21...رشيدة!ا


21

Happy birthday to me !

رشيدة تحدثكم!ا



21 ..واحد وعشرين يا قوم!ا
ياااه يا دنيا ..يا خبر أبيض ..21 سنة ..هل ذلك يعني أني أصبحت رشيدة! ..وطبعا لم أختر هذا اليوم بالذات حتى اصبح فيه رشيدة وعيد الأضحى على الأبواب!

عمري ما تصورت أني سأصل الى هذه السن ..كم هي سخيفة فكرة ان افكر ان عندي أجندة محدودة الأيام ..لا أعرف عدد أوراقها .. ولا حتى عندي الفرصة لأن أقيسها بالشبر حتى أعرف الكم المتبقي لي ..أنا لست طماعة ..كنت أتمنى أن تكون مزودة بخاصية "لقد أوشك رصيدكم على النفاذ!"..لكن ولا هذا ولا ذاك ..كل المتاح ..أن أسحب الأوراق البيضاء ..وأرسم فيها البدع ..أو أحرقها ..وعندما تمضي ليس لي الحق في أن اعمل لها "ريسايكل!"..ظريفة والله ..لطيفة جدا !..ا

عندما كنت صغيرة ..كنت لا أعرف لي تاريخ ميلاد .."اتولدتي يوم ايه ؟..ما اعرفش!"...إلى أن وقعت في يدي شهادة ميلادي " 11 ديسمبر"..ياااه في عز البرد - على رأي منار عوني حد يتولد في الشتا!- برج القوس كمان!..معلش بقى!..وبدأت في ممارسة عادتي الغريبة وهي اني بحثت في الأجنده عن الحدث الذي وقع في مثل هذا اليوم .."ميلاد الأديب العالمي نجيب محفوظ!" الله أكبر شكله حاجة عظيمة "وشي حلو عليه اتولد يوم ميلادي!"..- لم أكن أعرف نجيب محفوظ وقتها من هشام عباس!- كان آخري ميكي ومجلات "بم بم" وقصص عبد الحميد جودة السحار للأطفال ..لكن نجيب محفوظ ظل في خيالي...أيام يا دنيا ..عملت ايه طول 21 سنة؟ أبدا ..ولا حاجة !..أعتقد اني في بالي أعمل حاجة حلوة ..لكن حاسة ان العمر بيجري ..رهوان ..اليوم بيموت ..وعمري بينقص ..أوك ..نفسي الناس تفتكرني وتقول الله يرحمها ..بس أعمل حاجة نافعه !


السنة المنقضية أثرتني كثيرا ..وأثرت فيّ كثيرا ..عرفت فيها ناس حلوين ..وكتابتي نوعا ما تغيرت ..وربما أجمل ما حدث لي على الإطلاق بص وطل

Comments

yas said…
ازيك يامروة
كل سنة وانتى بالف خير وصحة
معلش انا عرفت متأخر يوم عيد ميلادك
بس على فكرة انا كنت عارفه انه فى شهر 12 بس اليوم مكنتش فكراه وكنت كل يوم ادخل على المدونة واشوف لو السن اتغير عندك هعرف منه وكده
المهم حصل خير بس انا كلمتك بس تقريبا انت انسانه صباحية كده حد ينام دلوقتى حرام عليك
اويمكن علشان انا ليلية اوى
المهم ربنا معاكى فى الامتحانات
yas said…
سورى يامروة انا كتبت التعليق ده قبل مااكلمك وعرفت خلاص انك كنتى صاحية
سلام
Gid-Do - جدو said…
مروة

حتشعرى بسعادة اكتر لما يبقى عندك 61 سنة مش حتصدقى نفسك وحتقولى ياة امتى كل دة حصل ـ حصل لى دة لما وصلت الستين وكلها شهرين باذن الله واكمل اتنين وستين ولسة مش مصدق

عيد ميلاد سعيد وعبقال الواحد وستين باذن الله فى صحة وسعادة وتحققى كل امنياتك واحلامك وتعدى بعد كدة لغاية المية برضة فى صحة وسعادة وراحة بال
Unknown said…
ههههههههههه
ده انتى شردتى الناس يابنتى معاكى
ربنا ي يديم عليكى السعاده وحب الناس يا مرمر يارب
وكل سنه وانتى بالف صحه
كل عام وانت بخير واللى الله اقرب

عمر مديد سعيد بإذن الله

وربنا يسعدك انت وشلتك وميحرمكم من بعض
بذرة امل said…
كل سنة وانتى دائما ناجحة يامروة
بقى كدة يابنتى عيد ميلادك النهاردة وما تقوليش

استنى منى تليفون
وكل 21سنة وانتى طيبة
ياصباح الفل وأعياد الميلاد الحادية والعشرين.. أشكرك بشدة وبعنف وبقسوة وبسادية على كل هذا الكلام الرقيق الجميل حول أنفسنا أفظنم.. اخجلتم البتاع ده اللي اسمه تواضع وخلتيني أشعر مع كلمة أستاذ دي بأن قسم كيمياءوفيزياء بكلية التربية جامعة المنصورة فرع متخفي لاكسفورد وأوكلاهوها يونيفيرستي!
تسلمي بجد.. كل سنة وأنت رشيدة كل سنة وأنت متعجلة وأنت مروة وجمعة!
صباح الفل المتعق بقاله 21 سنة وحتة
ازيك يا ميرو _مروه يعنى_وكل سنه وانتى طيبه وشكرا على كلامك الجميل ومش عارف ايه حكاية اللؤم على الورق اللى ماسكانى دى مع انى حاسس والله اعلم انى اطيب واحد فى الشرق الاوسط
لكن بجد انا معتز جدا بمعرفتك يا بلدياتى واحترم رأيك وربنا يقدرنى وارد جزء من جمايلك
rainbow said…
الجميلة
الرقيقة
الصديقة مرمر

كل عام وانت اسعد
ومحققة اغلب ان لم يكن كل ما تتمنى

كل عام وانت اكثر اشراقا وحبا فائضا توزعينه علينا ولا نشبع ابدا

كل عام وانت انسانة كاتبة محترفة ان شاء الله

مروة كلماتى صغيرة وقزمة عندما اريد التعبير عن حب احدهم فسامحى صغرها وتقبلى دعائى وامنياتى لك دوما بكل صحة وسعادة

وجود اسم العبدة لله ضمن من احببتيهم وكتبتيهم اصدقاء هذا العام اسعدنى ايما سعادة
اشكرك على كل حرف وكل شعور اضفتيه لشخصى الضئيل

حبى الخالص ومودتى الصافية

هدى عبد القادر
Anonymous said…
مروة

كل سنة وانتى ناجحه وفرحانه وململمه الناس حواليكى من كل أنحاء الجمهوريه
وبتقولى ماعملتش حاجه حلوه
أومال الناس دى كلها بتحبك ليه؟

سعيده بمعرفتك.. وإذا كنت طلعت طويله وهبله فسيادتك سابقه سنك واللى يشوفك مايقولش إنك صاحبة الدماغ العاليه بالأوى اللى بتزين الدستور وبص وطل بمقالاتها.. يلا واحد واحد

ولازلت بأتوقع نهاية مؤسفة للرومانسيه المفرطه اللى احنا بنعانى منها.. هادياكى غنوة حنان ماضى "أيام الدنيا"..هتلاقيها على صفحة الفيس بوك..أغنيه أنتيرومانتيك..بالشفا
حلوة رشيدة دي! أمال فين بكار؟! فكرة البوست رائعة في يوم ميلادك! عيد ميلاد سعيد يا قوس الأقواس ..أنا رومانسية برضه بس رومانسيتي وقعت عالأرض فبقت واقعية!!.. شكرا على رأيك فيا و حبك ليا يا مارو
ملحوظة: لوبياإيه بس بلاش فضايح!
salateenoo said…
مبروك الإنتقال الى هذه المرحلة المهمة من الحياة :)
سندباد said…
كل سنة وانتي طيبة وعام سعيد جدا وربنا ما يحرمنا منك ياستي ماشي
تحياتي
عارفة يا مروة، رغم إني يمكن تاني مرة بس أدخل مدونتك، إلا إنك ف البوست ده تحجديدًا قلبتي عليا المواجع !! ، ده كله و 21 سنة ، أمال بقى لما تتجاوزي الربع قرن تعملي إيه ؟؟؟ ، وبعدين معندجيش كمية الكلام عن أصحابي كده !!، بس الإحساس بالزمن مزعج ! تعرفي أنا بهرب من يوم يملادي



تحياتي ، وسلامي لكل الناس الحلوين اللي جبتي سيرتهم دول

كونو بخيـر
Marwa Friday said…
ياسمين : وانت بألف هنا وسعادة يا أميرة يا بنت الأمراء:))..ولا متأخر ولا حاجة ..أنا واخدة توكيل ديسمبر ..يعني في اي يوم قول لي لي كل سنة وانتِ طيبة!..أنا والله صباحية ..بس بحب الليل ..حاجة كده تدعوكِ للتأمل والسرحان في الملكوت "بعيدا عن عد النجوم طبعا!"..وربنا معاكي في امتحاناتك ..:)) ..وسوري ليه ..انت تنطي في اي وقت ..سلامي لكفر الشيخ والمنصورة ..وعيد سعيد يا قمر
______________________

جدو : ياااه يا جدو..أشكرك على الزيارة الغالية ..كل سنة وحضرتك طيب وعيد سعيد بصحة وسعادة وهناء ..وكل حاجة تحبها في الدنيا وفي الآخرة كمان ..يمكن أشعر بسعادة حقيقية لو وصلت ل61 سنة .. بس لو عملت فعلا اللي يجعل لحياتي قيمة ومعنى "مش مجرد واحدة عمالة تشد في أكسجين وتطلع ثاني أكسيد الكربون!".بس مش متخيلة حكاية ستو مروة وتيتة مروة!- هغير اسمي إلى خضرا عشان يتوافق مع المرحلة:))- ..فعلا ممكن احس بأن كل ده كان ليه وحصل امتى؟..ربنا يريح بالك وكل سنة وحضرتك طيب ..وتفرح بياسمينة وشريف ..:)) نورتني
_____________________________

لماضة : كل سنة وانتِ وأهل البحيرة طيبين وبخير ..آمين يا لماضة ..ربنا يبارك فيكِ..شكرا يا جميلة ..منوراني انتِ بالصورة الكميلة دي..استعدي بقى لحقن الفتة:)) ههههه!ا
________________________
محمد عبد الغفار: ربنا يبارك فيك يا عم محمد ..كل سنة وحضرتك طيب وأهل الشرقية المغتربين براها بخير:))..ربنا يسمع منك ..وربنا مايحرمك من اللي بتحبهم
___________________
بذرة أمل : يا سلام يا نسمة حياتي ..أخبار ابو العتاهية ايه؟ وانتِ طيبة وعيد سعيد عليكِ..بس بالذمة عايزاني امشي اقول انا عيد ميلادي النهااااردة أم الفصاد تحييكم !..متشكرة على الاتصال..ربنا يحقق أملك ويريح بالك بحق لا إله إلا الله ..يا بذرة يا بنت حواء وآدم :)) آمين يارب
Marwa Friday said…
محمد هشام عبيه :يا صباح الفل والأعياد السعيدة - عاش مين شافك!- العفو العفو بشدة أفنظم- ما بحبش الكلمة دي!-..كل سنة وأنت طيب وبصحة وسعادة والسنة القادمة تحج او تعمل عمرة ان شاء الله :)) ..آه هو أنا أقدر أتكلم على كلية التربية قسم الطبيعة والكيمياء .."طبعا لأنه قسم وكلية والدي من أكتر من 30 سنة! ..جامعة الزقازيق فرع متخفي لجامعة بريستول! "..طيب بالذمة كده فين أوكلاهوها ؟! أنا عملت بحث عليها في الوكيبديا وجوجل ..مافيش غير موقع الياهو اللي جاب لي نتيجة واحدة ..أعتقد انها في أمريكا..يا إما اسم حيوان منقرض!!..ربنا يبارك فيك ويسعدك يا محمد ويريح بالك ..وعيد سعيد وسنة جميلة ..صباح الفل المعتق بقاله من أيام قدماء المصريين!ا

__________________________
صالح سعيد :إزيك يا صالح..وإزي أبوحماد - والناس الحلوين؟..وانت بالصحة والسلامة والسعادة وكل حاجة جميلة ..يا ستار على غرورك يا أخي ..أطيب واحد في الشرق الأوسط ..عايز تفهمني إن بوش عرف كده وسايبك في حالك ..ولا انت عميل مزدوج!..لا بجد انت طيب !..ربنا يبارك فيك..أنهي جمايل يا بلدياتي؟..انت محسسني اني أنقذت بلد من الفيضان او عملت عمل عظيم ..يا شيخ روح كده بدل ما أزعل بجد ..ماكانتش حتة مدونة!..عيد سعيد :))..أخوك طبعا!ا
_____________________

قوس قزح : هدى ..هدهد ..الواحد يلاقيكي ازاي ولاّ فين؟..مدونتك يظهر عليها ملف ريال ميديا بلاير فبتقفل عندي وما بعرفش ازورك:( .. وانتِ طيبة وبالصحة والسلامة ..الله بجد كلامك الرقيق من أجمل ما وصلني ..ياخبر ابيض كل ده وكلام قزم ..أمال لو عملاق هيبقى ازاي؟..كل سنة وانتِ أحلى من اللي قبلها واللي قبل قبلها ..وعيد سعيد يا جميلة
_____________________

هبة النصوري : هبة..كل سنة وانتِ حلوة وجميلة وطويلة مش هبلة زي ما انت وأحلى ورومانسية - مش هنروح في داهية ..آخرتها ايه يعني؟..ممكن تعملي احصائية لنجوم السما بس كده! - عجبتني قصيدتك عن النجوم في مدونتك واللي واضح منها انك فعلا رومانتيك !- خليكِ رومانسية وطرزي فيها شوية واقعية:)) ..الله يبارك لك ..هي فعلا حاجة حلوة حب الناس ده كنز من عند ربنا لا يقدر بثمن ..يارب أشوفك تاني ..ليه بقى اللي يشوفني ما يتخيلش ..دول بقوا واحد وعشرين!..ربنا يحقق أمانتكِ وعيد سعيد..الله حنان ماضي ..بحبها رقيقة زيك كده :)ا

__________________________

قلب الأسد: وأنتِ بالصحة والسلامة يا أسد الأسود!..ربنا يخليكِ يا رورو ومايحرمكيش مني أبدا ومن رخامتي ههههه !..بتقولي شكرا على الحب ..أهو ده اللي ماينفعش عليه شكر - أهو ده اللي مش ممكن أبدا!-
ملحوظة: اسكتِ مش بعديها أكلت لوبيا برضه!ا
_________________________
سلاطينو:أنا شفت اسمك فين..فين....فين؟..مدونة وسط الدايرة القديمة خالص دي!..كل سنة وانت طيب يا سلطان .. ماشاء الله ابنك زي العسل ربنا يبارك فيه ..- انت شايف انها مرحلة مهمة؟..منور ويارب نشوفك على طول
________________________

سندباد: وانت طيب وربنا ما يحرمني منكم كلكم ..عيد سعيد ..ماشي!ا..منور فينك من زمان؟
_______________________
إبراهيم ...معايا: وانت طيب وعيد سعيد ..لا لازم تبقى متفائل ..ماله الربع قرن هههههه عادي احنا قدها وقدود طز في المواجع والإكتئاب وكل حاجة وحشة!..كل سنة وانت طيب وسلامي لك وسعيدة بالزيارة الثانية :))ا
مدونة جميلة وموسيقى عمار الشريعى بتاعة رافت الهجان تحفة
احنا فى انتظار جديدك .. متابع

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي