حب تربوي.. مستر شتلة وحرمه!ا

حب تربوي.. مستر شتلة وحرمه!ا

الفكرة جاءت بتحريض من مدونة العزيزة لماضة!ا

**************
في بسالة نادرة أصر"مستر شتلة"- مدرس اللغة الإنجليزية – أن تتأبط زوجته "أبلة عدسات"- مُدرسة العلوم- ذراعه؛ ليصحبها معه في"فسحة" على "الكورنيش".. وعلى الكورنيش.. وبسحر لون القمر..بدأ زوجها الحوار:ا

شتلة: عارفة يا حبيبتي.. حياتي من غيرك كانت بالضبط زي الــ "فعل الغير منتظم".. كنت هبقى زي التصريف الثاني في زمن الماضي البسيط..ا
عدسات: آه يا حبيبي بس اوعى يكون ماضيك مستمر.. وتصريفك كان غير صحي..أنا ممكن أختبرك بالشوكة الرنانة!ا..
شتلة: لا بسيط و الله يا لينسيز عمري.. جرس حياتي ضرب بس أول ما المأذون كتب بداية الحصة الأولى.. وشكله مش رانن تاني!ا
عدسات:ربنا ما يحرمك مني ابدا.. ويخليك ليّ يا زمزمية قلبي.. يا أوزون روحي....ا
شتلة: بما إننا في الفسحة بقى.. تحبي تاكلي سويت بوتيتوس.. ولا كورن على الجريل.. ولا أقولك.. شوجر كان ؟!ا
عدسات تنظر له بانبهار:ا
لا والله.. انت ناوي تعمل لي زي التلفزيون وتقول لي أكل غريب زي "الإسكالوب".. احنا مدرسين يا حبوبي.. نشتعل ولا نساعد على الاشتعال.. ا
شتلة: لو ما بطلتيش تتفلسفي هخليكي مبنية للمجهول..ا
تنظر له عدسات معتذرة أمام كرمه: لا والله يا شلتوتي... أصل أنا يا حبيبي اتعودت معاك على الفول اللي كنت بطلع بيه من تجارب العلوم بتاعة العيال -ثم تخرج ساندويتش-.. "كُل يا حبيبي.. ربنا يهديك يارب.. فول ملموم بالحباية من عيال رابعة أول ورابعة تاني.. ومزروع في تربة طينية يعني الفولاية من دول تحتل المعدة تتغرس فيها.. ومزروع تحت إشرافي حتى خد العدسة المحدبة دي شوف بيها..ا
يرد شتلة قائلا:ا
نو.. نو.. يا لينسيز.. أنتِ ما يغلاش عليكِ أي صنف من اللي قلتهم لك..ا
تبتسم عدسات وتتوقف به على جانب الطريق.. تفتح شنطتها وتبحث عن المرآه وإصبع (الروج)..ا
شتلة: بتعملي ايه يا عدوستي؟ وقفتي هنا ليه؟
عدسات: استنى عليّ شوية.. لازم أتزوق.. والله صباع الروج ده كان جاي لي من طالب في عيد الأم اللي فات.. كنت محتارة أحط منه فين؟
شتلة : هو أنا يعني ماليش نفس في البيت.. لازم يعني أشوفك كده "كلرليس".. بهتانة.. حطيه في الهوم يا عدسات.. مش وقته
عدسات : أبدا يا سي شتلة.. انت عايز الناس يعملوا "فعل منعكس"أول مايشوفوني داخلة معاك المحل.. ليه يعني عديمة الروج ولا عديمة الروج؟
شتلة: يو آر إمبوسيبول ومان.. مش ممكن.. همشي مع كلاون.. بهلوان يا ناس! ا
عدسات: كالون ايه بس يا خويا صلِ على النبي.. هاخد شفايفي كده وش واحد بالروج....ا
شتلة: كده من غير صنفرة.. ؟
عدسات: اسكت بس.. انا عارفة بيتحط إزاي ده.. كده كويس.. شكلي هطبق قانون الجاذبية النهاردة.. لازم أراعي مبدأ الفروق الفردية من ست لست أخرى.
فتحت كيس تناثر منه غبار أبيض..
أخذ شتلة في الكح.. بينما أخرجت عدسات "كتافة بلوزة حريمي" معفرة بهذا الغبار الأبيض..
قال شتلة وهو في حيرة من أمرها:" وات دو يو دو يا ولية؟" ا
قالت : دي البشاورة يا روح الروح.. الباودر.."بودرة الطباشير".. عايز مراتك تدخل من غير قانون نيوتن؟.. هعفر خدودي بيهم كده.. يعني هو البودرة بتاعة أبلة الناظرة القرشانة ايه.. ماهي مواد كيميائية بتتغسل.. الطباشير مننا وعلينا..
شتلة – محاولا شد الكتافة منها- : يا كريزي.. يا كريزي.. هتبقي بلايند ما بتشوفيش.. وبعدين انتِ لونك حلو كده.. كويس اننا ما بنكتبش بأقلام السبورة كنتِ عملتي ايه تاني! ا
عدسات: آه والله فكرتني.. الفصل اللي دخلته امبارح كان فيه "معاييرجودة شاملة".. وعندهم سبورة بيضا.."ثم أخذت تفتش في الشنطة" أهو القلم الأسود.. هلون بيه حواجبي عشان تنطق كده..
شتلة: ارحمني يارب.. انتِ سويت كده.. عسل كده.. بريتي من غير حاجة....ا
عدسات: عشان اشرفك.. امال ابقى مُدرسة وعديمة الماكياج كمان!ا
شتلة: ماشي يا حبيبتي.. ناوليني السبورة الخشب اللي في الشنطة.. احنا كده قدامنا كذا صنف..ا
عدسات: مش لما ندخل المحل الأول ونشوف اللستة.ا

شتلة: استني شوفي كده زي ما قلت لك.. "سويت بوتيتوس".. أو "شوجر كان جوس".. وعندك كمان "كورن" على الجريل.. ا
دسات: خلاص يا حبيبي.. شكل "سويت بوتيتوس"أكلة هايلة.. و"الكورن على الجريل".. أنا أسمع ان الجريل هي الشواية.. ا
شتلة -يقترب من مطعم شهير-: أيوة يا عدسات..إكسلانت.. شواية
قالت عدسات في نفسها" هاكل كباب مشوي!"ا
أما شتلة فمد يده ليخرج النقود.. بينما عدسات سارحة في أجواء المطعم الذي ستدخله بعد لحظات.. كيف ستأكل.. وكيف ستضع الشال الصوف خلفها على الكرسي.. وكيف.. وكيف.. ثم أفاقت على صوت مستر شتلة:ا
- واحد "كورن أون جريل" يعني.."درة مشوي" و اتنين "سويت بوتيتوس".. قصدي بطاطا يا عم فهمي..
عدسات وهي تأكل ما تبقى من اصبع "الروج" بغيظ:
هي الحكاية بطاطا!
ا

Comments

علوة said…
صباح الفل
هعديها المرة دي عشان في لحظات من الحوار كانت حلوة
صباح الفل
micheal said…
لذيذ بجد الحوار
تحياتي
Unknown said…
هههههههههههههه
انا لسه بضحك لحد دلوقتى
يارتني حرضتك من زمان
ونعم التحريض بجد
تفوووووووووووووق
امتياز م ع مرتبة الشرف
ويلا بينا نكمل السلسلة
غلبتينى يا عزيزتى بس انا بسوطه بالهزيمه الجميله دي بجد
كفايه كمية الضحك اللى ضحكتها
ليكى مية الف بوسة من وانا حاطه رووج ابلة عدسات
ههههههههههههههه
كويسة
بس كانت حتعمي نفسها ببودرة الطابشير في الباشورة
دي اوفر شوية

بس البوست عموماً حلو
هههههههههههه

ماشاء الله عليكم

والله دمكم زى الشربات

سواء انتى او لماضه

بجد الواحد بيمر عندكم

بيضحك من قلبه
بس انا زعلان من لماضه

منزلا بوست رخم اوى


عاوزا شدت ودن


تقبلى فائق احترامى

احمد سكر
تحفه موووووووووووووت
ادنتوا عاملين دويتو هايل
هههههههههههههههههه
هموت من الضحك بجد
مروه اول مره ادخل هنا بس فعلا فى فرق فى المضمون هنا وعند لماضه
هى الفكره لكن كل واحد شايفها بعين غير التانى
بجد بلوج هايل
السلام عليكم
اول زيارة
مدونة جميلة ربنا يباركلك ياااااااارب
بجد اعجنى كتاباتك اضحكتينى هى لماضة لازم تكون تعرف الناس الحلوين دول ربنا يعزك والى الامام دائما
rainbow said…
الصديقة الجميلة مروة

ضحكتينى يا عزيزتى بجد من قلبى

خصوصا انها وضعت بودرة طباشير بجد الست دى تحفة .. مثال للمرأة المكافحة دى مش عارفة تحط روج ازاى فى اجمل من كده !0

عملتى ضفيرة سخرية مع لماضة يبقى ما حدش يقدر يحوش نفسه من الضحك ربنا يستر !0

ربنا يسعدكوا زى ما اسعدتونا

دمتى بكل خير وسعادة

هدى
ساء الخير
انا سعيد جدا بزيارة مدونتك الرائعة وعجبنى قوى البوست طبعا
وطبعا من لماضةوحب صحى الى مروة وحب تربوى يا قلبى لاتحزن بس ربنا يستر وقلوبنا ما تقفش من كترالضحك
وسلامى لمستر شتلة وحرمه
تحياتى خالد
Marwa Friday said…
علوة:صباح الفل يا علي.. ماشي يا عم فين النقد طيب؟- ولا أقول لك عديها أحسن!- وأنا باحترم رأيك.. صباح الورد

---------------
مايكل: منور.. فين زياراتك الخاطفة؟ أشكرك جدا جدا.. تحياتي

-------------
لماضة:ههههه إزيك يا ست الداكتورة؟.. أنا عارفة بتضحكي على إيه أصلا؟هههههه أغلب مين يا جميل هو أنا قد خفة دمك العسل.. بجد ربنا يكرمك يا لمضة وأشوفك في أعلى المراتب.. يارب أشوفك وزيرة صحة:))هههههههه والله مش بعيد.. هييييه وأقعد أهاجمك في الجرايد!.. أنا واثقة انك هتبقي وزيرة بني آدمة قوي.. مش عارفة ليه كررتي لفظ هزيمة وكده.. انتِ زملكاوية يا بنتي وأنا ما أعرفش؟.. ربنا يسعدك

---------------------
مهندس مصري: الله يكرمك يا باشمهندس.. منور والله، معاك حق هي مبالغ فيها شوية.. بس انت لو كنت مدرس مش هتستبعدها!.. أشكرك جدا.. صباحك ورد
--------------------
سكر: الله يكرمك ويعزك يا عم سكر.. أتمنى فعلا انك تكون ضحكت هههههه ربنا يستر!.. صباحك ورد
--------------------
بطوط حبوب:صباح الورد يا دكتور بطوط.. بعد الشر عنك- المرة اللي فاتت كنت هتموت من الغيظ المرة دي هتموت من الضحك.. مافيش مرة هتعيش بقى!- بارك الله فيك.. منور دائما
-------------------
صوت من مصر: أهلا بك.. ويارب ما تكون المرة الأخيرة.. الله يكرمك،شكرا
------------------
النجم القادم: وعليكم السلام ورحمة الله وبركاته.. أعزك الله وأسعدك.. ربنا يكرمك انتم اللي زي العسل..
------------------

قوس قزح : هدى هنا يا مرحبا يا مرحبا.. أنا بجد فرحانة اني حاولت أضحك حد!- من أكتر الحاجات اللي بتخليني فرحانة- حلوة مثال للمرأة المكافحة ههههههه هو الروج بيتحط إزاي بالمناسبة!-ربنا يكرمك ويسعدك.. منوراني يا هدهد الجميلة

-----------------
همس الأحباب:مساء الفل.. أنا اللي سعيدة بزيارتك لأول مرة.. الله يكرمك ويسعدك.. مستر شتلة واضح انه هيرقد في مستشفى بعد البطاطا!- مع ان البطاطا حلوة- هنحاول سلامك يوصل:).. منور
ما شاء الله

كورن أون جريل

وأنا اللي معدني المسكينة بدأت في عملية إفراز العصارات الهاضمة

وااااااااه معدتااااه

انا طول البوست والله عايز اعرف البتاع ده ايه
كورن أون جريل

ولما عرفت مش هقول غير منك لله يا شلتوت يا جوز عدسات

دعوة يا خويا من وليه غلبانه وجعاااااانة

بجد بوست جنان ولذيذ اوي

تقبلي مروري
khobayb said…
واندار"فول"

وده غير "فول" رابعة أول و رابعة تاني !

تحياتي
Empress appy said…
صباحك فل وقشطه بالعسل
اولا ميرسى لزيارتك كوكبى نورتى الدنيا وواهلا ببلد الحبايب اللى فى قلبى
بس بجد حوار جامد الا صحيح هى الست مش تحط ميك اب الا للناس وجوزها لا ولا ايه باقى مدونتك دمها خفيف وانا هقراها كلها ان شاء الله
بذرة امل said…
تحفة اوى يامروة

لازم تنشريها عندنا فى الكلية

وتقوليها فى معسكر الوادى الجديد
جمعاوى said…
جامده جدا

قريت البوست اللى عند د/ لماضة

فكرة جااامدة فعلا

" بس بلاش تريقة على المدرسين "
raspoutine said…
حوار لذيذ
تحياتى
ههههههههههههههههههههههههههههههه

ههههههههههههههههههههههههههههه

عسسل يامروه

والله انا اتعاملت مع بنات مصر كلها

مالقيت ف خقة دم الشراقوه

حتى لو فى ف كل بلد بنات دمها خفيف

بس عند الشرقيه

وستوب الكله دمه سكر

فقريين جداا

نايس بوست

واسمحيلى اكون صديقة البرنامج

اصدى زائره متابعه لمدونتك الذيذه

تحياتى
only spot said…
هههههههههههههههه
تعرفى انتى كده رفعتى بينا اوى هو صحيح معشر المدرسين غلابه بس مش للدرجه دى انتى بشرتينى يعنى احضر نفسى من دلوقتى على تقبل الدره المشوى والبطاطا
يلى اهى نعمه وربنا يحفظها من الزوال
هههههههههه
لا بجد احيكى على عرضك وطريقتك الحيويه
Marwa Friday said…
قبلة الحياة: منورة يا جميلة.. إيه اللي أتقبل مرورك.. البيت بيتك.. تعالي وأنا أعزمك على شوال كورن على الفحم!.. ربنا يخليكِ أنا سعيدة بيكِ.. وإن شاء الله أزور مدونتك..

-------------------
خبيب:منور "فول"أوتوماتيك!.. شكرا وجزاك الله خيرا وبرا.. تحياتي
-------------------
آبي :صباح الرز باللبن والشيكولاتة والسحلب يا جميلة.. منوراني وشكرا على كلامك الحلو.. كله من ذوقك:).. صباحك ورد.
----------------
بذرة أمل: منورة يا بذرة أمل.. تصدقي مش طبعتها!.. ربنا يستر من معسكر الوادي الجديد ده!.. منورة بيتك يا كتكوتة
---------------
جمعاوي روش طحن: منور يا زميل يا عزيز- أنا في كلية التربية بالمناسبة!- والله المدرسين فيهم ناس أغلب من الغلب ذاته.. خلي روحك فكاهية
---------------
راسبوتين:شكرا جزيلا يا أستاذ.. منور المدونة.. تحياتي
---------------
د/أجدع بنوتة: منوراني يا بلدياتي.. يا بنت الشرقية..شكرا يا دكتورة.. كسفتيني والله بتعليقك ده.. يعني أيوة فعلا بنات الشرقية دمهم خفيف..ما عدايّ!.. من ناحية فقريين فكذا حد من الشرق والغرب قال لي يا مروة انتِ فقرية!,تنوري المدونة وفعلا انتِ بقيتِ بالفعل مشتركة معانا في البرنامج:)ا
-------------------
Only spot
يا أهلا وسهلا.. ازيك يا جميلة؟ هو أنتِ مدرسة.. أقصد زميلة في كلية التربية؟.. هههههه هو فعلا مش غلابة للدرجة دي بس اكتشفت مؤخرا ان فيهم غلابة جدا كمان.. منورة يا قمر..
Unknown said…
انتي مالكيش حل
..ههههههههه.. موتيني من الضحك
عايزين حاجة بقى على مدرسين العربي
son's egypt said…
السلام عليكم
فعلا قصة ظريفة جدا
كفاية كميه العلوم والانجليزي اللي فيها والاخر تقلب بطاطط7101984
Unknown said…
البوست جميل جدا وضحكت من قلبى وشكرا للماضة إنها حرضتك على كتابته
استمتعت كثيرا
يا ريت متحرميناش من زيارتك
شكرا
إيثار said…
شكرا على الموضوع الجميل

مع تحياتي

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي