بئر نور



بئر نور



سؤال اعتدت عليه في الأيام الأخيرة .."إنت فين "؟.
."والرد المعلب الجاهز
أنا هنا والله ..هاهاهاها..-صوت ضحكة شريرة - انت اللي فين بقى ؟.
اللي فين ؟ طيب ..! حد فاهم حاجة ؟


..أنا لا أعرف اين أنا الآن تحديدا ..أبحث
عن ثغرة صغيرة أنفذ منها ..
عن بعض نور ألطخ به أيامي..أعرف انها ستصبح مزركشة
..تائهة مابين النور والظلام ..
..لكن عندي أمل فى العثور على بئر نور -ليس الموجود نواحي ليمان طرة ..نجاه الله !ا
تغطس فيها أيامي ..وسواء عادت ..أو لم تعد ..يبقى عزائي
بأني تركت أياما مبهجة منيرة .
.يلتقطها بعض السيارة من المحبطين
.الباحثين عن الأمل في حياة أفضل
...لكن يبقى هاجس ..أن تباع بعد ذلك بثمن بخس ..لمن لا يستحق ..

سين سؤال : ياااه فينك من زمان يا مرمر ...
..الله ..ماقلت عايشة ..موجودة يعني حاجة غريبة ! ا

Comments

بتدورى على النور
جوه بير

طب دورى عليه فى حتة نور شوية

عموما

البير ده غالبا هتلاقيه
جواكى
سندباد said…
مش عارف ليه حسيت انك بتتكلمي عني
تسمحيلي ادور معاكي
Diala said…
مروة
جربي في آخر النفق..و إذا لقيتيه خبريني

صباح الفل
صباح الورد :

هتلاقى النور اكيد بس دورى جوة نفسك ، واكيد هتلاقى اللى يشتريكى بالغالى وليس بالبخس كما فعلو مع يوسف الصديق ، امضى وراء نفسك وراء حلمك وراء تفسير رؤياك الصالحه حتى تجدى وتتنبئى لنفسك بالمستقبل الجميل ، احتملى العجاف من السنين تذوقى طعم الانين ،والحنين حتى تحسى بالرجوع حتى تحسى باللقاء ، حتى تحسى انك من الصابرين من المؤمنين .

تحياتى

محمد فوزى .
micheal said…
بصراحه أنا كمان بدور
تحياتي لكي
وكأنه أصبح من الفروض اليومية...سؤال لزج لا معني له ..انت فين؟؟...أو ازي الحال... ومن الطبيعي أن تكون الإجابة عليه حمقاء لا مبالية ...ماشي الحال...أو انا هنا أهوه...لكن تبقي الإجابة الحقيقية للأشخاص المميزة الذين يهمهم حقا ان يعرفوا أني من أجلهم أعيش وليس من أجل هؤلاء الحمقي اللذين سيبيعون أيامي بدراهم معدودة لأناس هم أكثر منهم سخافة لن يقدرونها حق قدرها وهم فيها من الزاهدين....بس صحيح قوليلي انت فينك من زمااااان؟
Diyaa' said…
الطاقة اللي في أعلي البير...نقدر نشوفها بالبصيرة ..وزي ما جاوبتيني..نتمسك بيها بالإيمان
ربنا ينولنا كلنا الهداية
وطاقة النور
اللي تنور حياة كل الناس الجميلة
بما فيهم انتي يا مروة
Anonymous said…
يارتنى اعرف اجيب حتى شمعه
ولا عود كبريت
واولع
لا مش فى نفسى
اولع نور ينورلى
ظلامى وعتمة ايامى
آه يانى من عتمة ايامى دى

بس ادينى موجوده هنا اهو
تحياتى يا جميله
كتير ممكن البير ده موجود قدامنا بس مش بنقدر نشوفه
Anonymous said…
بير نور بس؟؟ بير بس؟؟ خليكي طماعة يا مروة.. فيه أكبر من كده بكتير.. النور اللي خرجه من البير.. واللي نجاه من الكيد.. واللي خرجه من الليمان كبير.. واللي أنعم عليه بالخير.. واللي خلاه على خزائن الأرض أمين

كلنا يا مروة نفسنا أوي فيه ووالله محتاجين أوي ليه
Marwa Friday said…
صباح الورد والنور عليكم ..

شمعي أسعد : شكرا يا باشمهندس لمرورك ..هندور في حته واسعة شوية ..ينفع ستاد القاهرة؟..

سندباد : منور يا سندباد ..أسمح لك بالتأكيد انك تدور ..

ديالا : عصفورة لبنان الجميلة منورة ..يارب .زإذا لقيته بخبرك أكيد ..صباح الفل

أنا من أهوى ومن أهوى أنا : منور يا محمد ..تعليقك هايل جدا بفكر احطه بدلا من البوست ..بجد هايل ..بالتوفيق

مايكل : منور يا مايكل ..دور ولا تيأس ..استمر

أحمد حربية وسيد تركي :منوووور يا عم أحمد منور ..راااائع جدا جدا ..بفكر الغي البوست واحط التعليق بتاعك انت ومحمد فوزي ..بجد تحفة ..بالنسبة لأنا فين ..أنا هنا هنا يا بن الحلال ! ا

ضياء: إزيك يا جدع ! ..فعلا قوة الايمان تنول الواحد ..ربنا يهديك وشكرا لدعواتك الجميلة ..

شيماء الجيزي : طبعا صباح الفل عليكي وعلى كل بورسعيد ..الكبريت والشمع مش هيجيبوا نتيجة ..جواكي نور مدفون ..طلعيه..ربنا ينور أيامك بجد ..تحياتي يا أمورة

محمود علي : شكرا يا محمود لمرورك ..وتنويرك ..هلاقيه واتمنى تلاقيه كمان

سامر محمد : منور يا سامر..أنا فعلا عايزة ابقى طماعة جدا جدا كمان ..حد مايطمعش في نور ربنا يا سامر ..؟..تحياتي وتمنيات بالتوفيق
Anonymous said…
مش عارفه هتصدقى ولا لأ.. بس دى خامس مره أقرا البوست..هادى وجميل أوى يامرمر.. وورانى مروه مستخبيه ورا الضحكات الشريره.. مروه رقيقه أوى
عجبتنى حتة" وسواء عادت أو لم تعد يبقى عزائى أنى تركت أياماً مبهجه يلتقطها بعض السياره من المحبطين".. وعارفه إن بيصعب عليكى تتباع برخص التراب لحد مايستاهلش.. بس نصيحتى خليكى على طبيعتك ومش لازم طول الوقت تبقى راسمه الابتسامه اللى فروم أيير تو أيير دى.. ناس هتفهمك وناس تانيه مش هتقدر ودى بقى مشكلتهم مش مشكلتك
وأما عن سؤال ياااه فينك من زمان فاللى عايز يطمن عليكى هيطمن مش هيستنى لما تشوفيه أو تكلميه عشان يسأل السؤال السخيف ده
دعواتك نشوف النور بقى.. الضلمه وحشه أوى
Anonymous said…
بصراحة يا مروة انتى كتاباتك روعة وعلى فكرة انا نادرا لما بتابع كتابات حد على النت وخصوصا اصحاب المدونات الاحياء منهم والاموات بس بصراحة المدونة بتعتك شدتنى خلتنى حريص انى اتابعها على طول ربنا معاكى وفى انتظار المزيد
النور ساكن جوانا احنا

بس المشكله ازاي نخليه يطلع

تحياتي
Marwa Friday said…
هبة المنصوري : أهلاااااااا..إيه الكلام ده يا بوبا؟..انتي اللي رقيقة وحلوة فبتشوفي الناس كده ! ..كلامك كله حكم والله ..شكرا ياهبة ..أسعدتيني بجد

مصطفى : منور ياعم مصطفى المدونة ..زيارتك طبعا هي اللي روعة ..أخجلتم تواضعنا يا أفندم ..وإن شاء الله أكون عند حسن ظنك وتشجيعك الجميل ..

•«ρяoιd»•™:
منور جدا يا برويد..أشكرك كثيرا للمرور ..وبعدين النور هيطلع بقوة الإيمان اللي بتبان فى أشد مواقف الحياة تعقيدا وصعوبة ..تحياتي

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي