سندريللا جمعية جيل المستقبل ! ا


سندريللا جمعية جيل المستقبل ! اا




تحت عنوان "مستقبل مصر في عالم متغير .. لقاء مع شباب الجامعات "،برعاية عبد اللطيف باشا المناوي "رئيس قطاع- لا مؤاخذة- الأخبار" ..تحديدا في برنامجه "وجهة نظر"..كان كل شئ يبدوا"متشوشرا"- أعني واخد شاور!- آه .. نسيت أقول إن عريس اللقاء كان السيد جمال مبارك ..!..كان يتحدث عن الإتحاد الزوفييتي "هو قالها كده ..اعترضوا بقى!"..وصراع القوى ..والمصالح ،والمعونة كآداة ضغط اقتصادي وسياسي ..وعلاقة مصر- لا مؤاخذة- التاريخية بأمريكا .. والخصخصة ..ومدى سعادته برأي أحد الطلاب النابغين "بأن الخصخصة فكرة سليمة ،لكن التطبيق خاطئ!" وكان معه وزير الصناعة والتجارة .. إلخ ..إلخ(!) "رشيد محمد رشيد " بملابس "كاجوال"وأعضاء لجنة السياسات ..كان على رأسهم د.محمد كمال –كان في صفوف الجماهير- طبعا هناك طلبة من الفرحة اتلخبطوا ..منهم طالب – سترها الله معه- قال إن الجامعة تتدخل في إنتخابات الإتحاد عن طريق الأمن .."ثم قطع!"..لم يكمل السؤال!..لن أتناول الكلام الذي يقال كل مرة على لقاءات جمال مبارك ..لأنها أصبحت عادة – وربنا مايقطعها عادة!- لكن أثناء تركيزي مع الطلبة من الجامعات المختلفة "المنيا وبنها والمنصورة "..تذكرت جامعتي العزيزة..ودق قلبي عندما سمعت اسم جامعتي "الطالب فلان الفلاني ..كلية الصيدلة جامعة الزقازيق "..يااه من حدانا !..تنحنح قليلا ..ثم قال "معلش أنا عمال ألح في رفع إيدي يا أستاذ جمال بقالي فترة ..أصل بصراحة في رقبتي وصية من 105 ألف طالب هم طلاب جامعة الزقازيق- وضعت كل الإحتمالات في رأسي -سعر الكتاب ؟..المصروفات؟ لا أعتقد ..إذن ..لا يوجد وصية أثقل من مشكلة دورات المياه في الجامعة! وجدت فلان ..يقول .."وهي أمانة – أمانه يا دنيا أمانة!- عايزين نوصلهالك – يا مسهل- المفاجأة.."إحنا داعيين حضرتك في زيارة لجامعة الزقازيق في أرض الشرقية – أمال يعني في أرض اللوا!- أرض الكرم ..طمعانين في لقاء مفتوح معاك..في أول الدراسة!" .."تكتكتكتتكتكتتك ..وششششش.-هذا صوت التصفيق الحاد المزمن!-..ابتسم جمال ابتسامة آسرة تنتزع التنهيد من قلب الجماهير – خصوصا البنانيت!-..تحسرت ..فأنا لم أطلب من زميلي الطالب "فلان الفلاني"..أن يدعو جمال مبارك لزيارة جامعة الزقازيق ..ويتكلم في ميكروفونات – بائعي الحديد القديم والدندورمة – والتي يستخدمها أعضاء هيئة التدريس في توصيل المعلومة لنا كطلبة ..!..طبعا لن أوافق الزميل فلان على دعوة جمال مبارك – ليس لأنه غير كفء – لكن مراعاة لشعور زميلاتي العزيزات ..اللاتي –دون مبالغه – حزنوا أشد الحزن عندما علموا أن جمال مبارك فعلا تزوج في مايو الماضي – يخرب بيت جماله !- ومراعاة لشعوري أيضا !..لكن لنفترض أني قد خططت بالفعل - ايه يعني الراجل من حقه أربعه!- ..وتخيلت أنه جاء ملبيا و أذبت أقلاما في رسم خطة اليوم الذي سيزورنا فيه جمال مبارك – أيوه جمال حاف كده ..ماهو ريسنا ملاح ومعدينا ،عامل وفلاح – ياااي!- من أهالينا- سأذهب أولا إلى محل "الدراي كلين "في شارعنا الرئيسي لأستأجر فستانا "سندريلاوي"..- ليس من المعقول أن أحضر لقاء جمال مبارك بمريلة الجامعة!- و"شبشبا " بلوريا شفافا ..- ولازم يكون 37 ونص على مقاسي –الذي حتما لن يشبه مقاس أحد – وكعب طوله لا يقل عن نصف متر!-الإحتياط واجب – وبعد ذلك سأرتدي" منديل بقوية" –مستعينة بدفيليهات –عمرو فهمي "الفزيعة "..والتي صور فيها أم الدنيا مصر تحمل فيها القصعة لسيادة الرئيس - ماهو لازم جمال يشوف فيّ مصر ..أمال هلفت نظره إزاي !-..سأبحث عن رنة مناسبة "للموبايل".. "شباب النيل قوام بينا ..هوب ..هيه ..والصعب يزول على ايدينا !"..صحيح أنها رنة تذكرك بإعلان سائل غسيل الصحون ..لكن كله يهون!..هنا سأدخل اللقاء..وأراه لأول مرة..فأحس بشئ ما في قلبي ،لا أحاول تفسير هذا الشئ ..ألفت نظر الجميع – طبعا طبعا!- أجلس في الصف الثاني بالضبط ..يسألني صحفي من جمهورية "محمد علي إبراهيم "،"وحضرتك يا فندم من المجلس القومي للمرأة؟!"- للدرجة دي باين عليّ مجلس قومي!- أشير له بكل "عنطزة" بأن يصمت ..أجده يكتب في النوتة ..أنظر لما كتبه"وقد حضرت الأستاذة(حلاوتهم أبو دومه) أمين المرأة عن البساتين "..أندهش من الفبركة وأسأله "وإشمعنى اخترت البساتين مع انها مش في الشرقية؟"فيرد بتلقائية بلهاء "عشان فيها مقابر!"..أصمت على مضض ..بعد فترة من حديث السيد جمال مبارك ..يترك الفرصة للحضور للمناقشة ..أرفع اصبعي كطفلة مؤدبة في الصف الأول الإبتدائي ..يشير إلي "رغم آلالاف وآلالاف الأيادي المرفوعة!"..يبدو أني نجحت ..أخذت الميكروفون ..وقلت بخجل"والله أنا سعيدة وفخورة .."وفجأة – كما يحدث في السينما – تمر الأحداث تباعا أمامي ..أتذكر تلك السيدة التي لا تريد سوى كشك يضم بضاعتها المنثورة على الرصيف ..وتلك التي تعيش وأولادها في غرفة تحت السلم ..التي أوصتني بأن أكلم "طارق علام " ليحل مشكلتها ..وتلك التي تبيع أنابيب ودخلها الذي لا يتخطى الخمسة عشر جنيها في اليوم ..و..و..!"أكملت كلامي قائلة "ومن فرط سعادتي بك في أرض الكرم أحب أقول ..ان الست أم محمد عايزة شغلانه محترمة ..ده ظلم ..لما ...."وجدت الجميع يشيرون إليّ بالسكوت ..ولاحظت حركة ضباط الأمن .."حاولوا تمسكوها من كفاية ..من أعداء الوطن "..كانت الساعة تدق الثانية عشر – عز الظهر – قمت بالقفز فوق الكراسي – ووقع مني شبشبي الفخم طبعا!- وجدت عربة نصف نقل محملة بالخضار ..تسلقتها وهربت ..وطبعا لن يقدروا على اللحاق بي – هم هيأمنوا جيمي ..ولا هيجروا ورايا؟!- أراهم الآن يمسكون الشبشب في دهشة ..يقول أحدهم "مؤكد هي صاحبة الشبشب ..لازم نجيبها وكل بنات البلد يقيسوا الشبشب "..هل تعتقدوا أنهم سيعثروا عليّ عن طريق الشبشب؟!..ربنا يستر!ات















دي عربية الخضار اللي هربت فيها! ا

_________________________________

كل سنة وأنتم طيبين ..رمضان كريم ..يارب يحقق كل أمانيكم ..آمين

Comments

يااااااااااااه اول تعليق
والله يا واد يا غلبان واحلوت
ما علينا
دى اول زيارة ليا
اما بالنسبة للبوست
اولا :جمال مبارك اصبح مادة تتكرر فى كل وسائل الاعلام
ثانيا:ربنا يهنيكم بالزيارة الميمونة
ثالثا :ارجو منك زيارة وتعليق
تحياتى
Anonymous said…
والله يامروه بجد انت دمك شربات والموضوع فعلا حلو بس نصحتى اختفى الايامدى ولوحد خبط على بابكو اوعى تفتحى ليكونوا لسه بيدورا على صاحبة الشبشب او ممكن تعملى عملية تجميل وتصغرى مقاس رجلك. هى يعنى جت عليكى ملكيش نفس ولا ايه. كده مش هيجبوكى اياكى والاستسلام مكتوب عليكى تقضى بقيت حياتك هروب يابنتى
yas said…
ايه يامروة كنتى مختفية ليه
البوست دمه خفيف خالص
وربنا يهنيك مع جمال ياختى
هى البنات عجبهم فيه ايه ده لو كان اتجوز بدرى شويه كان زمانه مخلف ادنا
احنا بعد كده نقوله بابا جمال
راحت خلاص على بابا مبارك مفروض يبقي جدو مبارك
فكرتنى بطارق علام
مرة كنت نازلة من البيت رايحة الكليه عندى محاضرة بدرى والدكتور من النوع الغتت اللى بيقفل الباب ونازلة بجرى لقيت واحد بيوقفنى بيقولى معاك قلم هم من الناس اللى للاسف عندهم اعاقة ذهنية فصعب عليا قلتله اه
قالى طيب ممكن تكتبيلى جواب لطارق علام علشان عايز اروح احج
وانا خطى وحش جدا وصاحية من النوم وهو بيملينى كلام غريب وانا الحقيقة مكنتش قادرة اركز اكتب جواب حلو
وكنت مضايقة من نفسي علشان انا كنت بكتب الجواب علشان اريحه مع انى واثقه ان هو ولا طبعا عارف العنوان اللى هيبعت عليه ولا اذا كان عارف انه مفروض يلزق عليه طوابع وكده
بس مش عارفة هو ياترى بعته ولالأ
وكل سنة وانتى طيبة
بس سؤال فى المسج اللى بعتهالى ليه فيه علامة تعجب !
Diyaa' said…
احم احم
أنا اللي معايا الشبشب دلوقتي
الدار أمان يعني
قوليلي بقي طريقك فين ومتخافيش حبيب العادلي لسه مراقبش المدونة
بس بجد مسخرة
وواقعية :(
يعني مبعدتيش كتير في سخريتك لأن أغلبها واقعية
بس إيه المقاس الأطفالي ده :|
أكيد هيقبضوا علي كل البنات في الاعدادي :))
كل سنة وأنتي طيبة
السلام عليكم

ازيك يامروتى ياحلوة

صباح الفل عليكى ياجميل

كل سنة وانتى طيبة ياقمر
ورمضان كريم
ktr7ercom said…
بوست دمه خفيف
وانت دمك أخف

_______________

سعدنا بالمرور

ربنا يوفقك

___________________

كل سنة وانت طيبة
Unknown said…
اتحفتينا يا سندريلا الزقازيق
عزيزتى سندريلا
جميل ان خيالك الخصب لم يختر لك شخصية شهرزاد خاصة انك كنت مشغله المقطوعه من فتره والا كنت بهدلتينا مع جمال باشا الف ليله وليله
وفضلنا نسمع فى صوته الشجى

انا مش عارف اذا كان عندك طولة بال وشفتى اللقاء كله ولا ايه
انا من حظى السعيد انى شفت اخره
وهو بيتكلم عن الجامعه مش مكان للعمل الحزبى

يظهر انه ميعرفش ان مقر الجمعية بتاعته منور وسط جامعة القاهره

العوافى
هههههههه متهيأ لي كده جمال وقع و هيبعت عبد السلام النابلسي وراكي و يقول فردة جزمة تعمل أزمة من غير لازمة أووو أووووووو آه لأ شبشب ! عسل و الله يا مارو بحبك عشان خفة دمك دي و لو انك مش بتحبيني إهئ !أنا بقول ربنا يتمم بخير عشان تبقي سيدة مصر التانية ( بعد خديجة ) و ترأسي المجلس القومي للمرأة بحق و حقيقي و تطلعي في ال T.v و تلقي خطاب طوييييل ... مممم أفندم ؟ .. لأ مش أنا ... ده واحد بيسأل عن صاحبة الشبشب إلحقي إستخبي بقى

دول لو مسكوكي
هتروحي وراء الشمس

لا بس وراء الشمس اتملت علي اخرها
ممكن يودوكي وراء الشمس بمحطه
أدعوك للمشاركه في فوازير رمضان اليوميه..وهي عباره عن خلق وصحابي

ولازالت الفرصه موجوده للإجابه علي الأسئله اللي فاتتك

وكل سؤال بيتحط عشر أيام
وأولويه الفوز..للأسبقيه في الحل للإجبات كلها..والإجابه الصحيحه..والتلاتين إجابه
AUTISM said…
سلام لاحلي سندريلا
كل سنة وانتي طيبة
ومدونتك جميلة جداااا
AUTISM said…
اه نسيت اقولك سلميلي علي كل اهل الشرقية اللي قضيت فيها اسبوع من احلي ايام حياتي في منيا القمح
ابقي زورينا بقي في اسيوط
:)
Anonymous said…
على فكرة الحدوتة الظريفة اللي في البوست شفتها قبل كدة في ايميل العبي غيرها
مروة
كل سنة وانتى طيبة
ويارب السنة دى تحققى اللى مقدرتيش انك تحققيه السنة اللى فاتت
ورمضان كريم
Anonymous said…
باحب مزيكة "الإرهابى" أوى.. حزاينى بس جميلة.. بس يارب مايكونش موودك ماشى معاها.. عايزاكى مزأططه على طول
سنة دراسية سعيدة
ومش محتاجه أقولك إن دمك خفيف.. متهيألى قلتها قبل كده
Anonymous said…
مروه جمعه بشوف الاسم ده كتير جدا فى جريده الدستور الاسبوعيه واول مره اعرف انك بتدونى شهاده حق فى ايام رمضان المفترجه دى انا معجب باسلوبك من الى قريتو فى الدستور ومدوناتك عجبتنى اكتر ربنا يحفظك
علوة said…
وبتقولي عليّ دمي خفيف ؟
كتابة ممتعة ممتعة فعلا
ومكس ظريف جدا بين الأسطورة والأسطورة

بس هو فعلا جمال مبارك البنات بتحبه ؟


متخافيش ممكن عملية تجميل بسيطة وتخلي مقاسك 48 وتحطي رجل على رجل وقابليني إذا عرفوكي
صباح الفل
انا سعيدة اني عثرت على مدونتك
انت مدونة فوق العادة تتمتعي باسلوب رشيق ساخر ادهشني
ربطك بين احداث اللقاء و قصة اسطورية نابغ
و كذلك المقارنة بين مديح الضيف و الاوضاع الاجتماعية المتدهورة صارخ
اسمحي لي احييك
و
تصفيق حاد



رمضان كريم و كل سنة و انت بخير
رمضــان كريــم
وكل عام وانتم بخـير
تحـياتي
عليوه said…
يا بختك يا ستى عملتى فيها سندريلا بس انتى كدة عملتى البلد مملكه وجمال مبارك ولى العرش والامير وبعدين انتى حره زمان مقاس شبشب سعادتك فى امن الدوله بيشموه قصدى بيشمموه للكلاب البوليسية تبعهم خافى على نفسك
Anonymous said…
شوفي يا مروة احييك من كل قلبى على هذه التدوينة واقولك جمال مبارك مش ها يشوف ضفر البلد لما يشوف حلمة لموأخذه ودنة
مبروك النشر فى الدستور ياجميل
Marwa Friday said…
كل سنة وانتم طيبين ..وبصحة وبسلامة

واد غلبان:يااااه أهلا وسهلا!يارب تحلو معاك على طول!..وزرت المدونة وعلقت كمان ..منور
----------------
سارة طوبار:والله يا سارة منورة جدا ومنورة الدستور يا جارتي العزيزة ..مش دقهلاوية يا سوسو؟..الدقهلية أول حاجة دخلتها فيها كانت مديرية أمن الدقهلية -هاهاهاها!-كانت حاجة رسمية ..بلدكم جميلة والله..تجميل ايه بس يا سارة أصغرها أكتر من كده!..فكرتيني بفيلم الهروب ..ربنا مايحكم علينا بالهروب ..منورة يا جميلة :)
---------------------------
ياسمين :يا صباح الفل على اللي من كفر الشيخ ومقيمين في المنصورة - دقهلية برضه-ربنا يصبرني بقى ..ازيك يا سمسمة ..عارفه ومقدرة احساسك جدا ،يارب تقدري تساعدي الناس وتسعديهم ،اممم وانت طيبة ..وبالنسبة لرسالة المحمول اللي بعتهالك وفيها علامة تعجب ..مش عارفه تلاقيني من صغري برش علامات تعجب كتييير- الحمد لله قلت- وعشان ماتزعليش ردي مافيهوش اسراف في علامات التعجب..واحده بس!ا
-----------------------------
ضياء :احم ..احم!ايه اللي جابك هنا يا أخي؟بس منور والله ،خلاص الشبشب في أمان..ياعم اونكل حبيب وراه بلد ومدونات وسجون ومساجين ودنيا ..ياخبر!..ورؤساء تحرير كمان!..بقى كده أطفالي؟..كويس هنخلص من المرحلة الاعدادية ..عشان البطالة تقل!..الله يخليك وانت طيب
-----------------------------
عاشقة الوطن :وعليكم السلام ورحمة الله وبركاته.. صباح الفل والعسل عليكي ازيك يا رضوتي يا قمر ..كل سنة وانت طيبة يا جميل وربنا يعود عليكي الأيام بخير وبسلامة ..:))
-----------------------------
شكري وشكرية:الله يكرمكم يا فندم ..مروركم دمه خفيف واسمكم دمه خفيف كمان - تحس انه زي ناقر ونقير ..حاجة كده فيها صراع وحب ومشاكل وعيال!-كل سنة وانتم طيبين وسعدت بمروركم
------------------------------
عاليا حليم :صباح العندليب يا جميلة ..الله يكرمك كل سنة وانت طيبة :)) تحياتي
------------------------------
إحنا :الله يعافيك ياخويا!..ازيك يا أحمد ..والله انا شفت نص اللقاء ،وضبطت اخويا بيتفرج..قلت له ايه ده؟..قال لازم اتعرف ع اللي هيحكم بلدنا!..معلش والله شهرزاد حلوة جدا ..تيرارارارا..بس هحكيله حكاية الفار والأسد!..جمعية جيمي مش عمل حزبي ..دي من عمل ..ولا بلاش ..من عمل الخير!..تحياتي وكل سنة وانت طيب
------------------------------
قلب الأسد:رورو!والله بحبك يا بنتي ..ليه متصورة اني بعيد عنك- أقصد بعيده!-ازيك يارورو ..جيمي يقع؟!ليه بعد الشر !..والله متشكرة لذوقك ورقتك يامنار ..طبعا مش أهلاوية ..وكمان برج الأسد..لازم تكوني ذوق طبعا..كل سنة وانت طيبة ..تعليقاتك على فكرة دمها سكر ولازم تعملي مدونة!ا
-------------------------------
محمود علي:أهلا وسهلا ..ورا الشمس أعمل ايه يا باشا؟أعد النجوم؟!..ماشي ماشي ..يصير خير يا محمود !..منور وكل سنة وانت طيب
-----------------------------
ياسر مدني:إن شاء الله أحاول أمر على المسابقة ..شكرا
----------------------------
حتشبسوت:يا صباح الجمال على بنات عمي الصعايدة ..انت اللي جميلة ..كل سنة وانت طيبة والشرقية كانت منورة جدا،وان شاء الله نفسي أزور أسيوط طبعا ..ولازم تكرري الزيارة ..تحياتي :))
-------------------------------
مجهول :إحم ..والله يسعدني ان تبعت لي الحدوتة اللي شبه حدوتي!..وانا على فكرة لو نقلت حرف من حد لازم اشير الى مصدره،وأتحداك ان يكون هناك ايميل بنفس صيغة كلامي ..إلا اذا كان منقول مني!..عموما شكرا ومنور ..كل سنة وانت طيب
-------------------------------
مواطن زهقان:وانت بالصحة والسلامة يا أحمد ويارب انت كمان تحقق امانيك ..أسعدك الله
-------------------------------
فيونكة : مين ؟هبه هنا يا مرحبا ياجميل ..كل سنة وانت طيبة يا سكر ..والله موسيقى الارهابي كانت ماشية مع موودي !.ان شاء الله هزأطط...ويارب تكون سنة سعيدة..انا عارفه ان عمر خيرت له معزة خاصة عندك ..وعندي كمان ..دمي خفيف؟ماشي الله يكرمك .زالجميل بيشوف الناس حلوين ..ربنا يسعدك يا هوبا :))
--------------------------------
Marwa Friday said…
باري 2010:كل سنة وانت طيب ..حفظك الله ..شكرا على ذوقك وزيارتك ..يارب أكون عند حسن ظنكم ..وربنا يوفقك آمين :)

-----------------------
علوة:صباح الفل يا علي ..والله رأيك أسعدني كثيرا وكتابتك في الدستور فعلا بتعجبني ودمها خفيف،والله في بنات بتحب جمال مبارك والله !..متخيل طبعا!..بالنسبة لعملية التجميل ..مش عارفه انت عايزني أقلب فيل!..عموما الفيل عسول برضه ..كل سنة وانت طيب :)
----------------------
سمباتيك :أهلا وسهلا صباح الورد عليكي ..والله أخجلني كلامك "الكبير جدا"أنا لا أحتمل هذا كله !..أنا أسمع عن مدونتك سمع حلو وفرحت لما لقيتك اول مرة تعلقي عندي ..تصقيف حاااد لمرورك ..ربنا يسعدك ويارب ماتكونش مرة وعدت ..وأكون عند ظنك الحلو ده ..آمين :)
----------------------------
ابن ناصر :الله أكرم وكل سنة وانت طيب ..وكالعادة ابن ناصر يدخل يرمي تعليق من غير ما يقرأ! بس عموما منور برضه تحياتي!ا
---------------------------
عليوه:إزيك ياعلي ..رمضان كريم ياعم ..بس انت بشرتني ببشارة عسل ..هيغمى على كلاب الامن من ريحة الشبشب ..طبيعي مش هحط في الشبشب برفان كريسيان ديور!تحياتي
---------------------------
مجهول2:سعيدة بمرورك وبرأيك ..طبعا مصر فيها رجالة ..إحنا هنسلمهاله بمزاجنا زي معمر مكرم عمل مع محمد علي ..امال ايه..تشغيل دماغ!..يارب تقدر تحافظ على الأمل الموجود عندك..تحياتي:))
-------------------------
إحنا :الله يبارك فيك يا أحمد..:) شكرا

Popular posts from this blog

وما الدنيا إلا فرن كبير!ا

من الزقازيق لمصر الجديدة! ا

سنة أولى ابتدائي