مبروك للأهلي ..وللزمالك ..والمنتخب! ا



مبروك للأهلي ..وللزمالك .. والمنتخب! ا
تدوينة كروية ..! ا

أحب كرة القدم منذ الصغر ..كنت أتابع حلقات كابتن ماجد ..حلقة حلقة ..أشاركه وجدانيا ..-أيوه وجدانيا !-لدرجة أني كنت ألعب الكرة في المنزل ..ثم أحتضن الكرة مثله ..وأنظر لشعاع الشمس المتسلل من نافذة الحجرة العالية ..وأحس بلمعة عيني -مشوها بقى كانت بتلمع زي كابتن ماجد!-وأحاول توقيف قصة شعري على جنب مثله ..كان شعري يخذلني دائما ويتفرع إلى وصلات عجيبة! وأقول غدا سأقابلهم وسأفوز عليهم ..هيا يا حسام -أخويا!..-الضربة الصارووووخية ..دش ..اللمبة اتكسرت! لدرجة أني حزنت وبكيت فعلا لأني لن أرى ماجد مرة أخرى -قصة حب بقى !-..كانت أمي تمل من متابعتي لهذه الماتشات ..وتستفزها منظر الكرة التي تصاحبني في مدخل بيتنا .."أمال لو ماكنتيش بنت!.."..هذه المقدمة عن حبي لكرة القدم لاتعني أني مدمنة لها ..لكن أحب اللعبة الحلوة بجد ..وبما أني في مرحلة النضج انتقلت من المرحلة الماجدية- إن صح التعبير - إلى المرحلة الأهلاوية المصراوية ,,! بعقليتي الطفولية آن ذاك لم أكن أعرف أي افريقين أقوى ..الأهلي ..أم الزمالك ..أيهما أجدر بأن أشجعه بعد حبيبي ماجد الياباني ؟! ..حينها اخترت الأهلي ..ربما لأن الاسم راقني كثيرا ..أهلي من الأهل ..وعجزت عن تفسير معنى الزمالك ..-بجد عايزة معناها ارجوكم !- وكنت أندهش ..حد يشجع فريق مش عارف معنى اسمه ؟...أعرف ان الزمالك مؤسسوه أجانب ..ومن مؤسسي الأهلي الراحل العظيم طلعت حرب رائد الاقتصاد المصري ..إلى آخر القصص التي ربما سمعتموها في مئوية الأهلي ..لكني وقتها اخترت الأهلي - ولم أكن أعرف أن عائلتي كلها أهلاوية !-شدتني الفانلة الحمراء والروح البديعة ..وهكذا أصبحت أهلاوية ! ا

الثاني من يوليو 2007 ...نهائي الكأس ..! ا


طبعا يوم كان نتنتظره الجماهير الكروية المصرية ..وكنت بأمانة شديدة ..لا أفكر في مشاهدة المباراة ..! بصراحة ..خفت ! طبعا لم أخف على النادي الأهلي بل خفت من مشاهدة الزمالك ! كان عندي هاجس أن المباراة قد تكون من طرف واحد -غالبا أهلاوي- وهذا لا يسعدني مطلقا أن أرى فريقي المفضل يحصد الفوز تلو الفوز دون مجابهه حقيقية ..حتى وإن كنت أثق بأن الأهلي مؤسسة عريقة ..ولاعبي الأهلي بالفعل لديهم مهارات عالية ..لكن أين الطرف الآخر من المعادلة الكيميائية ؟ فوز الأهلي الساحق الماحق - الذي يسعد أي أهلاوي- على فرق مستواها الفني هزيل شبيه جدا - مع احترامي الشديد للأهلي- بما يروجه الحزب الأوحد -الوطني عن نفسه ..! فهو يفوز في كل الانتخابات ..كل الاستفتاءات ...أنا جدع ..أنا قوي ..وطبعا ..الأول على مصر ..بالصلاة على الحبيب ! ..وطبعا لو استمرت الحالة الكروية بهذا المنطق .. - وهي بعض الشئ مستمرة مع الأسف- لا تحلم مصر بمونديال جنوب أفريقيا عام 2010 ..ولا تحلم بكأس أفريقيا العام القادم ..وفقط يكتفي تلفزيوننا المبجلا في إذاعة صعود مصر إلى مونديال إيطاليا1990 - وهي اللقطات التي تصيبني بحالة من الإرتجاج العاطفي في نافوخي ! ..وتذكرني بمثل شعبي شهير ألا وهو "قصر ديل يا أزعر!"..وطبعا بعد ذلك ستذاع لقطات فوزنا الجميل في 2006 بالمونديال الأفريقي ..وصورة الرئيس يحمل كأس افريقيا للمرة الثالثة -رقم قياسي رئاسي يا جماعة !- وغير مباراة بوركينا فاسو ..و ..و.. هذا إذا استمر الحال هكذا ..لكني تفائلت بمباراة كأس مصر ..أخييييرا عاد الزمالك ! ..الشوط الأول كان شوط ماسخ بلا أهداف ..وعندما بدأ الشوط الثاني ..كانت المفاجأت ..واللعب الحلو ..عمرو زكي الهدف الأول ..بديع -ولو إن تعليقات شوبير كانت مستفزة شوية !- ولا يهمك يا أمير- بصراحة حد يسيب المرمى فاضي ؟!- ..عماد متعب الهدف الأول ..تقريبا بنفس الطريقة .!مبروك يا متعب العودة للتهديف...-هييييه- ده طبعا أخويا حازم !-..الحمد لله تعادل ..المباراة سخنت والهدف الثاني شيكابالا ...رائع جدا جدا ..- ربنا يستر والأهلي مايفكرش يشتريك!- ..أين أنت يا أبا تريكة ؟! ...أبو ترييييييكة وجووول ..والحركة الجميلة الطائرة - حركتي الطفولية الجميلة - هييييييه ! ..الغريب ان جمال حمزة كان صامتا طوال المباراه تقريبا ..إلى أن أحرز الهدف الثالث في الشوط الثالث ..أحمد شوبير يتسائل (هل تبيض القاهرة اليوم ؟!)- لا هتحمر يا شوبير أكتر من ماهي حمرا!_..كانت تغييرات جوزيه موفقة جدا ..أحمد صديق ..وأسامة حسني ..أحمد شديد قناوي ..غيرت مسار اللعب كثيرا ..الهدف الثالث ..والرابع كان مفاجأة بديعة من أسامة حسني !- ماشاء الله- ..والزمالك فعلا أبدع ويستحق التحية لأنه كان قريبا من الفوز أيضا ..لكني طبعا فرحت للأهلي هذه المرة لأن الفوز هذه المرة لم يكن أمام غريم تافه ..ولأن المبارة كان إيقاعها سريع وجميل..مبروك لأمير عبد الحميد الذي شارك في البطولة منذ بدايتها..حظ سعيد لمحمد عبد المنصف الذي أجاد فعلا .. مبروك للأهلي والزمالك ومنتخب مصر ..ويارب الزمالك يكون له نصيب في البطولات ..- صحيح هزعل شوية !- لكنها الروح الرياضية يا جماعة ..والحمد لله ..مباراة فعلا لن تنساها الجماهير -على رأي مانويل جوزيه في المؤتمر الصحفي والذي حيا فيه لاعبو الزمالك على آدائهم الرائع بالمناسبة -..ويارب كل حاجة في البلد دي تقوم على منافسة فعلا ..مش أنا قوي ..أنا أجدع واحد وفتوة الحارة والحواري المجاورة ..والشوارع ..-طبعا بالتزوير ..وبالمنافسة أمام منافسين وهميين ..! ..مبروك للأهلي والزمالك والمنتخب ...! ا


Comments

me said…
يسعدنى أنى اكون أول معلق
مش معلق رياضى لالالالالالا
معلق على التدوينه دى
أنا بقه أهلاوى أبا عن جد
زى الحزب الوطنى كده
بس إنتمائى مش أوى
يعنى عادى
الى يحصل يحصل إنما أخويه الصغير
الاهلى غلب نوزع شربات
خسر يشغل ياخد العزاء
friend said…
مع ان الماتش حرق دمي امبارح بس كان رووووعه من الفريقين وخاصه الاهلي مش عشان انا اهلاوي لا بس الصراحه راحه وهوه كان الفريق الافضل
والحمد لله اني اهلاوي بعدين حد يقولي معني زمالك يعني ايه ؟؟؟؟ هاقف واتنح قدامه واقوله معرفش يبقي منظري وحش اوي

تحياتي ياااهلاويه
اهلى اهــــلى اوة اوة

انا عمرى فعلا ماكنت كروى خالص مالص

انا بدأت اتابع من ساعه بطوله الامم الافريقيه تحفه وبجد ماتش امبارح كان تحفه بجد والاهلى استحق اللقب ولسه هانقابل الزمالك قريب تانى انشاء الله وكالعادة برضو هايتغلب ، عجبنى من الزمالك شيكابالا جدا دا مُهر بجد ريح اخلاقه جميله ومبروك للأهلى
وقدام الاهلى اليابانى لف وارجع تانى:(

تحياتى
Anonymous said…
ازيك يا مروة؟ عاملة ايه؟
ألف مبروك للأهلي
زملكاوي
micheal said…
هوووووووووووو أهلاوي
بس بجد مبروك للزمالك هذا الاداء الرائع المشرف و مبروك للمنتخب لو اللاعيبه دي كلها استمرت كده
تحياتي
بصي أنا ما بحبش الكورة

وخصوصاً المحلية

عشان كده

عشان خاطري بلاش أي تدوينات كروية في المستقبل
تماموز

على فكرة أنا خلاص خلصت امتحانات
هيييه
يا مجنونه .
.
.
.
.
.
حتي في الكوره
سندباد said…
صباح الاهلي والف مبروك
yas said…
ازيك يامروة
انا كنت برضه بشاركك حب ماجد وانا ضغيره وكنت بنتظر حلقاتهبس انتى عارفه انا مكنت اعرف انه يابانى غير قريب من د/ميشيل حنا فى بص وطل بس على فكرة مكنش شبه اليابانيين ولاحاجه ولا يمكن عموما انا نظرى ضعيف انا برضه اهلاويه بس الحقيقه انا كنت زمان برضه بحب الكورة بس دلوقتى بقيت بمل انى اتفرج عليها ساعه ونص كتير برضه انتى عارفه لو كانت شوط واحد كان ممكن انا دلوقتى بحب كورة اليد سريع سريع بتخلص بسرعه معرفش حاليا بقيت بزهق بسرعه اوى من كل حاجه
للاسف مشفتش الماتش شكله كان حلو بس اول مكنت بسمع زعيق فى الشارع افتح التليفزيون الاقي جون تخيلى حتى التليفزيون حبيبي بقيت بمل منه
سلام
maioya said…
والله فعلا ياريت كل جاده في البلد الغريبه دي محدش يفرد نفسه علي حد
ولافريق يفرض نفسه علي فريق لمجرد انه اقوي ومسيطر وخلاص
ياريت كل حاجه تبقي فيها منافسه
مش في الكوره بس
وعامه نا زملكاويه
والماتش كان كويس مش مهم مين فاز
الزمالك لعب ماتش كويس يصراحه ونحييه عليها
ومبروك للاهلي

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي