Wednesday, August 15, 2007

أسابيع الأفراح ..عقبال عندكم ..! ا


أسابيع الأفراح ..عقبال عندكم ! ا


المحبة ناموس الله ..فأنتم ماحييتم إلا لتعرفوا المحبة..وأنتم ما أحببتم إلا لتعرفوا الحياة"! ..اخترت هذه الجملة لميخائيل نعيمة والمنشورة في مقالة طويلة في مجلة الهلال 1950 – سأنشرها في المدونة لاحقا إن سمحت الظروف – بعنوان "شجرة المحبة"..اخترت أن أبدأ بها كلامي عن الأفراح..وأنا تقريبا حققت رقم قياسي –بالنسبه لي !- بقالي أهو – ده الأسبوع التالت على التوالي- معزومة على أفراح ..وخطوبات ..! ...وكمان أول مره أشوف مأذون لايف ! ..ها ياعروسة موافقة ؟!..تخيلت نفسي المأذون بيسألني نفس السؤال..هجيب يافطة عليها موافقة ..على أساس ان الواحد هيتجوز في البرلمان !..أخذت في الأيام الماضية جرعة لا بأس بها من عقبالك ..خلاص هاتوا جديد!..جدتي العزيزة الغالية تقول لي "ياللا عايزين نفرح بيكي".."أقول لها لسه شوية كده ،النصيب وربنا يسهل"...تتقمص كالأطفال "عايزة أفرح بيكي وأنا على وش الدنيا .." .."ماتقوليش كده ان شاء الله تجوزي ولادي ..وبعدين احنا أربع بنات ..وأنا الكبيرة صحيح بس ماعنديش مانع يتجوزوا قبلي " تخرج التقاليد الأصيلة .."الكبيرة الأول !" طيب حاضر ياستي ..بس أكون نفسي الأول!..ا


في مصر عندنا مشكلة في الأفراح ألا وهي انها كلها شبه بعضها!..العنب..البلح ..الخيار ..و"عملت اللي عليا معاكي..سامحيني لازم اربيكي وأبعد لبعيد !"..تخيلوا دي غنوة أفراح دي!..دي قلة قيمة ولا مؤاخذة ..!...هذا غير المغالاة في تكاليف الفرح أصلا ..وتكاليف الجهاز ..يعني طقم الملايات (دسته!)..والحلل (5 أطقم مثلا!)..وكأنهم هياكلوا جبل أحد!..وماله لما تتجوزوا بأوضة أو اتنين ..وتجيبوا لما تفرج ..لازم تستلفوا من القريب والبعيد – كان هذا تساؤلا غريبا مني لأمي وأخريات – قالوا أمال الناس هيتفرجوا على ايه !..أنا افهم انهم بيأسسوا عشش زوجية مش متاحف قومية ! ..أما أمي فكان ردها بليغ كعادتها معي في البلاغة ..طيب ..أما نشوف هتعملي ايه يافالحة!...كل خير ياماما إن شاء الله! ا ..وبعيدا عن موضوع الزواج في مصر ..-الذي يحتاج لتدوينة قادمة إن شاء الله – تهنئة خاصة لصاحبة الدكة والشغب والتاريخ الملئ بالحيرة والأحلام الحلوة ..والأغاني الحلوة ..والكتب ..كل سنة وانت طيبة – إيه ده المفروض أقولك مبروك ! ...مش مقصودة بس هسيبها !..كل سنة وانت فرحانة يا رباب ..الحنة النهارده ..صحيح هتسافري الإسماعيلية ..وتسيبي الجيرة الحلوة لدنيا أحلى إن شاء الله .. وذكريات ثانوي ."ولسه يامروة ما اتغيرتيش".ياااه لسة كمان بتسمعي عبد الحليم !..ياللا عزائي الوحيد ..في الميسدات إلى أن أشحن ! ا

ألف مبروك للدكتورين (هالة ومحمد)..و(رشا وإسلام)...(رباب ومدحت).. وإهداء خاص للزميلة والمدونة (غادة وحامد) صاحبة مدونة مع نفسي..ولأصغر خال عندي الجميل محمد ..عيد زواج سعيييييد...سامعاك بتضحك يا خال ..-لأنك متجوز وأنا في ثانوي ولسه أنا كل سنة بفتكر أول واحده! ..أول عيد بره مصر ..يارب ترجع بالسلامة ..
...بارك الله لكم وعليكم وجمع بينكم في الخير دااائما ..آمين ..


اخترت هذه الأغنية لعبد الحليم حافظ ..هي جديدة بالنسبة لي أول مرة أسمعها وعجبتني ..واستغربت ان حليم غنى للفرح كمان ..أرى انها مناسبة ..أمي صاحبة البلاغة والحلاوة ..لما قلت لها يشغلوا الأغاني اللي زي دي في الأفراح "بالإضافة لمحمد فوزي وليلى نظمي بدلا من العنب ..العنب بصوت أنكر من صوت الحمير .."ردت عليّ..الناس عايزة حاجة مشخلعة ..وبعدين يامروة أغنية عبد الحليم دي شبه الأغاني الوطنية ! ..ربنا يسعد الجميع ..وعقبال فرح عروستنا ست الكل "مصر"..لما تتحرر يارب ..ليلتكم فل ..! ا

14 comments:

مواطن زهقان said...

انا سعيد انى اول واحد اعلق فى البوست دا
وفعلا عجبنى جدا لانك بتعرضى فيه اللى بيحصل فى الافراح بشكل عام ومش فى الشرقيةبس لكن فى انحاء المحروسة كلها
وعملتى زيى
ان انا فى الصيف دا زرت ولا يجى 30فرح اصل الناس بقا كل حاجة عندها افراح مفيش حزن خالص
ربنا يكتر من الافراح بس مشلازم ننسى المحروسة بكلمة ونخليها فى زهننا عشان تتجوز وتخلص من اللى هيا فيه

yasmine said...

وانا سعيده انى تانى واحده اعلق فى البوست ده
فعلا الافراح ممله جدا لانها كلها شبه بعض اللى بيتغير العريس والعروسه واحساسك انت ساعات بروح فرح مش طايقه نفسي بس مجبره علشان الاهل وساعات تروح فرح تكون مبسوط علشان حد عزيز عليك بيتجوز
وانا برضه اشترك معاكى بانى حضرت افراح كتيره السنة دى كل الناس تقريبا بتتجوز
لسه حاضرة فرح امبارح ده كان فرح مختلف كنت حاسه انى فى السيرك اه والله كانوا جايبيين كاريكا وهو جايب بقي معاه السيرك ناس لابسيين احصنه والناس الطويله دى ومش عارفه اسمها اللى بتبقي فى المولد دى وبيدوروا بيها بس اهوه ضحكنى شويه
عموما انا نفسي اعمل فرح مختلف
ومبروك لكل اللى اتجوزوا

yasmine said...

اه بخصوص الاغنية
معلش يامروةياريت متتهوريش وتشغلى الاغنيه دى فى الفرح هتطفشي الناس
انا مش بحب الاغانى البيئه بس مش بحب برضه الاغانى القديمة ودى اغنيه معلش تجيب اكتئاب لو كانت فى فرح يالا يارب نحضر فرحك قريب

aliwa said...

واللهى يا مروة انتى طيبة دة الدى جى ولا حتى الكمبيوتر البنتيم واحد اللى بيشتغل فى اى فرح دة احسن بكتير من قبل ما يخترعو تقليعة الدى جى دى كانت ليلة الحنة عندنا بقة يجى اصحاب العريس يجبو اصحابهم ويجيبو سماعتين كبار اوى وكل واحد يطلع موهبتة الفذة علينا يعنى بصراحة كدة اصوات العنب والخيار دى نعمة با النسبة للى كان بيحصل قبلها وبعدين انتى نسيتى الحشيش لية دة من اهم قواعد الافراح اليومين دول ولا انتى كنتى تقصدى الافراح البناتى وشكرا على تشريفك مدونتى

محمود علي said...


الف مبروك لكل العرسان
وعقبال الباقي

وعقبالك انت مخصوص
وعقبال مصر قبلنا كلنا

أحمد..يكتب كما لم يكتب من قبل said...

أما نشوفك انت هتعملي...
وياتر يهتتجوزي علي مذهب الامام ابي حنيفة النعمان؟

عاشقة الوطن said...

صباح الورد يامروتى

هو الصيف كده كله افراح وهيصة
وبرضه عقبال مانفرح بيكى

والمشكلة فعلا ان الافراح هى هى مابتتغيرش
وكل العرايس والعرسان شكل بعض فى الجهاز والشقة والعفش ومال قارون اللى محتاجينه عشان يتجوزوا
خي ان شاء الله يامروة
ربنا يستر ونعرف نتجوز فى البلد ديه

صباحك ورد وفل وياسمين

هدى said...

صباحك سكر يا مرمر
الف مبروك لكل اللى اتجوزو وعقبال اللى فى السكة وانتى اولهم
شوفى موضوع الافراح والليالى الملاح ده بيعكس الحالة العامة اللى عليها سكان المحروسة واحنا منهم !
بمعنى حالة الضوضاء العامة اللى احنا بنعانيها بتوضح اوى فى الزحمة ومن انواع الزحمة الافراح او اى اجتماع كبير تلاقينا كده مهرجلين والادارة معدومة عندنا اما الافراح بأه فحدث ولا حرج الناس حالتها تقطع القلب عندهم كبت رهيب ومالوش حل او منفد يخرج منه غير الصراخ والاغانى بصوت فظيع عالى ووحش بس نوع من التنفيس !!! ايوة متضحكيش فعلا الناس عايزة اى حتة تصرخ فيها من غير ماحد يقولها بتعملى ايه ومن الاماكن المتاحة الافراح والملاهى ! ايوه الملاهى يركبو اى حاجة عنيفة ويصرخو من قلبهم تنفيس !!.
نادرا لما احضر فرح اصحابه قدرو يلتزمو بالفرحة من غير ما يأذو اللى حواليهم كل واحد فى الافراح اليومين دول بيعمل اللى فى نفسه لا بقينا نشوف عروسة قاعدة تتفرج ومكسوفة ولا عريس بيفضل مكانه دول هما اللى بيحيو الفرح للمعازيم !
واسهل رد يتقال آهى ليلة وتعدى
ايه اللى بيحصل بقينا ليه مظهريين
معلشى طولت عليكى
عقبالك يا رب وتعملى فرح صغنون ظاهريا وكبير وعميق معنويا
ربنا يسعدك

david santos said...

I passed to congratulate it with its work and to desire a good August to it in vacation.

ابو مفراح said...

صحيح الحمد لله اشعر فى البلد بهوجه زواج وهى على العموم ظاهره صحيه ربنا ييسر الحال للعذاب اجمعين

e7na said...

انا متأكد ان جوازك هيكون حاجه مختلفه وهتنفذى كل اللى قلتى عليه

فيونكه said...

ايه صحيح الغنوه الأنتيكه دى يامروه؟ هو انتى واخده توكيل حليم؟ ماله عمده بس؟ نازل بغنوه جمعت بين البصل والجزر والرمان.. شفتى الإبداع يابنتى

على فكره وحشانى! ادعيلى كتير وأشوفك على خير

مروة جمعة said...

مواطن زهقان :ربنا يسعدك كمان! ...منورني ..حلوة المحروسة تتجوز دي ! ..ربنا يكتر افراحكم

ياسمين : منوراني يا ياسمين وربنا يسعدك ..انا سعيدة بيكم ..كل كلامك تمام التمام ..مش هتعملي مدونة ؟..غنوة حليم مالها ! ..عاجباني بقى واهي وطنية هههههههه


عليوه: بجد ! لا اظن المواهب احلى من العنب والبامية ههههههههه ...منور ..بس جرب حظك في الغنا

محمود علي : أشكرك ..شكر مخصوص على الأمنية الرقيقة وعقبال مصر الأول

أحمد يكتب كما لم يكتب من قبل : منور يا أحمد..هعمل ايه يعني ؟كل خير إن شاء الله ..
حلو تساؤلك الساخر اللي في الآخر ده ..والاجابة ..أيوه! ا

عاشقة الوطن : صباح العسل يا رضوتي يا جميلة
فعلا هو الصيف كده ..خليك متفائلة ان شاء الله هتعرفي تتجوزي في البلد دي وتحبي في البلد دي ...بلدنا حلوة يا جماعة ..بلاش تريقه! ا

هدى : ربنا يسعدك يا قمر انتي كمان ..والله تفسيرك منطقي ومقبول جدا ..وكمان اللي يغيظ ان المعازيم بيقعدوا ويخلوا العروسين يحيوا اليلة ..حاجة غريبة! ا


David Santos : Thank you for visting and for ur comment ..I wish good Augst for you too !

أبو مفراح : صباح الأفراح ..منور ..ربنا يسهل للجميع ويعم الحب البلد كلها ..آمين

إحنا : صباح الفل يا أحمد ..انت بتصدق ! ومتأكد كمان اني هعمل حاجة ..ربنا يعطينا الصحةويرضى عنا آمين منور

فيونكة : مسك الختام ..عصفورة السلام ..فيونكتي الأمورة ..هبة ازيك ..انت كمان وحشتيني..ربنا معاكي يارب ..ويوقفلك ولاد الحلال في كل باب ..وبالنسبة لتوكيل حليم هي بتيجي كده !..أنا بقول مالها فرقة حسب الله مثلا ..ابسطها يا باسط ..! ..ربنا يوفقك

samsooom said...

انا مشكلتى مع الافراح حاجة واحدة الاغانى اللى ماعرفلهاش تصنيف هل هى اغانى شعبى زى ما الناس بتقول ؟ ولا اغانى هابطة زى ما انا بقول ؟
ولكن على العموم حصصل معايا موقف كدة كنت ف فرح وبصنعة لطافة رجت للواد الدى جى وقلتله بزوق : ما بلاش اغانى شعبى وخلينا ف عمرو حماقى ايهاب توفيق حتى !حاجة نضيفة يعنى
قام بصلى حتة بصة وادانى واتوصى : ياعم هو ينفع فرح من غير شعبى امال هانرقص على ايه
و من بعدها هاتك يا قرف طب الناس بتوع الفرح محترمين يشغلوا اغنية البانجو ليييييييييه ؟
و فمة تانية على اغنية من خمسة لخمسة ونص واحد واقف يرقص على لمبة نيون محروقة ولما دخل ف الموود قام كسرها ! غباوة
وعلى الصعيد الاخر حضت فرح موز موز موز الدى جى ما شغلش ولا اغنية شعبى والناس رقصت وانبسطت جدا
مش عارف بقى هو انحطت ف مستوى السمع ولا انا اللى متربى زيادة عن اللزوم زى ما اصحابى بيقولوا ؟