عن الهبش نتحدث! ا

عن الهبش نتحدث! ا

المطالعة الرشيدة ..في أسرار الحياة السعيدة ..! ا

كنت قد استمتعت بالإستماع إلى المسلسل الإذاعي "أرجوك لا تفهمني بسرعة "..للكاتب محمود عوض والمخرج الراحل المبدع محمد علوان ..وكنت قد قرأت الرواية أيضا ..المسلسل بطولة عبد الحليم حافظ،نجلاء فتحي،عادل إمام ..كان محمود عوض يتنبأ بالإنفتاح وما بعد الإنفتاح ..وأزمة القيم ..ومن يملك أكثر يمتد تاريخ صلاحيته على شاشة الحياة ..أما المهمشون فلا عزاء لهم ..إما أن تكون على الشاشة وسط الكادر ..وإما تعمل كومبارس صامت إلى أن تجد الفرصة لتزيح "وحش الشاشة "-مجازا!- أو تحارب بقيمك ومعتقداتك وماتؤمن به..وتتحمل ما سيحدث لك !..المسلسل أخرج في عام "1973" ماقبل حرب أكتوبر وتوقفت إذاعته لظروف الحرب ...واخدين بالكم ..73..!..محمود عوض له كتابات حاليا في الحياة اللندنيه ..أكثرها يناقش بيع مصر..يقول محمود عوض في حوار لجريدة العربي :"الحكومة تشبه من يبيع تحويشة العمر ليدخن سجائر!"..لا يا أستاذ محمود ..ليدخن مواطنين !..لفتت نظري في المسلسل أغنية تجمع بين عبد الحليم حافظ وعادل إمام ..أحمد "عادل إمام "..يصر على ان المطالعة الرشيده لا تحمل من المفردات إلا "هبش يهبش ...ولطش يلطش! ..." ويبدو ان كلامها لا يصلح الا في 2007!..والماهيه ..."ماهيه وياسين " على وزن قصة الحب المصرية الشهيرة "بهية وياسين!"..صحيح ان سامي"عبد الحليم حافظ" يتخيل إننا يجب أن نكافح ونعمل حاجة ..- وكلامه موزون ومنطقي وفعلا لازم نعمل ...بس كيف وعنكبوت اليأس الغبي كاتم أنفاس جنين الأمل! ...إن شاء الله خير ..أنا متفائلة! ا

محمد -سفاح المنصورة -...هابش البواكي ! ا

سفاح ..سارق بواكي مصر ..نهاب ..اقتلوه أو اطرحوه أرضا !"..تخلصت مصر من محمد حرامي البواكي الذي اتبع مبدأ "هبش ..يهبش..لا حد حاسس" وقام بسرقة عدد كام باكو هندي معتبر ..الملئ بنشارة الخشب الزان -مفتري!- بواكي شاي ..شاي يا بشر ..يا غفر ..يا بقر !...تم تعذيبه بمنتهى السادية والوحشية .."شكل البواكي يا جماعة كانت ليبتون بدوباره ...فتله يعني!"يا الله يا ولي الصابرين والمصريين ..ارحمنا يارب ..فاجر.. أفاق.. مصاص دماء.. سارق أقوات يرفل في النعيم بينما أسر ألف ضحية لم تبرد نارهم بعد ..توفيق عبد الحي المليونير الهارب صاحب صفقة الفراخ الفاسدة ...يعيش في هنا بعد أن أخذ حكم البراءة ..ألوف من المغتالين والمحتالين يهربون بأرانب وبواكي ويستنزفون قوت الشعب ..ولا حد حاسس ولا حد باصص ..حسبي الله ونعم الوكيل ! ...الهم الله أمك يا محمد الصبر والسلوان ..

وعلى طريقة المحاور المتفزلك مفيد فوزي .."نحن نتسائل ..ننبش في الأعماق ..عن الحقيقة ..هل تعتقدوا أن محمد مجرم ..تفتكروا كام واحد دلوقتي الطاسه - الدماغ - بتاعته معووجه بسبب قلة الشاي في مصر ؟! ..وهل كانت وزارة الداخلية محقة عندما صعقت محمد من أجل ملايين الخرمانين ؟!".. ا

Comments


مش عارف اكتب اقول ايه
مصر بتنهار
بتضعف يوميا
بتنهار
اخلاقيات وسلوكيات
كل حاجه
تفتكري ممكن تقوم لها قومه تاني
صباحو هبش يا معلمة ! بداية الأغنية تجنن !انتي جايباها منين ؟ طبعا يا معلمة وزارة الداخلية محقة ! مش الشرطة في خدمة الشعب ! يسيبوا الشعب من غير شاي يعني ؟! أمال ياخد البريكفاست بتاعه ازاي الصبح ؟؟ ياكل الكورنفليكس و الجاتوه حاف كده ؟ من غير مايبلع !! طب و هو في الشغل و بيحل الكلمات المتقاطعة يظبط نافوخه بايه؟ المواطنين بدون شاي يتخبطوووون .. يتدهورووون .. و على نفسهم يناموووون .. و يشخروووون ..و على رأي عادل امام : لايمني عالفكة لايمني و هات نصيبي ما تحرمني يا معلم .. و لا عزاء لأي حد و لا لأي حاجة و هبش يهبش ... لطش يلطش ... اهئ .. اهئ
yas said…
الاغنيه دى فظيعه جيباها منين تفطس من الضحك هو مين اصلا الللى بيغنيها
انا اول مرة اسمع عن موضوع بواكى الشاى علشان شويه شاى يعملوا فيه كده
بس طبعا مفروض اي حد يسرق يتعاقب ويتسجن طبعا مش يتعذب يعنى بس هو اللى غلطان حد يسرق شاى
ان سرقت اسرق جمل
أحنا بلديات شراقوة زى بعض جميل البوست بتاعك جدا بس ربنا يبعد عنا المنصورية والداخلية والخارجية
ياااااااااه
يامروة فعلا بوست جامد جدا كالعادة يامروة
ويلا ادينا عايشين فى الهبش
فى بوست جديد فى مودنتى هايل
ياريت
تبجى تشوفيه
وكم فى مصر من الهباشين
الربان said…
تحياتي

أول مرة ادخل البلوج الجميل الخاص بك.


أسمحي لي ان اقول اننا جميعا مسؤولون عما يحدث.....اننا جميعا نقطع في جسد أمنا مصر.....يا ريت يراجع كل منا تصرفاته.... الشاب الروش الذي يقود سيارته بسرعة و برعونه...و يتجاوزك بغباء و استعلاء...اليس بلص؟

من يلقي بالقمامة في الشارع..اليس مثل اللص....

من يتحرش بالفتيات في المواصلات العامة
اليس بلص؟

من يتجاوزني في طابور الخبز,,,,اليس بلص يأخذ ما ليس له بحق....

يبدوا اننا جميعا قد تحولنا الي لصوص بطريقة او بأخري..... و جعلنا كلمة " شرف " محصورة فقط علي شرف البنت.


تحياتي و تقديري
Unknown said…
مساء عندليب :)
أشكرك على زيارة مدونتى و على مسلسل عبد الحليم ده سمعت عنه كتير لكن ما سمعتوش

بالنسبة لجمعة انا مش شايفاه حرامى الى حرموه من الاول من بواكى الشاى هما الى حرامية بيخدوا قوت غيرهم

كل حبى و تقديرى :)
عليوه said…
فى حديث بيقول ( انما اهلكت امم من قبلكم ان سرق فيهم الشريف تركوة واذا سرق الضعيف اقامو علية الحد فا واللهى لو فاطمة بنت محمد سرقت لقطعت يدها ) اسف جدا لو الحديث مش كامل وربنا ينجينا جميعا
السلام عليكم

صباح الورد والياسمين عليكى يامروة ياقمر

والله يابنتى الواحد ماهو عارف عشان بواكى شاى يعذبوه ويموتوه
امال بقي واحد زى ممدوح اسماعيل ده هيعملوله تكريم وتمثال للذكرى الهباب
ربنا يستر على اللى احنا فيه

وربنا يرحم اللى مات مظلوم
ويرحمنا احنا كمان
مروة
واضح إني هأفضل مكتئبة
لأني كل ما أدخل على مدونة حد فينا
ألاقي مصيبة تفكرني بالواقع اللي أنا هربانة منه إلى النت

لنا الله في هذه البلد
Anonymous said…
صباحك سكر يا مرمر
الاغنيه اكبر من اى وصف وبتعبر عن ازهى عصور الديموقراطية هههههههههههه !!! وموضوع التعذيب ده ما بقاش يخض زى الاول يعنى فاكرة زمان لما كنا نسمع عن مريض بالسرطان او الفيروس سى او الفشل الكلوى ؟ كنا نتخض اوى وشوية بشوية بقت حاجة عادية مرض عادى زى الانفلوانزا كده
اهى الاخبار المقززة بتاعة التعذيب دخلت التصنيف ده خلاص
اقولك ايه حاجة تحزن
ربنا يلطف بينا

هدى
micheal said…
هي ايه حكايه الشاي اليومين دول...أحييك يعلي الاغنيه
:)
تحياتي
Anonymous said…
الله

دانتو شعب غلباوي

يعني نسيب المجرمين مش عاجب

نخلصلكو عليهم بردو مش عاجب

نولع في نفسنا يعني

جننتو الحكومة يا ناس

سيبوهم يشوفو شغلهم بقى

انتو فاكرين موارهمش حاجة غيركو و لا ايه
Marwa Friday said…
محمود علي :مصر؟..مصر هي أمي وماتقولش بتنهار ..أكيد هي لها قومة تانية وعاشرة كمان ..أمال ياجدع عايشين في البلد ايه؟سد خانة ..مصر بتتقدم بينا حطها حلقه في ودانك ! ا

قلب الأسد:إزيك يامنار الواحد مابيشوفكيش؟..بس منورة يا معلمة ..صباحك عسل ..الشرطة في خربة الشعب ..بريكفاست إيه ..دا احنا أدمنا نشارة الخشب ..المهم الأغنية عجبتك ..بلاش تعيطي ..ماتعرفيش دموعك بتعمل ايه فيا يا آمال ! ا

ياسمين :يا حبيبتي ..يعني الواد ده يتعاقب واللي ناهبين البلد يطيروا ..انتي لو شفتي منظره تكرهي ..ولا بلاش ..حبي أحسن ..المغني عادل إمام وعبد الحليم حافظ ..ربنا يسترها معانا! ا

كلاكيت تاني وتاني :الله اسمك حلو بيفكرني بالسنيما!..أهلا يا بلديات ..ربنا يكفينا شر الداخلية نعم أوافقك الرأي ..لكن المنصورية مالهم..جيراننا وحبايبنا وماتعمليش فتنه محافظتية الله يكرمك! ا

مواطن زهقان :أهلا بالشراقوة..الله يكرمك ..ميرسي متشكرة شكرا!..طبعا مريت على المدونة وهايلة ..ربنا يوفقك

إحنا :وكم ذا عاشق يكابد في عشق مصر كثيرة العشاق والهباشين برضه! ا

الربان:صح يافندم ..صح ..صح! مضبوط كل كلامك ..لصوصية عن أخرى تفرق..لكن ..تفرق ليه؟ماكلها محصلة بعضها ..شرف البنت زي عود الكبريت ..وشرف مصر ..علبة سجاير!حسبي الله ونعم الوكيل..منورني يافندم ..وأشكرك على المرور

عاليا حليم : صباح العندليب يا سكر :)..منورة ..عندك حق المجرمون هم من دفعوه لهذا وجردوه من التربية والعيشة الكريمة ..بس تقولي لمين بقى! ا

عليوه:منور ..أنا كان على بالي الحديث ده فعلا ..على فكرة اسمها "والله "من غير ياء ورا عشان خاطر اللغة العربية !..ذكرك للحديث الشرف مناسب جدا ..هو احنا جابنا ورا غير ده ابن فلان وعلان ؟...تحياتي

عاشقة الوطن :وعليكم السلام ورحمة الله وبركاته ..رضوى الجميلة..إزيك ؟..عارفه أهو ده مندوح اسماعين ...مش بعيد يتعمل له مركب زي تيتانك وتمثال على روح الضحايا ..ربنا يرحم كل مظلوم ..منورة يا قمر ..

لو كنت أعلم :ليه بس يادكتورة ..الإكتئاب ده نعمة بجد صدقيني !..-مابنصحكيش تكتئبي - لكن إن بعد العسر يسرا ..سنة كونية من سنن الله ..لا تبديل ولا تحويل فيها ..خلي عندك أمل وجربي والله ماهتخسري بالعكس!..خلاص التدوينة القادمة خليها فرفشة ..مش كله نكد ..نكد ..! لنا الله

هدى :إزيك يا هدهد؟..مبرووووك النشر في الدستور !..الحمد لله ان الغنوة طلعت انفتاحية وعجبتك ..عندك حق كنا الأول نتخض ..فلان جاله كذا دلوقتي عادي ..عادي ..إحنا محتاجين حبوب النخوة ياهدى ..ماتعرفيش فين المحل اللي بيبيعها!..إن شاء الله خير والله خير ..تحياتي

مايكل :آه صحيح ايه حكاية الشاي؟..انت كنت كاتب عندك شاي بالياسمين صح؟!..شكرا لمرورك ولتعليقك

منة :إزيك يامنة الله ؟..كيف أخبارك يا قمر ..يااااه يا حبيبتي ..انتي انضميتي لكورال شباب النيل قوام بينا هيب هوب ..أنا عارفه يا أختي ..احنا شعب غاوي نكد كده على طول الشرطة تخدم الشعب مش عاجب - ازاي شرطتنا تبقى سمعتها بره مصر خدامة ..ناقص تشتغل في الخليج!-تحبس الشعب مش عاجب ..أنا رأيي الشرطة تنتحر ونعمل عيد شرطة غير بتاع 25 يناير ..نيولوك يعني!...نورتيني يامنة ..
Anonymous said…
قثقثق

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي