Sunday, August 5, 2007

الأستاذة رفيعة ..والوحدة العربية ! ا

الأستاذة "رفيعة "...والوحدة العربية ! ا


في فقرته الإسبوعية على قناة المنوعات كان عمرو سليم بيتكلم عن تعلم الرسم ..وان مافيش حد مابيعرفش يرسم ..لكن هناك من يكعبل من يحب الرسم ..ذكرني ذلك بالكعبلة و بكراسة رسمي كنت أرسم فيها ما أعتقده جميلا ..طفل صغير يلعب لعبة "قفز الحبل"..طفلة أخرى تركب أرجوحة صغيرة ..تطير ضفيرتها خلفها ..فراشات كثيرة وزهور حمراء ..كنت لا أعرف كيف أرسم الفل الذي يزرعه خالي ..فورقة الكراس بيضاء والفل أبيض ..وعلبة ألواني بها لون وحيد لم يستخدم اللون الأبيض ..الذي كنت ألوم صانعي الألوان عليه ..واعتقد انهم أغبياء .."هم مش عارفين ان كراستي بيضا!"..كان الأطفال يطلبون مني ان ارسم لهم .. ،كنت أرسم على السبورة أيضا ..كنت في ذلك الوقت طفلة صغيرة في دولة عربية شقيقة – المفروض إننا أشقاء!- جاء اليوم الذي تطلب منا مدرسة الرسم الرسوم ..كان اسمها "رفيعه" ..وهي اسم على مسمى فعلا ..كانت أمورة وغندورة ..صدمني رأيها فيما أرسم "إيش هذا!"-على فكرة كنت في ابتدائي -..طبعا نظرت في كراسة الرسم ،ارتبكت ..ترى هل كان زملائي ينافقوني ؟!..هل بنات التربية العملية الذين شجعوني وأعطوني علبة ألوان هدية كانوا يعطفون على رسوماتي البائسة ؟..تطورت الأمور و ألقت المعلمة الكراس في وجهي .."كيف ترسمي أشخاص!"..يعني أرسم العيد بلا اي شخص.."نعم...مظاهر فرحة العيد!" وضعتني المعلمة في مأزق ..يعني أرسم مظاهر الفرحة ..يعني ارسم أرجوحة فرحانة وللتأكيد أكتب فوقها انا فرحانه ؟..أرسم محلات الملابس والشيكولاته ..طبعا بلا بائع ..وأكتب العيد فرحة! ..أرسم بسكوتة..تصافح كعكاية ..كل سنة وانت طيبة ..عيد جمييل!..أرسم فستان العيد والصندل الجديد وهو تحت سريري يقول "أنا يا جماعة فرحان لأني هتلبس في العيد!"..ما فهمته من المعلمة ان مافعلته حرااااام ...حراااام ..! ..تعقدت الأمور معي ..حرام؟..قالت احدى زميلاتي "يوم القيامة سيقال لكي أحيي ما رسمتيه!..ثم تذهبين للنار بسببها!"..لم أكن مقتنعة لأن كتب المطالعة فيها أشخاص ..وإن كانت رقاب الشخصيات مخططة بخط أبيض طويل ..فهمت ان رقبتها مقطوعة بهذه الطريقة حتى لا تكون هناك شبهة حرمانية في الموضوع ! كانت أمي ترسم على هامش كتبها أحيانا رسوم جميلة ..وكان أبي يرسم لي الأراجوز ..كنت أسأل أمي الأزهرية .."حرام صحيح ؟"..قالت :"لم تعد هناك عبادة أصنام وبالتالي مش حرام ..المدرسة متغاظة منك!"..وهذا ما تأكدت منه عندما وجدتها تقلد اللهجة المصرية "بمياعة"..وعندما بدأت تقف لي على النقرة..وعندما تعلق أحيانا على رسومات بتعليقات سخيفة ربما أبكتني ..كانت موضوعاتها تعجيزية "البيئة البدوية "..كنت ألتقط المفردات من المسلسلات البدوية فأرسم ..سلسلة جبال تشرق من خلفها شمس برتقالية ..وخيمة وبعض الحطب المشتعل ..من غير بني آدم واحد ! ..تصيح في وجهي "إيش هذا!"..ماذا أفعل ..أنظر لرسومات زميلاتي أبناء البلد الأصليين لا أجد شيئا واحدا زائدا سوى بعض المفردات التراثية مثل "دلة القهوة "..تعقدت الأمور معي..ماذا تريد الأستاذة رفيعة بالضبط؟ ..كانت تسخر من استعمالي للألوان الجواش –لكن هي علمتني يعني وقلت لا؟..- صحيح كنت بحطها على ضوافري على أساس انها حنة !- لكن كانت توبخني وبعنف ..إزاي مش عارفه استخدمها ! .كنت أرسم بالرصاص ثم بالألوان..ارسمي بالألوان على طوووول! ..ولأني مصرية دماغي ناشفة ..قررت أن أعود لرسم البني آدمين مع عمل مذبحة مماليك في كراسة الرسم ..إيش هذا ..يع –جملتها الأثيرة !– لكني أنبهها إلى الخط المرسوم على الرقبة ..أهو ..رقبتهم مقطوعة ..! ا
يظهر إن العرب جميعا توحدوا أخيرا ..في منظومة الإبداع التعليمي ..أحمدك يااارب !
ا

15 comments:

Nada said...

:D

yasmine said...

موضوع حلو اوى بجد
ماما برضه بتقلى نفس كلام الاخت رفيعه ان رسم الارواح حرام اما بتشفنى برسم بس انا مش مقتنعه انه حرام اصل انا مش برسمها علشان اعبدها يعنى
وكمان تقولى التصوير حرام وان المصوريين اول ناس هتدخل النار برضه مش مقتنعه دى صور للذكرى انا مقتنعه انه اكيد زمان كان المصوريين حرام لانهم كانوا بيعملوا التماثيل ويعبدوها
بس عادى ماما تقول الكلمتين دول اقولها الكلمة الاثيرة عندى ملكيش دعوة بيا
المهم ياستى توصليلي ازاى اقولك انا هعرف اوصلك ايميلك انا عرفاه هبعتلك عليه اوكيه بس انا للاسف مشغولة الفترة اللى جايه بس انتظرى ايميلى فى القريب العاجل ان شاء ال

محمود علي said...


هههههههههههههه
جدعه
والله العظيمه جدعه
ايوه كده
ارسمي وعبري وفكري زي ماانتي عايزه
متسمحيش لحد انه يحكر علي عقلك او تفكيرك

هدى said...

صباح الورد البلدى المنقط بالندى يا مرمر
الموضوع بسيط وجميل ولو حقيقى الرسم حرام يبقى واحدة زىى المفروض تروح النار حدف لكن انا غير مقتنعة تماما والاعمال بالنيات واستفتوا قلبكم وانا قلبى بيقوللى انه فن واحساس راقى سمو بمشاعر الانسان ونوع من انواع التعبير مش ممكن ربنا سبحانه وتعالى يحرمه يا ريت نرحم نفسنا من الفتاوى ونركز فى حياتنا بجد .
ربنا يوفقك
هدى

aliwa said...

السلام عليكم اولا بس بجد انا زعلان حد يعمل كدة دة كلام برضو المفروض انك انسانة ومثقفة معقول تيجى منك ترسمى الناس وبدال ما تظبطيهم كدة تقومى تقطعى رقبتهم على الورق بس ما فاضلشى غير انك تحرقى الورق كمان بس عاوزة الحق كان نفسى تعملى كدة فى عقل المدرسة بتاعتك دى http://aaaaaaah7m.blogspot.com

قلب الأسد said...

أمال أنا بقى .. ! كنت أحب قوي أرسم بنات بمايوهات !و فساتين سواريه بقى يا أختي ماقولكييييش ! بس ماقولتيش كنتي في أي بلد ؟ و قعدتي كم سنة هناك ؟

عاشقة الوطن said...

صباح الورد على أجمل مروة
ازيك ياجميل

هى أكيد كانت متغاظة منك يامروة
معلش يابنتى هما العرب كده بيغيروا من بعض والحمدلله

تحياتى ياقمر

micheal said...

أمجاد يا عرب أمجاد
:)
تحياتي

لو كنت أعلم said...

ههههههههههه
تصدقي بالله إني سمعت نفس الكلام من مصريين

فقد انتقلت إلينا الثقافة البدوية
ولم نحسن نحن التمييز بين الثقافة البدوية _أطلق عليها ثقافة مجازاً والثقافة بريئة منهم_وبين الثقافة الدينية النابعة من سماحة ورقي هذا الدين العظيم

يابنتي القرآن نفسه قال إن إن أشد الناس كفراً هم الأعراب

بس بوست عسل

بس إيه الرسم العجيب ده
إيش هده؟!؟
هههههههههههه

فيونكه said...

مرمر.. وحشانى أوى موت جداً خالص

جميله غنوة حليم والفيلم كان جميل أوى ومابنساش دور عبدالسلام النابلسى فيه.."أنتِ مش عارفه بتكلمى مين! ده يبقى عين أعيان كرموز".. كان دمه خفيف بشكل! وكان عامل دويتو يجنن مع العندليب!

لو جينا للرسم بقى فأنا كنت بارسم حلو والله.. بس ماعرفتش أنمى الموهبه + ماعدش عندى صبر .. لسه هارسم بالرصاص وألون وكده؟! بس برضه تلاقينى لو سرحت أرسم حاجه بالقلم الجاف على هامش كتاب مش فاهمه منه حاجه أو ورقه نتيجه أو حتى تذكرة أوتوبيس

عايزه أشوف رسوماتك.. بس بالبنى آدمين وحياتك! احنا ناقصين وحدة؟ هيبقى ف الحقيقه وف الخيال كمان؟ ده غلب ايه ده؟

عمرو سليم said...

شكرا يا مروه لانك فتحتى الموضوع ده..لانه رغم بساطته بيقدر يجاوب ليه ما عندناش فنانين بحق وحقيقى فعلا فى مصر..وازاى ممكن الوضع الاقتصادى لبلد فيها نهب وفساد ومش لاقيه تاكل ممكن يؤثر جدا على ملامح شخصيتها من حبها للفن وللحريه واللا لا..البلاد زى البنى ادمين بالظبط..عينيها بتتكسر ونظرتها تبقى لتحت لما تكون مش لاقيه تاكل ....شكرا مره تانيه يا مروه وبرضه لسه عند رايى بان ما فيش حد بيتولد وهوه ما بيعرفش يرسم.....والف مبروك على مدونتك واسمها المميز

سندباد said...

لوبطلنانرسم ونكتب نموت
عبرواياجماعةعلى اللى جواكم
عشان الواحد لو فضل يكتم جواه هيموت

انا مواطن زهقان شرقاوى زيك
ياريت تزورينى فى مدونتى

سندباد said...

http://resalamisr.blogspot.com

مروة جمعة said...

ندى :أشكرك على مرورك يا سكرة

ياسمين :منوراني ياقمر ...وكلامك كله تمام التمام ..والحمد لله عرفت اوصلك اهو! ا

محمود علي :إزيك يا محمود ..جدعة مين خليها على الله ..منور! ا

هدى: صباح العصافير والديوك بتأدن ياهدهد..المشكلة في ان الناس مش عايزة تفكر ..عايزه اشوفك رسامة كبيرة ..ماشي؟ربنا يوفقك ومنوراني

عليوة:منور ياعم ..بجد هقولك ايه معاك حق تخلف والله! بس المضطر وانت عارف المصري بيفكر ازاي..يا عم ربنا يكرمها بعيييد عننا!

قلب الأسد : منورررررررررة وكل سنة وانتي طيبة..كويس انك بترسميهم بس! ا الدولة ..؟..بلاش احراج! ا

عاشقة الوطن :رضوى البسكوتة الجميلة ازيك أخبارك ايه؟..والله انتي عسولة وواحشاني برضه ..ربنا يسترها ع العرب كلهم! ا

مايكل : منور يا أبا الامجاد كلها ..تحيااتي! ا

لو كنت أعلم : إزيك يا دكتورة ؟..والله معاك حق فرق بين الثقافة والتعقيد..فرق بين الفهم الصحيح للدين العظيم وتضييقه في دوائر مظلمة متخلفة .. على فكرة فيه أعراب مؤمنين برضه لو راجعتي الآيات!بالنسبة للرسمة ..أؤيدك..إيش هذا؟! ا

فيونكة : بعد طووووول غياب عادت هبة تنور مدونتي المتواضعة إزيك يا سكرة انت اللي واحشاني والمنصورة واحشاني كمان -من غيري وحشه عارفه!-آه عبد السلام النابلسي ده تحفة والأغنية دي وموقفها في الفيلم هايل ودمه خفيف ..أنا لسه معايا رسمتك ..نورتيني يا مرمر 27 يونيو2007 !..رسمك حلو فعلا ..ماتتعبيش نفسك ..خلي الامور كده ..أما عايزة تشوفي رسمي ..فينفع ارسم لك حمام ووز وكده؟! برسمهم حلو برضه!ا

مروة جمعة said...

عمرو سليم : معقولة؟! الأستاذ عمرو سليم بنفسه في المدونة..يا مرحبا منور وواحشنا شغلك الجميل ..عرفت انك اتكلمت عن موضوعي في قناة المنوعات يوم الجمعة الماضي ..ولازلت تصر ان مافيش حد مابيعرفش يرسم ..انت قلت الكلام اللي طبعا ممنوع تقولوا في الإعلام المصري المبجل ..الوضع الإقتصادي ممكن يأثر على عشقنا للحياة نفسها بكل مافيها من فن وألوان وحرية ...وعندك حق ان الأوطان زي البني آدمين تمام ..الله يبارك فيك يا أستاذ (بلاش أقول جنرال عشان مش تزعل!)شكرا على تشجيعك -مش أول مرة تشجعني- بارك الله فيك..صباح الفل ! ا


***********************************
سندباد:أهلا ياأهلا بالشراقوة..!كلامك جميل وياريت ترسم وتبدع كمان ..وإن شاء الله هزور مدونتك ..بس انت زهقان ليه؟...فيه حاجة بتزهق في البلد ..أما انت غريب ! ..تحياتي