Monday, June 25, 2007

خليك رومانسي ..وانسى انها قرعة ! ا



خليك رومانسي ..وانسى انها قرعة ! ا




كنت مع صديقتى الريفية الرقيقة نتحدث عن الرومانسيه كمذهب والرومانسية فى حياتنا بشكل عام صدمتنى .."الرومانسية ترف لا يقدر عليه الا الأغنياء "ليه بس كده يعنى .....يعنى الفقراء الغلابه اللى زى حالات شعبنا كده ليس لهم نصيب فى الرومانسية ليه ؟..قلت لها جائز الامكانات والامكانيات تأثر شويه على الجو الرومانتيكى ..تخيلت ياسلام لماذا لا نكون مبدعى الرومانسية الفقريه ؟ صحيح المثل الانجليزى بيقول "اذا دخل الفقر من الباب خرج الحب من الشباك "هذا اذا كان فيه شبابيك من أصله!...ياسلام اذا اصبحنا روماسيين النزعة..بلافقر بلا هباب ..ياسلام عندما تجد طبق الفول الذى لم يتغير أبدا منذ فجر تاريخك ..وتتأمله بابتسامه "ياما كنت أتمنى أقابلك بابتسامه أو بنظرة حب أو كلمة ملامه ..بس انا نسيت الابتسام زى مانسيت الآلآم والزمن بينسى حزن وفرح ياما ياما "لالالا ..مش معقول تقابل الفول كده ياراجل ..مش حبكت مرسى جميل عزيز فى دى ..مثلا تقوله بس مش بقرف "آه لو تعرف اللى أنا فيه والشوق اللى غلبت أداريه ,كان قلبك يسهر لياليه مع قلبى ويقوله آه ..."لأنى لا أؤيد النفاق بلاش آه يا حبيبى بحبك ..آه أى شئ حسب النيه ...تخيل الفول حبات لؤلؤية ...طبيعى سوف تحاول ان تغسل يديك ...آه فتحت الصنبور وسمعت صوت هواء "عوووو"ولم تجد مياه لا تتعصب ..مش معقول تفقد رومانسيتك وتزعق "الميه يا رتيبه ..الميه ياعدلات ..يابت يافيفى ..الميه مش هنتنيل ننزل الشغل "لالالا..ابتسم وقول ياسلام طول عمرى نفسى فى تكييف لأول مرة أرى تكييف مجانى من الحنفية ..تكييف يرد الروح بالصلا على النبى ...!"طبعا بعد هذه السيمفونية ..تجد أن الهانم زوجتك قد قامت فى تلك اللحظه من النوم ..مشعثة ..مغبره ..بشعر منكوش ..اياك ان تتذكر ناديه الجندى ..الهام شاهين ..يسرا ..منه ..حنان ..غادة ...او أى من هؤلاء اللاتى يقمن من نومهن فى المسلسلات بشعر مصفف وماكياج رقيق ونظره ملائكية حالمه ..لا تتذكرهن فهؤلاء معجزات لن تتكرر أبدا انظر لها برومانسيه وقل "ياسلام على شعرك يا حبيبتى بيفكرنى بأيام شهر رمضان -على أساس انه كنافه -ولا سواده عسل أسمر يا عسل ....ولا عيونك بيفكرونى بماتش النهائى بين فرنساو البرازيل فى كاس العالم 98 -على اساس انهم منفوخين ..شئ طبيعى طبعا- انسى ان المياه مقطوعة وقل لها انى اتنفس تحت الماء انى أغرق أغرق ...أغرق ..ربنا يكفيك شر الغرق وشر عواقب هذه الوصله الغرامية المحترمه...عندما تنزل للشارع ..اياك تتنرفز واياك ان تتذكر تصريحات سيادة الرئيس عن البنيه التحتانيه -المجارى ولا مؤاخذه-عندما تجد الشوارع غارقة ..اضحك وقول زى نجاة الأمورة ..أنا بعشق البحر ..وعندما يقابلك سى الريس ملوحا فى صورة ..لا تترك مشاعرك على سجيتها ...وابتسم يمكن تكون روحه الشفافه محلقه حولك فى تلك اللحظة الباهرة البارعة ..اياك تكشر ..ده رئيسك والراجل فى ايه ولا ايه منها لله امريكا واسرائيل والقضيه العربية على بعضها الراجل بيقطع نفسه ..وما تسألش نفسك اذا وجدته شاحبا و"خاسس"قليلا ..تذكر انه بيأكلك من لحمه الحى .....تذكر ذلك جيدا ....لا تحزن عندما تنظر لعمر أفندى ..أوشركات وبنوك بلدك التى لم تعد ملكك..تمسك برومانسيتك ..ياسلام ..ايه الحلاوة دى ...وعندما يداعب صوت عبدالحليم الرقيق الحالم خيالك فى هدوء وهو ينشد "وبلدنا ع الترعة بتغسل شعرها ..."خليك رومانسى انسى انها صارت بلاضفائر او شعر ....انسى انها قرعة ...وابتسم ..تذكر انها فى يوم من الأيام كانت بشعر ..حرييييير..معلش حاول ..!0


________________________
نشر في الدستور بإختصار ..19 أبريل 2006
الرسم للفنان عمرو سليم

13 comments:

هبة المنصورى said...

مروه.. دانتى دستورجيه قديمه.. دانا فاتنى كتير على كده.. يلا ماعلينا.. بس تدوينه مناسبه جداً لبدء يوم مشبر مش باينله ملامح
ولا أقولك هاسمع كلامك
هاحاول أبقى رومانسيه.. سامعه؟ منير بيغنيلى أهه.."تانى هنعيش الفرح تانى.. وهروقلك زمانى.. ونعيش نفس الحنااااان".. حنان! ده حنان زميلتى ف الشغل والدها اتوفى ولازم نروح نعزيها :(

عاشقة الوطن said...

ازيك يامروتى ياجميلة ايه اخبارك ياقمر

تصدق لابوست ده جميييل جدا
بجد الرومانسية عند الفقرا ممكن تكون مختلفة كتييير عن الاغنيا

الموضوع ده جميل اوى ومختلف

تحياااااتى الشديدة

جزر said...

الرومانسيه وما لها وما عليها
بإختصار الرومانسيه متقوليش فقير او غني ربنا ادانا قلب واحد بيحس وعقل واحد بيفكر وكل واحد بيتأقلم علي الوضع بطريقته الخاصه
احييكي علي الموضوع المتميز
ودمتم

محمد said...

حلو النوع ده من الرومانسيه
فعلا القناعه كنز لا يفنى

micheal said...

بوست مميز جدا يا مروه بس احنا مش في عصر الرومانسيه أبدا و الفول حيفضل طول عمره فول و لن يتحول الي لؤلؤ أبدا
تحياتي لكي

رضوان آدم said...

مروة فاكرك جدًا يا جميل ومدونتك هايلة هايلة شكرا يا ميرو على تعليقك على مدونتى التى لازالت فى المربع صفر ..انا لسى يا ميروو ما عملتش حاجة فيها لظروف عمل وأخرى شخصية ..انتظرى بداية ربما تكون جيدة لمدونتى وتانى وتالت كتر خيرك يا ميرو
ومن دلوقتى وطالع انا هتابع مدونتك وصباح الورد

عصفور طل من الشباك said...

الرومانسية دي مدرسة أدبية شعرية
بس كده
أوعي أبداً تفكري فيها كمبدأ في كل العلاقات الإنسانية مع الأشقاء والأقارب والأصدقاء وبالطبع مع الزوج والزوجة

أحمد حربية وسيد تركي said...

قرأت تدوينتك أول ما نشرت وامتنعت عن التعليق حتى لا يأتي تعلقي متأثرا جدا بحالتي النفسية بالغة السواد ، لكن ، وبغض النظر عن كون الصلع أخف عيوبها فهي قدرنا الذي قد يخفف من وطئته اعترافنا به حتي ندخل في مرحلة تغييره ، انا عارف ان كلامي سخيف خاصة انه مش ماشي مع الجو المكتوب بيه الموضوع(الجامد جدا) لكن أنا عارف انك ممكن تستحمليني ولك الأجر والثواب عند الله

أحمد

memo said...

صدقيني الرومانسية شي جميل ولكن عند الاغنياء فقط تكون اكثر جمالا عندما تصبح عند الفقراء تكون اكثر اختلاف كبـــــيرا



تحياتي

مروة جمعة said...

صباح الورد والياسمين الرومانسي عليكم !

هبة المنصوري :يا وعدي ..هبة المنصوري هنا ! ..طبعا خليك رومانسية وميرسي متشكرة شكرا على الأغنية والبقاء لله ياحنان ربنا يصبرها


عاشقة الوطن : أهلاااااا يارضوى حمد الله على سلامتك ..انت اللي جميلة بجد وتحياااتي العذبة لكي

مروة جمعة said...

جزر : أول مرة هنا اهلا وسهلا منور وشكرا لرأيك وسعيدة بوجهة نظرك الرومانسية للجميع ..شيوعية يعني ! ا

محمد : منور يا محمد ..والرومانسية كنز بشرط يكون معاك المفاتيح الصح ..أول مرة برضه أهلا بيك ! ا

مايكل : منووور ..أيه السوادوية دي الفول لؤلؤ بقى ! واحنا في عصر مليان رومانسية ألم تسمع يا أخي قول الشاعر الجهبذ ..إرمي حمولك عليا وأنا أرميهم عنك في الترعة ..؟! رووووووق ..وهتبقى فل الفل ! ا

مروة جمعة said...

رضوان آدم :أهلاااا بيك يا رضوان منور والله ..ومتشكرة جدا لذوقك ورأيك في المدونة ..وإن شاء الله نشوف مدونتك فتيه عفية ...صباح الورد ! ا

عصفور طل من الشباك : ازيك يارحاب ؟! ايه ده يا بنتي الرومانسية كلية كبيرة قوي ..خليك متفائلة وفل الفل كمان ..منوراني والله على رأي هبة المنصوري باشا ..! ا


أحمد حربية وسيد تركي : صل على النبي يا أحمد فيه إيه و سوداوية ايه مش مستاهلة ده مهما طال الليل بيجي نهار ...-ايه حكاية الصلع اللي بيجيب اكتئاب ؟! - والله سمير غانم وكل الصلعاء المشاهير مش أحسن منك يا أحمد ! يارب تدخل في مرحلة التغيير وربنا يوفقك ! ا

ميمو : أول مرة يا ميمو ومتشكرة جدا لمرورك ..منور ..وعند الغنياء اكثر جمالا ليه ..هيستوردوا ورد من بره ؟ايه يعني هياكلوا كافيار ..الفول أبرك منه ..هيولعوا شموع فرنسية بتطلع رائحة عطرة ..مالها شموع رمسيس بتاعة السبوع هه؟! مالها ؟! ا

الاسطوره said...

البلوج خفيف قوى وجميل واسلوبك فى الكتابه حلو قوى