Friday, June 8, 2007

فيلم ..أبيض وأسود


فيلم.. أبيض وأسود **





صيف 1997/يوليو
الحر شديد ..تعبنا من القفز على كراسى الصالون ذات السوست ..انتقلنا للعبة الفرح أو المولد التى تحمل طقوسا خاصة بدءا من اغلاق زجاج النوافذ خوفا من خروج الصوت ..انتهاءا بإضاءة النجف فى عز الظهر وتوزيع الأدوار ..المغنى الذى كنت أحتل دوره لأنى الكبيره ..العروس التى كنا نسميها دائما اسما من اثنين "أم سحلول "..أو "أم بهلول "نطلق بعدها زغاريد ..ألف مبروك يا أم سحلول ..كنت أرفض دور العروس دائما ..لا أعرف لماذا ..كنا نحتار فى اختيار العريس ,نظرا لأن الأخ الكريم يرفض هذا الدور ..فكنا نواجه زفافا بلا عريس ..بطرحة وتطبيل من الطبال الصغير العريس المفترض "فنضطر لوضع أختى "4سنوات "فى الكوشة ..أو اى وسادة ..دمية ..المهم يكون فى عريس ..ولو
خردة ....! ا

أطفأنا النجف ..لأن الفرح انتهى ..كان يراودنا هاجس العبث الذى خلفناه فى الشقة ..ماذا ستفعل أمى ..لا بأس فهى ستذهب للسوق بعد العمل ..هناك فسحة ..ليس أمامنا سوى التلفاز ..نفتحه ..لايوجد إسماعيل ياسين ..ولا عبد المنعم إبراهيم .."الشهير لدينا بعصفور حقيقى تلفزيون يجيب المرض ..لا توجد سوى راقصة أبيض وأسود ..نسارع بتغيير القناة خوفا من الاتهامات المتبادلة باستراق النظر إليها "رغم ان اكبر عمر فينا كان عشر سنوات "..وعند التغيير تبدأ التعليقات ..بتتكسفى ؟..وإنت بتبص على إيه ..يبدأ الدفاع ..دى مسخرة ..كلام فارغ ..القنوات كلها مشوشة ,عدنا للفيلم بعد انتهاء الرقصة ..نحمدك يارب الفيلم فيه ضرب ..اضرب ..اجرى ..حاسب.. يأتى رجل بمطواه يقتل أحد الواقفين ..نخبئ وجوهنا من منظر الدم المصطنع ..غبى احنا قلنا له حاسب ..البطل ينتصر ..تمر الأحداث تظهر البطلة بفستان بشبابيك .."عارى يعنى"..يظهر البطل الذى احتل الشاشة فتونة وضربا ..نتهامس تفتكروا هيضربها؟.."لا الستات مش للضرب .."يهمس البطل "وحشتينى "تلف ذراعها حول رقبته .."هتخنقه"يهمس البطل "سهران بناجى طيفك الجميل يا جميل "..ترد "بجد"..تسود لحظات صامته زهقنا بقى ..امتى تخنقه وهو يخلص نفسه ..؟..تصدمنا "قبله"لم نكن لنتوقعها ..نبادر "يع ..يع ..ممكن يجيله عدوى اسكارس! "على اعتبار انها آخر الديدان التى درسناها ..لم نلحق تغيير المحطة ..فقد جاء موجز الأنباء البوسنه والهرسك ..فلسطين ..دم ..لم نخبئ وجوهنا خوفا ..لم أكن أعرف الا ان هؤلاء الضحايا هم من نحفظ عنهم الأناشيد فى المدرسة .."يا أيها الإنسان هل تبكى لما أبكانى ؟ أرأيت ما قد حصل فى العالم الحيران ..اليأس يعبث بالأمل ويهز كل كيانى .."وغيرها وغيرها ..كل ما أدركه ان تلك الأناشيد كانت تثير فى نفسى أحزان مدفونة فى زمن كنت لا أدرك فيه معنى للأناشيد سوى ان هناك عيال مثلنا متعورين ..


الصورة للفنانة فاتن حمامة

************************

نشر في الدستور **





16 comments:

مروة جمعة said...
This comment has been removed by the author.
allopop said...

walahy gamela awee ya Marwa .. na2altely elsh3or petare2a 7lwa .. well done

منة الله said...

مروة


ادعوك للمشاركة في استفتاء اكثر 10 مدونات تاثيرا في قرائها

عل مدونتك تكون واحدة منهم

اليك الرابط

http://www.6ef.blogspot.com/

هبة المنصورى said...

أولاً مبروك للغلابه اللى زيى وماعندهمش بلوجر أكاونت.. دلوقتى هاعرف أعلق براحتى
حلوه أوى ذكريات الطفوله دى يامرمر والأجمل طبعاً أسلوبك الساخر ف الكتابه.. معلمه من يومك! وأيوه كده كل مالدنيا تضيق ف وشوشنا لازم نطلع بوكس الميموريز اللى فيه مالذ وطاب.. وهادياكى غنوه م البوكس برضه
قمرصيفى
عارفاها؟
كتبها الأبنودى وغناها منير
مطلعها بيقول
ليلة قمر ياقمر صيفى
أنت النهارده خلاص ضيفى
أنت تنور على كيفك
واسهر بقى أنا على كيفى

ابراهيم عز الدين said...

حلو اوي حكايات الطفولة
وعنوان احلي بجد موضوع رائع

sarah el deshnawi said...

جميلة أوي يا مروة ، اسلوبك جميل و دمه خفيف جدا ، لو تعرفي انا بقة كنت باعب ايه حتموتي علي نفسك من الضحك و يمكن الرعب ، انا بقي يا ستي كنت باعب دكتور ( انا في كلية الطب علي فكر ) بس مش اي دكتور لأ جراح ، كنت اوقف اخويا الصغير تمرجي يدخلي الدباديب واحد ورا التاني و اعملهم عمليات و لو رضيت عنه اسبه يقفل العملية ( يخيط الدبدوبة يعني ) شفت ازاي مجنونة من صغري :)

مروة جمعة said...

صباااااح الورد عليكم

ألو بوب : منور أولا ..ثانيا ..متشكرة جدا جدا ..فين مدونتك ؟

منة الله :متشكرة لزيارتك طبعا
أنا مدونتي غلبانه قوي ..لكن ان شاء الله احتمال استفتي معاكم ..شرط البطاقة البمبي ..وعندكم حبر فسفوري ولا لا؟تحياتي

هبة المنصوري: يا سلام المدونة منووووورة جدا جدا ..مبروك ليكي ياهبة ومبروك ليا أنا كمان تشريفك ليا ..انتي اللي معلمة طبعا ..وشكرا على أغنيتك الرقيقة ..

إبراهيم عز الدين :منور يا إبراهيم ..متشكرة جدا جدا على مجاملتك

سارة الدشناوي : منورة منورة ..يادكتورة ..ايه ده يا سارة ..ايه الوحشية الضارية دي ..أنا بقى كنت بجيب العرايس البلاستيك كلها وأجيب غطيان الأزايز وأعملها قناع اوكسجين ليهم ..والقماش القديم اعمله سراير ومخدااات ههههه وإسعاااااااف وياواويوا ..صباحك ورد

hima said...

صباح الورد والياسمين, مساء الفل والنرجس , ربنا يخليلنا الاستاذة, بجد انا بحب قصصك اوي يا مروة ومقالاتك , وربنا يوفقك واشوفك كده زي هيكل ولا احسان عبد القدوس ولا الضظوي والفناجيلي, ايه اللي دخل الضظوي والفناجيلي هنا مش عارف, بس اهم مشهورين وخلاص, ربنا يوفقك ويكرمك بجد وميرسي اوي اوي علي احلي هدية قدمتيها للجمعية انك تحطي الموقع بتاعنا في اجمل واطعم مدونة في الدنيا, انا والله ما صدقت لما بعتيلي اللينك بتاعها .
علي فكرة نفسي بجد تزوري الاقصر وتيجي تشوفي جمعيتنا والشباب بيعمل ايه لو لقي الفرصة , بس بعيد عن كدابين الزفة وبتوع الطبل البلدي, والله يا مروة شباب بيعطي كتير ومش عايز مقابل, كل ده علشان حاسس ان البلد دي بتاعته وان الناس دول اهلوا والاطفال الفقراء واليتامي دول اطفالنا واننا حنتحاسب عليهم.
وميرسي مرة تانية علي هديتك الجميلة ويارب كل اصحابك يشاركوا معانا ولو بالافكار, او يساعدونا ان مؤسسات او منظمات تتبني فكرتنا.
إبراهيم - الأقصر
hima333@hotmail.com

منــار برج الأسد said...

يا سلام عليكي يا مارو و على طفولتك البريئة ! .. ايه ماكانش عندك عقد نفسية زي حالاتي ؟ بس الحاجة المشتركة فينا ( كدفعة واحدة يعني ) اننا كلنا نشأنا و ترعرعنا أمام شاشة التليفزيون و الأفلام القديمة .. ( أمال مش فالحين في الكليات ليه !؟)يالا ما علينا ان شاء الله أشوفك كاتبة كبيرة و رئيسة تحرير كمان .. قولي آمين

micheal said...

حقا ما أجمل الطفوله و ذكرياتها ببرائتها و نقاوتها
تحياتي لكي

ibn nasser - ابن ناصر said...

حكايات لطيفه
تحياتي

ابوزياد الفاتح said...

مدونتك حلوه
وكلماتك رائعه
ممكن طلب صغير
ارجو الاهتمام بمشاكل مصر ومشاكل المسلمين فى شتى انحاء المعموره
عايزين نركز معاهم شويه
وترك الموضوعات اللى مش هاتنفع دى
عايزين نقدم حاجه لديننا ودعوتنا
جزاك اله خيرا
شرفينى على مدونتى

•«ρяoιd»•™ said...

السلام عليكم

حلو قوي البوست

المهم انتي ازيك

و عامله ايه

تحياتي

Sharm said...

جميلة

مروة جمعة said...

صباح الورد جميعا
هيما : لا شكر ولا حاجة ..أتمنى فعلا اصحابي يشاركوكم بالافكار والمقترحات ..شكرا لدعواتك

منار برج الأسد : منوررررة ياجميل والله أنا مقصرة في حقك ..بالنسبة لكوننا جيل واحد فعندك حق ..انا كان عندي عقد بس اغسل ..كله بيطلع في الغسييييل ...منورة والله ..شكرا لدعواتك

مايكل : منور ..شكرا على مرورك وتعليقك

ابن ناصر : شكرا جدا ..ومنور ..

أبو زياد الفاتح :جزاك الله خيرا ..بالنسبة لمشاكل العالم العربي هي فعلا تستحق الكتابة والفحص ..والدين الاسلامي محتاج آراء تنويرية بدل من الرؤى الضبابية ..تحياتي

ب •«ρяoιd»•™ ...
: وعليكم السلام ورحمة الله وبركاته..منور وشكرا انا الحمد لله تمام ..شكرا

شارم :الأجمل زيارتك للمدونة يا شارم

re7ab.sale7 said...

جمييييييييييييل يا مروة
من زماااااان اوووي مش زرت مدونتك الجميلة بس بجد وحشتني اوي
وبجد خليتيني اعيش الجو برغم غتاتة شيرين واماني اخواتي اللي جنبي هنا
بيسلموا عليكي , وعبير علي فكرة بس بتقولك انها مش بتحب الاهلي وناويالك علي نية وحشة بصراحة لو اتكلمتي وهي اللي ردت عليكي ...هههههه
متخافيش هبقي ادافع عنك
وحشاني وبحبك