا يوفقك
    وأنا أعتقد إن هناك قطاع كبير داخل جهاز الشرطة لا يرضيه الأداء العام لهذا الجهاز وتصاعد الكراهية الشعبية ضدهم .. لكن يعملوا إيه؟ أكل العيش

    عموما منشور في الإحصائيات اللي عن بلادنا إن حجم الإنفاق على الأمن يعادل خمسة أمثال الإنفاق على الصحة

    أظن مفهوم
    Marwa Friday said…
    الجمعاوي الأصيل: أولا منور المدونة يا جمعاوي..ثانيا هو الشرطة مش أكتر من الناس.. هي الشرطة بتاخد أكتر من الناس!.. وشوف ميزانية التعليم والصحة مقارنة بالأمن.. حسبنا الله ونعم الوكيل..ا

    ------------
    خبيب: الله يكرمك يا دكتور.. أخجلتم تواضعي.. هو فعلا المأساة في جملة العسكري.. هم يعلمون ويفهمون ويأكلون ويمرحون.. لكن ممكن جدا شرارة التغيير تطلع منهم.. لأنهم آخر ناس نتوقع انهم يغيروا البلد.. كله في علم الغيب!.. بما إنك سألتني على الأسبوع.. أنا شخصيا استفدت من الندوات الثقافية والمنافسات الجميلة بين الفتيات سواء في مسابقات القرآن الكريم، دوري المعلومات، الشعر والزجل.. واستفدت اني عرفت بنات من مختلف أنحاء القطر.. هو فعلا في عيوب لا أنكرها- في تنظيم المواعيد وفي الأكل-.. وفي بنات كانوا مستفزين الحقيقة.. كأنهم جايين رحلة سياحية!.. منور يا دكتور

    -------------
    بطوط حبوب: طيب والله ضحكتني يا دكتور!.. يعني لو حشيش ماشي!.. وأنا داخلة معرض الكتاب لقيت الراجل بيقول لي افتحي الشنطة وانا شنطتي مخلا ، قلت له مش متفجرات برضه ده شيبسي!.. فقال لي انا بدور على المنشورات.. منشورات ايه دي !.. معلش يا دكتور هي دي مصر.. وبعد الشر عنك من الموت غيظاً.. منور
    --------------
    Only spot
    منورة يا جميلة.. بصي هو فعلا لو اتعلموا صح وبعدوا عن غسيل المخ.. هيبقوا شوكة كبيرة جدااا في وش الفساد.. بالنسبة للتحيز لجامعة الزقازيق فده مش صحيح لأن لجان التحكيم كانت من دكاترة جامعات تانية.. عندك مثلا المركز الأول معلومات عامة جامعة الزقازيق.. المركز الأول شعرجامعة المنصورة.. وفي مراكز لجامعة أسيوط وجنوب الوادي.. يعني مش تحيز أهو .. انا التي أحييك على مدونتك الجميلة وعلى زياراتك العطرة..
    ---------------

    صاحب المضيفة: عندك حق.. ربنا يستر على الكل.. دمت بخير وسعادة..
    ---------------
    محمد الجرايحي: وعليكم السلام ورحمة الله وبركاته، الأخ العزيز محمد.. حقيقي أشكرك جدا على كلامك الكبير- اللي انا مش قده فعلا- ربنا يكرمك.. شكرا لك.. تحياتي لك
    ---------------
    لماضة: صباحك فل وعسل يا لماضة اللمضة.. بقى كده؟ أنا يقولي بايده ولا برجله..! لا والله ده كان طيب وبشوش فعلا.. الشرطة في (خربة) الشعب على رأس سعيد صالح في العيال كبرت!.. ماشي يا خليفتي في النط على الأسوارههههههههه.. منورة
    ---------------
    عِلوة: صباح الفل يا علي.. بجد ميرسي على كلامك الجميل- بتكسف من الكلام الكبير ببقى مش عارفة اقول ايه!-.. بس يارب ما تكونش شمس الاستاد وصلتك كمان!.. الدنيا كانت حر يومها.. منور وحمدا لله على سلامة عودتك للتدوين..
    --------------
    سكر: منور يا باشمهندس أحمد.. معقول الكلام ده؟.. انا فعلا مندهشة – وانا مدركة انك مندهش من اني مندهشة طبعا!- وياترى كل ده عشان طيارة فرنسية!.. عشان اجانب وكده؟.. عايزين العسكري والجندي ازاي يدافع عن شرف الجندية وهم عادمين كرامته؟.. ربنا يتولانا برحمته.. طبعا عايزة اشوف الصور.. ربنا يسهل إن شاء الله.. تقبل تحياتي
    ----------------
    حسام يحيى : منور يا حسام.. هم فعلا كانوا صعبانين عليّ جدا جدا كمان.. مش صعب ولا حاجة.. هو المشكلة في فايروس الخوف والله.. تحياتي لك
    ---------------
    عبقرينو: منور والله يا عبقرينو.. اتمنى انها تكون بلاوي سعيدة!.. عندك حق في كل كلمة قلتها .. بس العساكر الصيني دي هتشتغل ازاي.. بالزمبلك بقى.. اقف.. عندك.. يا.. مواطن.. ههههههههه .. ربنا يزيدك روقان يا عبقرينو.. تحياتي
    ---------------
    عاليا حليم: يا صباح العندليب يا عاليا.. الله يكرمك انا اللي مش عارفة اوصف سعادتي بمدونتك الجميلة وبأسلوبك الرقيق- أخجلتم تواضعي- بس والله لو كنتِ معايا كنت هتضحكي.. إلحق دي معجبة بيك هههههههههه – والفالنتين كان آخر الأسبوع ههههههههههه- انتِ اللي جميلة
    منوراني يا قمر
    --------------
    ياسمين: صباحك سكر يا ياسمين.. ههههههه أسبوع فتيات عشان البنات مش عارفين يشاركوا في النشاط!.. هييييييه اجازة.. بيعجبني روقانك أحيانا يا ياسمينة- احيانا!- انتِ اللي حلوة والله.. منورة
    --------------
    بذرة أمل : الله يسلمك يا بذرة.. ههههههههه الكلية مالهاش طعم من غيري وكمان مرة.. ليه مش عارفة تجيبي السُكرية من حداكم وتقعدي ترشي في الكلية ههههههههه أخوكي ده يائس.. هي مصر مقبرة الغزاة وبس هههههههه مش كل حاجة مشقلبة على فكرة بس احنا يكون عندنا أمل يا بذرة أمل.. الحمد لله اني ما دخلتش طبعا!.. منورة و أراكِ الأحد إن شاء الله إن ربنا أحيانا..
    ---------------
    فزلوكة: الله اسمك حلو قوي يا فزلوكة!.. ودمك خفيف كمان.. وعندك حق بس انتِ شايفة دول بالذمة جنود.. دي سخرة والله!.. الله يكرمك انتِ اللي جميلة ولذيذة وكلك ذوق.. ربنا يسعدك يارب.. منوراني زيارتك الأولى ويارب ما تكونش الأخيرة :)
    ----------------
    يا مراكبي: والله حضرتك يا أستاذ معاك حق جدا.. ناس كتير مش عاجبهم الحال ورغم كده بيقولوا أكل عيش- بس عيش ايه ده اللي غموسه دم الناس؟!- فعلا والله بلدنا بتتقدم بينا هههههههه مفهوم طبعا.. منور يا مراكبي..
    Ana said…
    تحياتى
    مدونتك تستحق الإعجاب بحق
    احلى اسبوع الصراحه

    انا بعد الافتتاح وبوظة التنظيم

    مرضتش انزل تانى

    الا لندوة احمد درويش بس

    الراجل ده بحترم دماغه بشده

    اما بقى البوابه

    فانا والحمدلله دخلت منها

    ع شارع السلام ياحضرات

    احنا فريق المجله اللى بيغطى الحدث ياافندم

    افتح البوابه يابنى

    قيمه وسيمه واى دى وحوارات

    بس م الاخر التنظيم كان فاشل جدااا

    البنات اغلبهم كانوا كويسين الصراحه

    وبياخدوا ويدوا ف الكلام

    الا بتوع المنوفيه خنقيييييين

    والقاهره وعين شمس جايين يتنططوا بزياده

    ع فلاحين مصر المحروسه

    وكمان اشتكوا م بتوع بنى سويف

    بيتريقوا ع خلق الله ومكنوش عاتقيين حد

    بس كده

    تحياتى
    Anonymous said…
    بغض النظر عن الموضوع انا كنت عايز اكتب قليل من ابياتى علها تر النور وهذه اول مرة اكتب شعرى فى اى مكان يا ريت يعجبكم ياريت تفهموه
    a7med_s1 said…
    السلام عليكم ورحمه الله
    طبعا المدونه لذيذه و طبيعه بتعكس صوره من سيناريو الحراسات و التامين و استعراض القوه .
    بس احب اعقب علي رد في وسط الردود يعني تعبني بما اني دخلت الجيش كتجربه او بمعني اصح كضريبه يدفعها حوالي 70% من شباب مصر علشان بس الفزلوكه تقدر تنزل من بيتها بالليل تخرج و تتفرج علي الفتارين و هي مش خايفه من حوادث الاغتصاب و القتل و السرقه بس هي لو كانت عايشه في بلد زي جنوب افريقيا كانت عرفه قيمه الامان اللي احنا عايشين فيه بفضل ان كل ثلاث شهور بنخرج دفعه من جنود هامان زي ماوصفتهم الفزلوكه مع انهم اكتر ناس اتظلمت في حياتهم لان اتسرق من عمرهم فتره من اهم الفترات في حياتهم و للاسف اخوتهم مش حاسين بيهم لا و في ناس بتنتقدهم لانهم مايعرفوش ان العسكريه اهم عنصر فيها تنفيذ الاوامر و شكرا لطول بالكم
    وشكرا

    Popular posts from this blog

    وما الدنيا إلا فرن كبير!ا

    من الزقازيق لمصر الجديدة! ا

    سنة أولى ابتدائي