جفت وبانت قراميطها ! ا

جفت وبانت قراميطها ! ا ا


خلاص .."البركة جفت ..وبانت قراميطها"..قالتها أمي اليوم لأخي الأصغر..بلهجة ساخرة ،كانت تقولها في فترات الشدة ..لم تلفت نظري ولم تعصر قلبي كاليوم ..انتشرت في دمي كالحريق .."كيف تعيش القراميط بعد جفاف نبع الحياة؟!.".لا أدري -أو أدري وأتجاهل الأمر عمدا-ماذا تقصد أمي في هذه المرحلة بالذات؟..ترى هل أقول أن هذا المثل الشعبي الذي طالما سمعته ..نجح هذه المرة في إختراق قلبي كسهم مسموم .."خلاص ما فيش فايده!" ..ألا تعرفوا إلى ماذا وصلنا يا قوم!..انتبهت لمرحلة اليأس التي وصلت إليها أمي ..والمحيطون أيضا ،يأس؟!..أم واقعية؟!..أم خلطة من اليأس والواقعية ؟..أدرك أن أمي قد تكون محقة في رشق مثل هذا المثل الشعبي البليغ في قلوبنا..أعرف أنها تقصد كل حرف فيه دون مبالغات ..أمي لا تحترف فن المبالغة ..وأنا أتفائل مهما كانت الأسباب ..لا أدري هل تفاؤلي مصيبة كما يعتقد معارفي- .."مشكلتك إنك عندك أمل".."أو بتجيبي الأمل منين؟!"- بعيد عنكم ..ميراث!-..أعتقد ان سيناريو حياتي ..والسيناريوهات الأخرى المفتوحة أمامي والقريبة من قلبي تؤكد إن مهما طالت الشدة لن يتبعها سوى أمل محقق ..أنا نفسي قابلتني عثرات لم أكن أتوقع الخروج منها حتى لو عن طريق ونش!..لكن شعاع الأمل كان يهمس في آذان الروح ..إن بعد العسر يسرا ..أتذكر دائما يوسف الصديق عليه الصلاة والسلام ..عندما أسمع هذه السورة أحس بأمل رهيب فعلا ..-خاصة إذا كان القارئ عبد الباسط عبد الصمد -الظلم والسجن ثم تحقق العدالة - حدث ذلك في مصر المحروسة بالمناسبة!-يسألني خالي ساخرا "لكن مش شايفه ان الحكاية طولت ؟!..انتي اتولدت في هذا العهد وربما تموتين فيه دون أن يتغير شئ! "..مهما طال الليل يأتي النهار الجديد والشمس ذات الضحكة الصافية،.بس.يعني يا جماعة الشمس من الممكن أن تكون معذورة .-.يمكن مزنوقة في أوتوبيس ا" 35 بشرطة"الخنيق ..أو 355 المتبلد..أو السيرفيس المتجه من الصاغة للجامعة ..! -الخوف ..كل الخوف أن تكون الشمس مفلسه ..لا تمتلك أجرة الوصول لبلدها - التي هي بلادنا- ويحتجزها كمساري غبي.."الأجرة عشان تنزلي "رغم أن هناك من وصلوا للوطن من ذئاب وقطع من الليل الكحلي ...دون مليم !" أما السائق- من نقابة الكارو -ليزم!-.. مدمن لعجلة القيادة "الدريكسيون لا مؤاخذة!"ولا يفقه في القيادة شيئا سوى العبث بعجلة القيادة يمينا ويسارا .."يدوس بنزين ويدوس على الدنيا ..لا يفهم في لغة الفرامل أبدا ..كأن الدنيا لن تفعلها معه..-كسائق حريف مطبات !-وتصده بأحد حوائطها الرخامية
البارده!....دششششششششششششششش..طرااخ ..إيه ده يا جماعة ..كتابة سيريالية ! ا
**********
كل عام وأنتم طيبين ..رمضان كريم لمصر كلها ..هاتوا الفوانيس ياولاد هاتوا الفوانيس ..هنزف عريس ياولاد ..هنزف عريس ..هيكون فرحة تلاتين ليلة ..هنغني ونعمل هليله ..هيه ..هييييه ..رحمك الله يامحمد يا فوزي ..




Comments

Gid-Do - جدو said…
الابنة العزيزة مروة
اول مرة اسمع المثل دة ـ بس كلة حكمة ـ خاصة ان سمك القراميط او بالانجليزى الكات فش ـ سمك القط ـ لان شكل وش القرموط زى القطة فى الشبه ـ هذا السمك بيعيش فى قاع النهر للتغذية وبيعيش مدة طويلة بدون ماء وباقى سمك النهر بيموت من الجفاف ـ ومعنى المثل ان الجفاف فى الترعة او البركة اصبح شديد ولم يبقى الا اخر حاجة ممكن تعيش وهى القراميط ـ حكمة مصرية غاية فى الروعة اشكر والدتك على المثل ـ

سبقتينى فى ذكر قصة سيدنا يوسف الصديق فى السجن ـ وهذا احسن مثل ـ خليكى على التفائل لانه هو بنزين الحياة بدون التفائل تموت الحياة ـ بوست جميل تشكرى علية ـ ودائما مع العسر يسر ودة تاكيد من المولى عز وجل ـ تحياتى
الأخت الغاليه مروة
جميل أنا يكون الإنسان متفائل فهي من سمات العقول المستنيرة وعلي فكرة المشكله في المعايير اللي حولياناوالباليه التي تهدم كل جميل وكل فكر ولن أقول لكي أقل من كلمه الدكتور عبد الوهاب المسيري
"الإنسان المثقف دائماً متفائل"
لكي مني كل التوفيق والتقدم
Anonymous said…
كنت لسه باقرا ف كتاب للأمثال العاميه..وعجبنى مثل باطبقه بقالى فتره..بيقولك "الأيام الزفت فايدتها النوم"
وحلو برضه المثل اللى قالته طنط بعد مافاض بيها.. أنا شايفاها واقعيه مش تشاؤم.. ربنا يعينها ويصبرنا جميعاً
كل سنة وأنت طيبة ياجميل

أنا أول مرة أسمع المثل ده
بس عاجبني قوي

اسمحيلي استخدمه

والبوست جااااامد
Marwa Friday said…
جدو :صباح الورد يا جدو العزيز ..بتسعدني زياراتك جدا ..جدا ..أشكرك على معلومة الكات فيش - وأشكرك على تحليلك الرائع للمثل الشعبي ..سأحاول ياجدو أن أحافظ على بقايا تفاؤلي في هذه الدنيا ..تحياتي وكل سنه وحضرتك بألف صحة وخير ..سلامي إلى ياسمينة الجميلة وشريف ..بارك الله فيهم :)


إرهاصاتي الفكرية :أخي العزيز ..أشكرك على زيارتي ..أشكرك على كلمة أستاذنا عبد الوهاب المسيري ..وكل سنة وانت طيب

فيونكة : عصفورة الربيع !..هبة ! مش ممكن !وحشتيني والله ..مافيش حاجة اسمها أيام زفت يا هوبا !..صحصحي أمال كده معايا!..والله أنا شايفاها واقعية بتشاؤم ..!ربنا يعيننا ويصبرنا وكل سنة وانت طيبة وبخير ..وتصلي التراويح وتبعتي للدستور! تحياتي


لو كنت أعلم :وانت طيبة يا سكر ..يا سلام يا دكتورة حقوق الأستخدام متاحة للجميع ..الله يكرمك ..وماتقطعيش الجوابات .. :)
والدتك شرقاويه اصيله

انما الترعه لم تجف بعد ولن تجف كذلك
yas said…
مروة انتى كده زعلتينى
ده انتى اللى بتدينى التفاؤل علطول
ومحبش اشوفك مضايقه او متشائمة
لازم يفضل عندك امل
وحلوة اغنيه احلم جميلة جدا
انا اول مرة اسمعها عندى جهل غنائي فظيع بس انت بتظبطينى اهوه
واغنيه محمد فوزى حلوة واول مره اعرفها منك برضه
chico said…
السلام عليكم و رحمه الله وبركاته
عندك حق الشمس اتأخرت اوى بس احنا بقينا تعبانين من كتر التفاؤل
طبعا التفاؤل بيتعب و خصوصا لما يكون مفيش اى حاجه مبشره بالامل حولينا
سعد زغلول قال مفيش فايدة ! و مصطفى كامل قال لاحياة مع اليأس ! و أنا بقول : و لا حياة لمن تنادي ! مش موضوع تفاؤل و تشاؤم ... دي حسابات دقيقة ... هل التغيير هيحصل و احنا عايشين ؟ ... ربنا يديكوا الصحة
عزيزتى
لازم يكون فى الامل
ودايمن نعرف ان الدنيا دى فى كل لحظه فيها يا بنعمل صالح وناخد الثواب يا غلط وربنا يرحمنا
يعنى مهما كان لازم نعمل ومنفقدش الامل حتى لو الدنيا املها مالت املنا فى الاخرة اللى هنعيش فيها عيشه ابديه
والعصر ده فى عصور قبليه كانت احلى منه واوحش منه
وبلدنا دى فى الاحلى منها والاوحش منها
يعنى كل انسان لازم يتعامل مع وضعه ودنيته ويتحملها ويتعايشها
تحياتى يا افندم
سلام
اخشى ان تكون البركه جفت والقراميط ماتت مش بانت يامروه
واسف كمان انى هانضم لكتيبة المتعجبين من تفاؤلك
اتفاءل ازاى واصحابى واهلى اللى باشوفهم مخنوقين من الوضع الحالى لمصر
هم نفسهم اللى راحوا طلعوا كارنيهات الحزب الواطى واشتركوا فى انتخاباته
واللى يضايق اكتر التفسير

مصلحه ....نستفيد منهم...زى مابيسرقونا

كل سنه وانت وزوار مدونتك الجميله طيبين
Unknown said…
امك كثل امى و امى اغلب المصريين
سلميلى عليها ربنا يعينها
بس حلوة اوى صورة فاتن حمامة اخترتى التعبير المناسب فعلا
بجد مثل اول مرة اسمعه
بس مثل جامد جدا
وعجبنى قوى

انا مش متفائل

بس خلاص
Marwa Friday said…
كل عام وأنتم بخير ..رمضان كريم

محمد عبد الغفار :إزيك يا فندم ..منور والله ..الله يكرمك ..أيوه كده يعجبني التفاؤل ..

ياسمين :إزيك يا سمسمة ..لا والله انا مش متشائمة أبدا ..أبدا !..ده شرف يا سومة اني بديكي أمل - كويس اني بعرف أدي حاجة أهو!- منوراني ..بخصوص عبد الحليم ومحمد فوزي ..ولا جهل غنائي ولا حاجة ..كان مسيرك تسمعيهم ! ا

شيكو :..لا يا شيكو ليس معك أي حق ..أين هذا التفاؤل الذي يدمي القلب؟..طالما عندك أمل ..شايف طاقة نور صغيرة ..هتعدي وتفوت ..ولا يأس مع الحياة ولا حياة مع الملوخية !..منور


قلب الأسد :آه منك يا منار !..مافيش فايدة عشان احنا قاعدين طبعا نغنيها ونلحنها ...مافيش فايدة !المهم التغيير يحصل! منورة يا جميلة


إحساس لسه حي :أهلا يافندم ..حلوة حالة الأمل اللي عندك دي ..أتمنى انك تحافظ عليها ..وما تغيرش رأيك ..! ا

إحنا : كل سنة وانت طيب يا أحمد ..ليه كده تتعجب ..ده أنا متعجبة من انك متعجب وده في حد ذاته يثير الاستعجاب!!!!!!!! لازم يكون عندك أمل وتفاؤل ..مش هتشتريهم ..بس افتكر ..ان لو دامت لغيرهم ما جاءت لهم ..فرجه قريب ..منور ..

عاليا حليم :صباح العندليب :)..متشكرة لوجودك العندليبي الرقيق ..فعلا هي وحدة أمهات ..كلهم شايلين نفس الهم ..أشكرك يا لولو ..كل سنة وانت طيبة

مواطن زهقان :منور يا زهقان ..الله يخليك ولا جامد ولا حاجة ..رمضان كريم

محمود علي :..يا سلام يا سلام ...أنا مش متفائل ..بكل بساطة؟!بس خلاص ..ده حتى شعبان عبد الرحيم متفائل عنك ! كل سنة وانت طيب
Gid-Do - جدو said…
مروة

نهارك ابيض ـ ومساكى هنا ـ وليلك سعادة _ جيت ارد زيارتك واقول كل سنة وانت طيبة ورمضان الجاى باذن الله تحققى كل احلامك ـ تحياتى
Anonymous said…
ضاقت ولما استحكمت حلقاتها فرجت وكنت اظنها لاتفرج . انا كمان متفائلة جدا معاكى يامروه ومهما تضيق فعلا هتفرج بس الموضوع محتاج حبة صبر حبة حماس يبقى الحلم صورة وصوت ولو بطلنا نحلم نموت مش كده ولا ايه ؟ تفائلوا ياجماعة
Marwa Friday said…
جدو : نهارك فل وليلك أنوار وهنا وسعادة ..منور يا جدو العزيز ..والله زيارتك فرحتني كتير ..استجاب الله لك إن شاء الله وحقق لك أحلامك ..آمين يارب

سارة طوبار:منورة يا سارة ..اسمك مش غريب عليّ؟..كل سنة وانت طيبة يا جميل ..وربنا يديم عليكي التفاؤل ..آمين يارب العالمين ..آمين

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي