تاج ..إكسير التفاؤل

إكسير التفاؤل
****************


وصلني هذا التاج من الجميلة لماضة ..اكسير تفاؤل ..كان كسلا مني في الرد عليه ..أما لتاج بذرة أمل وعاليا حليم فالأول وجدته مكررا في معظم المدونات - معلش يا بذرة :)- والثاني لسبب قاسي جدا هو أني كلما فتحت مدونتك يا عاليا ..أغلقت من تلقاء نفسها! ..ولأن تاجك رمضاني ..فمعذرة يا لولو ..حقك عليّ..:)

*****


إكسير تفاؤل

أحس بإكسير التفاؤل عندما أفتح التلفزيون المصري وأجد مظاهرة ضد ارتفاع الأسعار والظلم الفاحش ..يا سلام التفاؤل بيصل الى ذروته ..ويا سلام لو تامر أمين اللي بيغطي التظاهرة ..هفرح جدا ..ده تفاؤل يا بنت الحلال ..أيوه تفاؤل!ا


اكسير تفاؤل

عندما أمشي صباحا في الزقازيق ..أمام باعة الفاكهة وبائعة الفول النابت ..وهم يفرشون بضائعهم ..وصوت الشيخ محمود علي البنا ينبعث من أحد الأركان ..:)أو محمد رفعت ... وعندما القي التحية على سماح..فتردها "صباح العسل" !ا


اكسير تفاؤل :

عندما أمشي في الشارع وأجد أحد العاجزين عن حمل بعض الأشياء ..فيتطوع شاب ابن بلد أصيل ويحمل الحمل الثقيل ..ويا سلام عندما أجد مجموعة يتنافسون على فعل ذلك "حدث بالفعل!ا

اكسير تفاؤل :
عندما أسمع ان شخص جدع ما في مكان ما ..أحب بنوتة جميلة ورقيقة - وجدعة برضه- في مكان ما! ..وجمع الله شملهم وعاشوا في تبات ونبات .."أحس اني متفائلة جدا جدا ..رغم انه من الطبيعي ان يحدث ذلك- أيون طبيعي!- ..لكن من كثرة ما رأيت وسمعت" وحزنت" عن حكايات حب انهارت بسبب توافه .." أصل الكنبة على العريس ورجل الكنبة على العروسة!"..ماديات..ظروف.. نصيب ..أو ما الى ذلك صرت اشعر بأن هذا الحدث اكسكلوسيف- إن القصة تتوج بالعش الجميل!- .." جعلنا الله وإياكم من أصحاب الإكسكلوسيف!"ا


اكسير تفاؤل :
عندما قلت لأم محمد- ست طيبة جدا- " بلاش هم وغم ياولية- أيوة وليه !- ..إيه ده وكمان لابسة الدبلة "دبلة فضة" في ايدك اليمين..انت لسه مخطوبة!..فتضحك وتقول "ماحدش بيضحكني إلا أنتِ"..فأحس بالتفاؤل ..ياااه جايالك يا سيرك يا قومي!ا
اكسير تفاؤل
عندما يقول لي أخي الأصغر .."مروة أنا بحب مصر قوي ..ولو بقيت في يوم من الأيام ريس هدلع الشعب ..مش هجوعه!"- على فكرة ده جزء من حوار طويل مع ميزو!ا- انتظروه ان شاء الله!ا


اكسير تفاؤل :

عندما أنظر لصورتي في الإبتدائية ..بريئة جدا!ا
وتلك السنة المكسورة التي كنت كثيرا ما احب أن ابتسم بها .."أنا عندي سنة مكسورة مش عند حد!" ا
اكسير تفاؤل :

دعوة من رجل كبير أو امرأة لا أعرفها ولا تعرفني في الصباح الباكر "ربنا يصلح حالك يا بنتي ويوقف لك ولاد الحلال"
اكسير تفاؤل
عندما أرى ابتسامة من أمي ..أوأبي ..بس ماما أكتر طبعا :)- ربنا يريحهم مني!- ..وعندما اسمعها "أقفشها" تقول لأحدى زميلاتها في الهاتف "صباح الفل!"ا
اكسير تفاؤل :

عندما اجد جدتي لوزة مبتسمة وفرحانة..وعندما أجد جدي مبتسما ..أو عندما ارى أحدا مبتسما ..ياقوة الله بتبقى حاجة نادرة كده !ا

اكسير تفاؤل :

عندما أجد شباب وبنات عندهم استعداد يعملوا حاجة تنفع البلد بجد..وعندما أشعر بخطأي في موقف ما وأحاول تعديله "مازالت المحاولات قيد التنفيذ!"ا

هذا هو القط السيامي المتشرد..قرديحي!ا


اكسير تفاؤل :

عندما أسمع دعاء الكروان.. وصوت عبد الحليم في الشارع يغني " أبدا بلدنا للنهار..بتحب موال النهار" وموسيقى عمار الشريعي ..وعندما يزورنا القط السيامي المتشرد "جميل قرديحي" ويتعلق بنا - تدعوه أمي ميشو!- لكن هو قرديحي وعسول - " ولقرديحي قصة "!ا


اكسير تفاؤل :

عندما ينشر لي موضوع ..ويا سلام لو أخطائي النحوية كانت قليلة او منعدمة ..ويا سلام لو كان عنوان المقالة نفس العنوان الذي وضعته " بكون متفائلة وفرحانة !" ويا سلام كمان لو أي أستاذ ..أو قارئ عادي قال لي ان موضوعك حلو ..- دون مبالغات - أو نقدني ..أحس بالتفاؤل أيضا!ا


اكسير تفاؤل :

عندما ينتصر الحق في بلدنا ..ومع الأسف قلما ما يحدث ذلك..المهم ان يحدث ذلك !ا


عامة أنا متفائلة.. وأشياء كثيرة تجعلني متفائلة - رغم اني خنيقة !- ..حتى لو حاربني التشاؤم واليأس ..أحاول أكون متفائلة ..أحاول ..ربنا يسهل :))

Comments

Unknown said…
يا صباح الورد والفل والياسمين
والله يابنتى انا جالى تفاؤل على ريحة الورد اللى شمتهم من عندك دول
واكتر ما عجبنى ميزو مش هجوعه ضحكتنى من قلبى
وكمان القط من سيربح المليون
قصدى قرديحى
صراحه كلام جميل يا مروه
ربنا يسعد ايامك يارب زى ما اسعدتينى باجابتك للتاج
مرسى يامروة على زيارتك ليا
مدونتك جميلة
وبإذن الله هنبقى أصحاب
أتمنى تحطى اللينك بتاعى عندك فى مدونات صديقة
بذرة امل said…
تحفة تحفة تحفة
اهى دى الحاجات اللى تكتب ايام الامتحانات

______

قوليلى يا مروة مالك ومال السنة المكسورة ؟
وتلك السنة المكسورة التي كنت كثيرا ما احب أن ابتسم بها .."أنا عندي سنة مكسورة مش عند حد
_________

اقولك على حاجة
انا اول يوم شوفتك فيه فى الكلية فاكرة لما عرفتك من جرنان الدستور
تفائلت جدا وقولتلك
هو فى حد عندنا هنا فى الكلية بيقرا جرايد قولتيلى انك كمان بتكتبى فيه
يوميها تفائلت
ها وانتى تفائلتى ؟ اكيد لا ا نا عارفة انا عارفة قولتى مين المتطفلة دى!"
only spot said…
لو فقدنا القدره على التفاؤل يبقى فقدنا معنى حياتنا ولو انطفات الشمس التى بداخلنا فقدنا احسساسنا بانسانيتنا
ادام اللع عليكى نعمة التفاؤل وتحياتى لكى
Anonymous said…
ياصباح الأوبتيميزم:)
شفتى بقى مزيكة رأفت الهجان المصاحبه للمشاهد الرومانسيه مؤثره قد ايه؟

ربنا يسعدك يابنتى كمان وكمان..ملحوظه:قرديحى اسم على مسمى..ده شكله طيب وغلبان أوى..تحطى ف ايده جنيه ونص يروح يجيبله ميكس فراوله..ههههه
yas said…
ازيك يامروة
احلى حاجة فيك التفاؤل حتى صوتك متفائل بحبه
المهم هو ايه حكاية صباح الفل دى
سلام
مروه بجد بحب تفاؤلك جدا قوى
بحس بيه لما باجى هنا
ربنا يديم التفاؤل عليكى يارب
تحياتى وحبى

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي