عشرون عاما من التخليل ...هييييه...!1


عشرون عاما- واحد وعشرون عاما!- من التخليل ...هييييه...!1

قبل البدء : هذا المقال- أو الخاطرة- نٌشر في الدستور ديسمبر 2006 ..كنت قد أتممت وقتها 20 عاما ..هو من المقالات العزيزة عليّ- رغم ان أسلوبه مش قد كده!-..رأيت أنه مناسبا ..لأني أتممت عامي الحادي والعشرون دون أن نخرج من برطمان المخلل إياه!..عيد أضحى سعيد عليكم ..ويارب تفرحوا ..ودعواتكم ربنا يوفقني في امتحاناتي ..صباح الورد :) ا

**********************************************************
ديسمبر ...يعنى شتا...يعنى شوارع مغسولة ..ووجوه لذيذة وبطاطاين تمشى على أرجل ..يعنى مافيش صرصار واحد بيصفر بروقان ..ولا نملة ولا فار ..ولا حكومة كمان 'بحكم البيات الشتوى طبعا ...ديسمبر يعنى مطرة فوق سطحنا و"كوباية صغيرة احطها على سور البلكون" وأحاول عبثا ان أملأها بقطرات المطر ..بعد ان اصاب بنزلة برد حاده بسبب مناعتى الضعيفة نوعا ما للبرد ..مش مشكلة طالما بحبها ..ديسمبر يعنى عيد ميلاد عم نجيب محفوظ 'كل سنة وانت طيب يا جدويا حبيبي''...ويعنى ماتفكرونيش بقى ماتفكرونيش ....عيد ميلادى والسنة دى بالذات عيد ميلادى جاى وأنا مكتئبة ..عشرون عاما من الحب و الغيظ والكآبة والتنطيط والضحك والشعبطة فوق سور البلكون .


..يااااه تاريخ ...ولدت بلا فخر فى نهاية الفترة الرئاسية الأولى للسيد الرئيس 'ماتسألونيش فى عهد مين بالضبط؟'..على نغمات اخترناك وبايعناك ..بكل عزة وإباء ..ياسلام ما تفكرونيش كيلو اللحمة كان اياميها بستة جنيه يا سلام لدرجة انى كنت برضع فته ..ولا بيبي اك وا كلام فارغ من ده ...حتى أمى اعزيزة أشادت بقدرات! ى الفائقة ..'ماكناش عارفين نأكللك ايه ...حتى الرضاعة الطبيعية كنتى رافضاها '-من يومى زاهدة فى الدنيا -..وأتارينى محرومة يا عينى من الحنان ومناعتى ضعيفة ياللا آدى نتيجة ان الواحد يتولد فى عهد الرئيس الزاهد !..استأنفت أمى الحديث 'أيامها كان فيه أزمة حتى فى اللبن الصناعى ..'يانهاره لبنى ليه بس يا ماما ..قالت لى امى بكلمات ذات مغزى 'أيامها انفجر المفاعل تشيرنوبل فى الاتحاد السوفييتى وكان اللبن مستورد ..وطبعا مشع ..يبقى فعلا لابديل عن الفته ...!


..الواحد كبر ودخل ابتدائى فى الفتره الثانيه لحكم السيد الرئيس ..وغليت اللحمة ..وبعدين دخلت اعدادى كان تقريبا فى نهاية الفترة الثالثة ..وفى نهاية المرحلة كان تقريبا انتخابات 2000 الشهيرةو الاستفتاء 'مش تبع الفته طبعا '..تفتح لا مؤاخذة وعيي القومي ..اكتبى عن 'أهم انجازات الرئيس واهمها ترعة السلام '...كنت ارفض وبشدة ..ازاى ؟..الترعة لا تعنى سوى بلهارسيا ..ورئيسنا يطالب دوما بسلام عادل وشامل يعنى سلام بلا بلهارسيا ...!خرجت نتيجة الاستفتاء 99.99%طبعا مش الريس يبقى لازم يبقى الأول على الجمهورية ..دخلت الثانوية الزفت .الفتره الرابعة ! 'ركزوا معايا 'كنت ناقمة على كل شئ أكتب شعر غريب جدا ..وقصص اغرب ..كنت مشغولة بمصطفى ومحمود بكري وحبسهم كنت مستغربة يتحبسوا عشان كلمة ...الكلام ده غالى قوى قوى ..ضحكت ايامها على مظاهرة الاستاد 'لازم نبقى زى القطيع يعنى نتظاهر بين أقواس ؟..خلصت الثانوية بفوق التسعين ولم ادخل إعلام عادى ..بدأت الجامعة والضرب شغاااال ...شغاااال الفقرا والمرضى والبلد فى حالة صعبة ..دخلت فى الفترة الخامسة لحكم الرئيس ..وعيد ميلادى ال19 فى ديسمبر 2005 الانتخابات انضربنا وانطردنا ..وما انتخبناش ..ياااااه كل سنة وأنا طيبة ..ها أنذا اتمطع وأبدأ فترة رئاسية جديدة خامسة ..الواحد فعلا خلل قوى يا جماعة !!1

Comments

السلام عليكم

ازيك يامروة
كلسنة وانتى طيبة ياجميل
كل سنة وانتى بألف خير
كل سنة وانتى طيبة مرتين
مرة عشان عيد ميلادك اللى فات وانا أتأخرت عليه كتييير
11/12
والمرة التانية عشان عيد الاضحى السعيد
كل سنة وانتى بألف خير
19/12

كل سنة وانتى دايما مروة حبيبتى
كل سنة وانتى بإبتسامتك الجميلة المشرقة المنورة وجهك

كل سنة وانتى أحلى من السنة اللى قبلها

عيد سعيد
yas said…
كلسنة وانتى طيبة يامروة وعيد سعيد عليكى يارب
بذرة امل said…
موضوع جميل يا مروة
امتى بقى الدراسة ترجع عشان اشوقك
بقولك كل سنة وانتى طيبة
يارب يعود عليكى الايام بخير
Unknown said…
هههههههه
حصوه ملح فى عين اللى ما يصلى على النبى
قصدى حطى عليكى شوية ملح كمان
ربنا يستر علينا من المخلل والاملاح امال جالنا الضغط من ايه
السلام عليكم

كل سنه وانتى طيبه

وعيد سعيد يارب
Anonymous said…
لسه مقرأتش المقال بس حبيت أقول
كل سنة وانتى طيبة وعيد سعيد بإذن الله
ولى عودة للقرأة والتعليق
مروه
كل سنه وانتى طيبه
ويارب السنه الجايه تكونى حققتى كل اللى بتحلمي بيه
ويكون حصل جديد فى الدنيا من حوالينا
امييين يااااااارب
تحياتى وحبى
فاصـل إعلاني :
زورونـا تجدون ما يسركم، وبأقل الأسعار، قائمة كبيرة من الكتب ، للعديد من دور النشر تحت سقف واحد، وبأسعار لا تقبل المتافسـة )

كل عيد وأنتم كويسين
خلل !!! ده انت لسه مطلعتيش من البيضه
Anonymous said…
كل سنة وانتي طيبة
يعني ماكلنا عدينا سن الرشد محدش عمل العمايل دى لية
يلا
تعيشي وتفتكري
كل سنه وانت طيبه يا مرمر

ودمتى للتعليم المصرى
Marwa Friday said…
عاشقة الوطن : وعليكم السلام ورحمة الله وبركاته ..إزيك يا رودي ..كل سنة وانتِ طيبة وبصحة وسعادة ..ولا اتأخرتِ ولا حاجة ..ديسمبر ده واخده له توكيل أعياد:)).. الله يكرمك ..أخجلتي توضعي ..- كويس كنت فاكراها ابتسامة مصاص الدماء ههههه!- وانتِ كمان كل سنة وكلية التجارة كلها بخير والقافلة بتعمل حاجات تسمع في بر مصر كله ..عيد سعيد

**************
ياسمين : وانتِ طيبة يا ياسمين ..عيد سعيد عليكِ ويارب تعدي امتحاناتك على خير ان شاء الله نجن واياكِ
**************

بذرة أمل : وحشتني ضحكتك وكلامك وياللا يا مروة ..ياللا يا مروة!..امتى اشوفك ..ربنا يقرب البعيد ..وانتِ طيبة وربنا يسعدك

لماضة : أهلا بتوكيل الفتة العربية !..هو عشان بقى حضرتك داكتورة هتحللي ان الضغط جاي من المخلل؟..طيب بالذمة هو اكل المحشي ينفع من غير مخلل!..لا المخلل اللي بكلمك عليه ده مخلل بني آدمين ..سمعتِ عنه؟.. تخيلي كده وزير بالعصفر ههه يع!ا ..كل سنة وانتِ طيبة يا لماضة وبتتلامضي كمان وكمان

حسام يحيى : وعليكم السلام ورحمة الله وبركاته ..وانت طيب ..وعيد سعيد عليك ..

الدكتور : متشكرة على الزيارة ..طبعا منور ..كل سنة وانت طيب

رحيل : وانتِ طيبة يا سارة ..ويارب السنة الجاية يكون جديد حصل وتحققي أمانيكِ وكل حاجة حلوة بتحبيها ..تحياتي يا قمر

عمر بوك ستورز : وانت طيب وعيد سعيد ..بس انا حضرتك في الزقازيق ..افتحوا فرع عندنا وانا آجي كل يوم اتفرج على الكتب طبعا..! ربنا يوفقكم

محمد عبد الغفار: صباح الفل يا أستاذ ..ليه بقى مالها البيضة ..؟..اتكسرت من زمان ..آه مخلل ونص!..كفاية انك عاصرت عهد تاني ..اللهم لا حسد ولا حقد يا عم محمد!..تحياتي

مصطفى السيد سمير : أهلا بالشاعر ..وانت بالصحة والسلامة ..آه انت بيتهيألك ان دي عمايل ..ده ولا حاجة ! ..منور ..فين أشعارك الجديدة؟

إحنا : كل سنة وانت طيب يا أحمد ..دمت لدمياط والتعليم الأنجلو ساكسوني!..ما تسألنيش تبع انهي محافظة حضرتك!ا

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي